ନୂଆଦିଲ୍ଲୀ, ୧୯।୫ : ଦେଶରେ ବେରୋଜଗାରୀ ବଢ଼ିବାରେ ଲାଗିଛି। ଏପରିସ୍ଥଳେ ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା କମିଟି (ଇଏସି) ସହରୀ ନିଶ୍ଚତ ରୋଜଗାର ଯୋଜନା ଆରମ୍ଭ କରିବାକୁ ପରାମର୍ଶ ଦେଇଛି। ଏହା ସହିତ ଆୟର ବ୍ୟବଧାନକୁ ହ୍ରାସ କରିବା ପାଇଁ ୟୁନିଭର୍ସାଲ ବେସିକ ଇନକମ୍ (ୟୁବିଆଇ) ପ୍ରବର୍ତ୍ତନ ଉପରେ ମଧ୍ୟ ଏହି କମିଟି ନିଜର ମତ ଦେଇଛି।
କମିଟି ଦ୍ୱାରା ଅସମାନତାର ସ୍ଥିତି ( ଦ ଷ୍ଟେଟ୍ ଅଫ୍ ଇନକ୍ୱାଲିଟି) ଶୀର୍ଷକ ଏକ ରିପୋର୍ଟରେ ଏସମ୍ପର୍କରେ ଉଲ୍ଲେଖ କରାଯାଇଛି। ଏହାକୁ ବୁଧବାର ଇଏସି ଚେୟାରମ୍ୟାନ ବିବେକ ଦେବରାୟ ପ୍ରକାଶ କରିଛନ୍ତି।
ଖବରକାଗଜ ଇଣ୍ଡିଆନ ଏକ୍ସପ୍ରେସ ଅନୁଯାୟୀ, ସର୍ବନିମ୍ନ ଆୟ ଏବଂ ସାମାଜିକ କ୍ଷେତ୍ରରେ ଅଧିକ ସରକାରୀ ଖର୍ଚ୍ଚ ବୃଦ୍ଧି ପାଇଁ ଏହି ରିପୋର୍ଟରେ ସୁପାରିଶ କରାଯାଇଛି। ଯାହାଫଳରେ ଦୁର୍ବଳ ବିଭାଗଗୁଡିକ ହଠାତ୍ ଅର୍ଥନୈତିକ କ୍ଷତିରୁ ରକ୍ଷା ପାଇପାରିବେ।
ଏହି ରିପୋର୍ଟରେ ସ୍ବାସ୍ଥ୍ୟ, ଶିକ୍ଷା, ଘରୋଇ ଆକଳନ ଏବଂ ଶ୍ରମ ବଜାରର ଅସମାନତା ଉପରେ ସୂଚନା ଏବଂ ତଥ୍ୟ ରହିଛି। ଏସବୁ କ୍ଷେତ୍ରରେ ଅସମାନତା ଜନସଂଖ୍ୟାକୁ ଅଧିକ ଅସୁରକ୍ଷିତ କରି ଦାରିଦ୍ର୍ୟକୁ ସୂଚାଇଥାଏ ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
ସାମାଜିକ ସେବା କ୍ଷେତ୍ର ପାଇଁ ସରକାର ଅଧିକ ପ୍ରତିଶତ ଖର୍ଚ୍ଚ ଆବଣ୍ଟନ କରିବା ଉଚିତ ବୋଲି ରିପୋର୍ଟରେ ଦର୍ଶାଯାଇଛି। ରିପୋର୍ଟ ଅନୁଯାୟୀ, ବଢୁୁଥିବା ଆୟ ଅସମାନତାକୁ ଦୂର କରିବା ପାଇଁ ୟୁବିଆଇ ଯୋଜନା ଉପରେ ପୁନର୍ବାର ବିତର୍କ ଆରମ୍ଭ ହୋଇପାରେ। ପୂର୍ବତନ ମୁଖ୍ୟ ଅର୍ଥନନୈତିକ ପରାମର୍ଶଦାତା ଅରବିନ୍ଦ ସୁବ୍ରମଣ୍ୟମ ୨୦୧୭ ପାଇଁ ଅର୍ଥନୈତିକ ସର୍ଭେରେ ସବସିଡି ସ୍ଥାନାନ୍ତର ସ୍ଥାନରେ ଏହି ପ୍ରସ୍ତାବକୁ ସମର୍ଥନ କରଥିଲେ। ସୁବ୍ରମଣ୍ୟମ ଜିଡିପିର ୪.୯ ପ୍ରତିଶତରେ ୟୁବିଆଇର ଆର୍ଥିକ ମୂଲ୍ୟ ହିସାବ କରିଥିଲେ।
ରିପୋର୍ଟରେ କୁହାଯାଇଛି ଯେ ୨୦୧୯-୨୦ ରେ ବିଭିନ୍ନ ରୋଜଗାର ବର୍ଗରେ ସର୍ବାଧିକ ପ୍ରତିଶତ ସ୍ବ-ନିୟୋଜନ କରୁଥିବା ଶ୍ରମିକ ଅର୍ଥାତ୍ ସେଲଫ୍ ଏମ୍ପଲଏଡ୍ଙ୍କ ସଂଖ୍ୟା ୪୫.୭୮ ପ୍ରତିଶତ ରହିଛି। ସେହିପରି ନିୟମିତ ବେତନ ପ୍ରାପ୍ତ ଶ୍ରମିକଙ୍କ ସଂଖ୍ୟା ୩୩.୫ ପ୍ରତିଶତ ଏବଂ କାଜୁଆଲ ଶ୍ରମିକଙ୍କ ସଂଖ୍ୟା ୨୦.୭୧ ପ୍ରତିଶତ ରହିଛି।
