ଭୁବନେଶ୍ୱର, ୧୩।୧୨(ବ୍ୟୁରୋ):ବିଶ୍ୱରେ ଏବେ ସ୍ତନ କର୍କଟ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। କେବଳ ରୋଗୀ ସଂଖ୍ୟା ନୁହେଁ, ରୋଗୀଙ୍କ ମୃତ୍ୟୁ ମଧ୍ୟ ବୃଦ୍ଧି ପାଉଛି। ତେଣୁ ଏଭଳି ଏକ ମାରାତ୍ମକ ରୋଗକୁ କିପରି ନିରାକାରଣ କରାଯାଇପାରିବ ସେନେଇ ଗବେଷଣା ଜାରି ରହିଛି। କିଛିମାସ ତଳେ ଭୁବନେଶ୍ୱର ଜୀବ ବିଜ୍ଞାନ ପ୍ରତିଷ୍ଠାନ (ଆଇଏଲ୍ଏସ୍)ର ସିନିୟର୍ ମଲିକୁଲାର୍ ଅଙ୍କୋଲୋଜିଷ୍ଟ ଡା. ସନ୍ଦୀପ ମିଶ୍ର ସ୍ତନ କର୍କଟର ଟ୍ୟୁମର ଦମନକାରୀ ଜିନ୍ ଆବିଷ୍କାର କରି ଚର୍ଚ୍ଚାରେ ଆସିଥିଲେ। ଏହି ଜିନ୍ ଦ୍ୱାରା ଷ୍ଟେଜ୍-୩ରେ ଥିବା ସ୍ତନ କର୍କଟ ରୋଗ ବି ଭଲ ହୋଇପାରିବ ବୋଲି ସେ ଦାବି କରିଥିଲେ। ଏବେ ଡା. ମିଶ୍ରଙ୍କ ଅଧୀନରେ ଜଣେ ବୈଜ୍ଞାନିକ ସ୍ତନ କର୍କଟ ରୋଗ ଉପରେ ଏକ ଆବିଷ୍କାର କରିଛନ୍ତି। ସେ ହେଉଛନ୍ତି ମୋନାଲିସା ପରିଜା। ଜିପିଆର୍୧୪୧ ପ୍ରୋଟିନ ସ୍ତନ କର୍କଟକୁ ବଢ଼ାଏ ବୋଲି ସେ କହିଛନ୍ତି। ଦୀର୍ଘବର୍ଷ ହେବ ଏହା ଉପରେ ସେ ଗବେଷଣା ଜାରି ରଖିଥିବାବେଳେ ତାଙ୍କ ନୂଆ ଆବିଷ୍କାର ଓ ପ୍ରାମାଣିକ ତଥ୍ୟ ଅନ୍ତର୍ଜାତୀୟ ଜର୍ନାଲରେ ପ୍ରକାଶିତ ହେବା ପାଇଁ ମନୋନୀତ ହୋଇସାରିଛି। ଏ ନେଇ ମୋନାଲିସା କହିଛନ୍ତି, ଚିକିତ୍ସା ପୂର୍ବରୁ ରୋଗର କାରଣ ଜାଣିବା ଆବଶ୍ୟକ। ସ୍ତନ କର୍କଟର ପ୍ରଗତି ଏବଂ ମେଟାଷ୍ଟାସିସ୍ ନିୟନ୍ତ୍ରଣ କରିବା ପାଇଁ ଜିପିଆର୍୧୪୧କୁ ମଡ୍ୟୁଲେଟିଂ କରିବା ଏକ ଉତ୍ତମ ଚିକିତ୍ସା ପଦ୍ଧତି ପାଇଁ ବାଟ ଖୋଲିପାରେ। ଏ ସମ୍ପର୍କରେ ଡା. ମିଶ୍ର କହିଛନ୍ତି, ଯଦି କାହା ଶରୀରରେ ଜିପିଆର୍୧୪୧ ପ୍ରୋଟିନ ବଢ଼ିଥିବା ଦେଖାଯାଉଛି, ତେବେ ତାଙ୍କଠାରେ ସ୍ତନ କର୍କଟ ବିକଶିତ ହେଉଥିବା ଜାଣିହେବ। ତେଣୁ ଆରମ୍ଭରୁ ଏହି ରୋଗ ସମ୍ପର୍କରେ ଜାଣିବା ସହ ଚିକିତ୍ସା ଆରମ୍ଭ କରାଯାଇପାରିବ। ଏହି ଗବେଷଣା ପାଇଁ ୪ବର୍ଷ ଲାଗିଯାଇଛି। ବର୍ତ୍ତମାନ ଆମେ ଏହାର ଔଷଧ ପ୍ରସ୍ତୁତ କରିବାକୁ ଯାଉଛୁ। ୨୦୨୩ ମେ’ ସୁଦ୍ଧା ଔଷଧ ପ୍ରସ୍ତୁତ କରିବାକୁ ଆଶା ରଖିଛୁ ବୋଲି ଡା. ମିଶ୍ର କହିଛନ୍ତି।
