ନୂଆପଡ଼ା ଅଫିସ,୧୭।୧୦: ନୂଆପଡା ଜିଲାର ୮୦ଭାଗ ଲୋକ କୃଷି ଉପରେ ନିର୍ଭର କରନ୍ତି। ଧାନ ସହିତ ଗୁର୍ଜି, ମାଣ୍ଡିଆ, କୋଦୋ, କାଙ୍ଗ, ବାଜରା ସହ ଡାଲି ଜାତୀୟ ଚାଷ ମଧ୍ୟ କରିଥାନ୍ତି। ଚଳିତବର୍ଷ ଜିଲାର ଚାଷୀ କୃଷି ବିଭାଗ ପକ୍ଷରୁ ବିରି ବିହନ ଆଣି ହେକ୍ଟର ହେକ୍ଟର ଜମିରେ ଚାଷ କରିଥିଲେ। ବିହନ ଭଲ ଗଜା ହୋଇ ଗଛ ମଧ୍ୟ ହୃଷ୍ଟପୃଷ୍ଟ ହୋଇଛି। ହେଲେ ଗଛରେ ଫୁଲ ନାହିଁ କି ଫଳନାହିଁ। ଭଲ ଅମଳ ହେଲେ ଦୁଇ ପଇସା ପାଇବା ଆଶା କରିଥିବା ଚାଷୀ ଏବେ ଗଛରେ ଫୁଲଫଳ ନ ଆସିବାରୁ ମୁଣ୍ଡରେ ହାତଦେଇ ବସିଛନ୍ତି। ଅମଳ ସମୟରେ ଚାଷୀ ମୁହଁରେ ହସ ଫୁଟିବା କଥା ଚିନ୍ତାରେ ପଡି ଯାଇଛି। ବର୍ଷକରେ ଥରେ ଅମଳ ହେଉଥିବା ବିରି ଚାଷ ବୁଡି ଯାଇଛି। କୃଷି ବିଭାଗ ଦ୍ୱାରା ପୁରୁଣା ଓ ନିମ୍ନମାନର ବିହନ ଯୋଗାଇ ଥିବାରୁ ଚାଷ ନଷ୍ଟ ହୋଇଛି ବୋଲି ଅଭିଯୋଗ ହେଉଛି। ସରକାରୀ ବିହନ ଚାଷୀଙ୍କୁ ଧୋକା ଦେଇଥିବାରୁ ଚାଷୀ ମହଲରେ ଅସନ୍ତୋଷ ପ୍ରକାଶ ପାଉଛି। ଚାଷୀଙ୍କ ବର୍ଷକର ଚାଷ ବୁଡି ଯାଇଥିବାରୁ ଏହାର ଠିକ ଆକଳନ କରି ସରକାରୀ ସହାୟତା ଯୋଗାଇ ଦେବା ପାଇଁ କ୍ଷତିଗ୍ରସ୍ତ ଚାଷୀମାନେ ଦାବି କରିଛନ୍ତି। ଏ ସଂକ୍ରାନ୍ତରେ ଜିଲା କୃଷି ଅଧିକାରୀ ସମରେଶ ଚନ୍ଦ୍ର ବେହେରାଙ୍କୁ ପଚାରିବାରୁ ସହକାରୀ କୃଷି ଅଧିକାରୀଙ୍କ ଠାରୁ ରିପୋର୍ଟ ଆସିବା ପରେ ସମସ୍ୟା ସମାଧାନ କରାଯିବ ବୋଲି ପ୍ରକାଶ କରିଛନ୍ତି।
