ବାରିପଦା ଅଫିସ,୭।୧: ମୟୂରଭଞ୍ଜ ଜିଲାରେ ଦିନକୁ ଦିନ ତାପମାତ୍ରା କମିବାରେ ଲାଗିଛି। କ୍ରମାଗତ ୪ ଦିନ ହେଲା ପାରଦ ଖସିବା ସହିତ ହାଡ଼ଭଙ୍ଗା ଶୀତ ଅନୁଭୂତ ହେଉଛି। ଏହାର ପ୍ରଭାବରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ପ୍ରବଳ ଶୀତ ଯୋଗୁ ସନ୍ଧ୍ୟାରେ ଜନଶୂନ୍ୟ ହେଇପଡୁଛି ବଜାର। ସକାଳୁ ଅନେକ ସମୟ ଧରି କୁହୁଡ଼ି ଲାଗି ରହୁଛି । ଅଧିକାଂଶ ସ୍ଥାନରେ ଶୀତଦାଉରୁ ରକ୍ଷା ପାଇବା ପାଇଁ ଲୋକେ ନିଆଁ ପୋଉଁଛନ୍ତି।
ଶନିବାର ଶିମିଳିପାଳର ବିଭିନ୍ନ ସ୍ଥାନରେ ପ୍ରତ୍ୟୁଷରେ ବରଫ (ତୁହିନ)ର ଆସ୍ତରଣ ଦେଖିବାକୁ ମିଳିଛି। ଶିମିଳିପାଳ ଭିତରେ ରହୁଥିବା ପର୍ଯ୍ୟଟକଙ୍କ ଗାଡ଼ି ଉପରେ, ନେଚର କ୍ୟାମ୍ପ୍ ଗୃହ ଓ ଘାସ ଗାଲିଚା ଉପରେ ବରଫର ଏକ ଆସ୍ତରଣ ତୁଷାରପାତର ଭ୍ରମ ସୃଷ୍ଟି କରୁଛି ।
ଆଭ୍ୟନ୍ତରୀଣ ଶିମିଳିପାଳରେ ଥିବା ଉପର ବାର୍ହାକାମୁଡ଼ା ଦେବସ୍ଥଳୀ, ଜେନାବିଲ ଓ ତାରାଣୀବିଲାରେ ପ୍ରବଳ ମାତ୍ରରେ ଶୀତ ଅନୁଭୂତ ହେଉଥିବାର ସୂଚନା ମିଳିଛି।
ଶିମିଳିପାଳ ଅଭୟାରଣ୍ୟରେ ଥିବା ବିଭିନ୍ନ ଗାଁର ଅନେକ ସ୍ଥାନରେ ଅନୁରୂପ ଦୃଶ୍ୟ ଶନିବାର ସକାଳୁ ଦୃଶ୍ୟମାନ ହୋଇଛି । ଏପରିକି ଉପର ବାର୍ହାକାମୁଡ଼ାରେ ୫ ଡିଗ୍ରୀ ଏବଂ ନଅଣାରେ ୬ ଡିଗ୍ରୀ ତାପମାତ୍ରା ହ୍ରାସ ରେକର୍ଡ କରାଯାଇଛି । ବିଗତ ବର୍ଷଗୁଡ଼ିକରେ ଶିମିଳିପାଳ ଅଭୟାରଣ୍ୟରେ ଶୂନ ଡିଗ୍ରୀ ତାପମାତ୍ରା ରହିଥିବା ମଧ୍ୟ ରେକର୍ଡ କରାଯାଇଛି। ଚଳିତବର୍ଷ ଆହୁରି ତାପମାତ୍ରା ଖସିବାର ସମ୍ଭାବନା ରହିଛି। ଜିଲାର ବିଭିନ୍ନ ସ୍ଥାନରେ ତାପମାତ୍ରା ୧୦ ଡିଗ୍ରୀ ତଳେ ରହୁଥିବା ଜଣାପଡ଼ିଛି। ଉତ୍ତର-ପଶ୍ଚିମା ପବନ ପ୍ରବାହିତ ଯୋଗୁ ଆଗକୁ ତାପମାତ୍ରା ଆହୁରି କମିବ ବୋଲି ଜିଲା ଜରୁରିକାଳୀନ କାର୍ଯ୍ୟାଳୟ ପକ୍ଷରୁ ଅନୁମାନ କରାଯାଉଛି।
