ବରଗଡ଼,୧୭।୮(ପ୍ରେମାନନ୍ଦ ଖମାରୀ) – ଚଳିତ ଖରିଫ ଋତୁରେ ଧାନ ବିକ୍ରି ପାଇଁ ସରକାରଙ୍କ ନୂତନ ପଞ୍ଜୀକରଣ ନୀଚି ଜଟିଳ ହୋଇଥିବା ଅଭିଯୋଗ କରି ବିଭିନ୍ନ ଚାଷୀ ସଂଗଠନ ସମେତ ବିରୋଧୀ ରାଜନୈତିକ ଦଳ ଗୁଡିକ ସରକାରଙ୍କୁ ଘେରି ବସିଥିଲେ। ଏହାକୁ ନେଇ ଏବେ ମଧ୍ୟ ଚାଷୀ ଅସନ୍ତୋଷ ଲାଗି ରହିଥିବା ବେଳେ ରାଜନୈତିକ ଦଳ ଗୁଡିକ ଆନ୍ଦୋଳନକୁ ଓହ୍ଲାଇବା ପାଇଁ ପ୍ରସ୍ତୁତି ଚୂଡ଼ାନ୍ତ କରିଛନ୍ତି। ଏହି କ୍ରମରେ ଚାଷୀ ପଞ୍ଜୀକରଣ ସରଳୀକରଣ ଦାବି ସହିତ ବିଭିନ୍ନ କୃଷି, କୃଷକ ସମସ୍ୟା ନେଇ ସୋମବାର ବିଜେଡି ପକ୍ଷରୁ ବରଗଡ଼ରେ ବିଶାଳ କୃଷକ ବିକ୍ଷୋଭ କାର୍ଯ୍ୟକ୍ରମ ରହିଛି। ତେବେ ଚାଷୀ ସଂଗଠନ ଏବଂ ବିରୋଧୀ ଦଳର ଆନ୍ଦୋଳନ ଚାପରେ ରାଜ୍ୟ ସରକାର ଚାଷୀ ପଞ୍ଜୀକରଣ ପ୍ରକ୍ରିୟାରେ କିଛି ପରିବର୍ତ୍ତନ ଆଣିଛନ୍ତି । ଚାଷୀ ପଞ୍ଜୀକରଣ ପାଇଁ ଏଣିକି ଚାଷୀ ମାନଙ୍କୁ ଚାଷଜମି ଏବଂ ନିଜ ବଂଶାବଳୀ ନେଇ ଉଦ୍ଦିଷ୍ଟ ଆବେଦନ ଫର୍ମରେ କେବଳ ସ୍ବ ଘୋଷଣା ଦେବାକୁ ପଡିବ ବୋଲି ରାଜ୍ୟ ସରକାରଙ୍କ ଖାଦ୍ୟ, ଯୋଗାଣ ଏବଂ ଖାଉଟୀ କଲ୍ୟାଣ ବିଭାଗ ପକ୍ଷରୁ ଏକ ଚିଠି ଜାରି ହୋଇଛି। ସେହିପରି ଆସନ୍ତା ୨୫ତାରିଖ ପର୍ଯ୍ୟନ୍ତ ଚାଷୀ ପଞ୍ଜୀକରଣ ଏବଂ ୩୦ତାରିଖ ପର୍ଯ୍ୟନ୍ତ ପ୍ରାଥମିକ କୃଷି ସମବାୟ ସମିତି ଦ୍ବାରା ପଞ୍ଜୀକୃତ ଚାଷୀଙ୍କ ଡିଜିଟାଲାଇଜେଶନ ଅବଧିକୁ ବୃଦ୍ଧି କରାଯାଇଥିବା ସୂଚନା ମିଳିଛି।
