ନୂଆଦିଲ୍ଲୀ,୩।୩ : ୟୁକ୍ରେନ୍ରୁ ଭାରତୀୟଙ୍କୁ ସ୍ବଦେଶ ଫେରାଇ ଆଣିବା କାର୍ଯ୍ୟ ଭାରତ ସରକାରଙ୍କ ପକ୍ଷରୁ କରାଯାଉଛି। ସରକାର ନିଜ କାମ କରୁଛନ୍ତି। କିନ୍ତୁ ଭାରତ ସରକାର ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନ୍ଙ୍କୁ ଯୁଦ୍ଧ ବନ୍ଦ କରିବାକୁ ନିର୍ଦ୍ଦେଶ ଜାରି କରିପାରିବେ ନାହିଁ ବୋଲି ଗୁରୁବାର ଏକ ମାମଲାର ଶୁଣାଣି କରି ସୁପ୍ରିମ୍କୋର୍ଟ ଏଭଳି କହିଛନ୍ତି।
ୟୁକ୍ରେନ୍ରୁ ଭାରତୀୟଙ୍କୁ ଫେରାଇ ଆଣିବା ଏକ ଆବେଦନର ଶୁଣାଣି କରି ଶୀର୍ଷକୋର୍ଟ ଏହା ସୂଚିତ କରିଛନ୍ତି।
ପ୍ରଧାନ ବିଚାରପତି ଏନ୍.ଭି. ରମନାଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି ଭାରତୀୟ ଛାତ୍ରୀଛାତ୍ରମାନଙ୍କୁ ସ୍ବଦେଶ ଫେରାଇ ଆଣିବା ଲାଗି ଅପରେଶନ ଗଙ୍ଗା ଚାଲିଛି।
ୟୁକ୍ରେନରେ ଫସି ରହିଥିବା ଭାରତୀୟମାନଙ୍କୁ ତୁରନ୍ତ ଫେରାଇ ଆଣିବା ପାଇଁ ବରିଷ୍ଠ ଆଇନଜୀବୀ ଏ.ଏମ୍.ଡାରଙ୍କ ପକ୍ଷରୁ ସୁପ୍ରିମକୋର୍ଟରେ ଏକ ଆବେଦନ କରାଯାଇଥିଲା।
ପ୍ରଧାନ ବିଚାରପତି କହିଛନ୍ତି ଯେ ଭାରତୀୟ ସରକାର ଭାରତୀୟମାନଙ୍କୁ ଫେରାଇ ଆଣିବା ପାଇଁ ନିଜର କାର୍ଯ୍ୟ କରୁଛନ୍ତି। ଏନେଇ ଖଣ୍ଡପୀଠ ଆଟର୍ନି ଜେନେରାଲ କେ.କେ.ଭେନୁଗୋପାଳଙ୍କ ସହାୟତା ଲୋଡ଼ିଛନ୍ତି।
