ଗଜପତି,୨୦।୭(ଗିରିଧାରୀ ପରିଛା): ପ୍ରଶାସନ କେବଳ ଅଫିସ ଭିତରେ ସୀମିତ ନ ରହି ଲୋକଙ୍କ ଦ୍ୱାରରେ ପହଞ୍ଚିଲେ କିପରି ପରିବର୍ତ୍ତନ ଆସିପାରେ, ତାହାର ଏକ ଉଦାହରଣ ଗଜପତି ଜିଲାର ଗୋଷାଣି ବ୍ଲକରେ ଦେଖିବାକୁ ମିଳିଛି। ତାତିପେଟି ପଞ୍ଚାୟତ ଅନ୍ତର୍ଗତ ଗୋଲାଗାଁର ୯୭ ବର୍ଷୀୟା ତୋଡ଼ଙ୍ଗି ରାମଲକ୍ଷ୍ମୀ ଦୀର୍ଘଦିନ ଧରି ଆଧାରକାର୍ଡ ନଥିବାରୁ ଭତ୍ତାରୁ ବଞ୍ଚିତ ଥିଲେ। ଗୋଷାଣି ବିଡିଓ ଗୌର ଚନ୍ଦ୍ର ପଟ୍ଟନାୟକଙ୍କ ବ୍ୟକ୍ତିଗତ ଉଦ୍ୟମରେ ଏବେ ସେ ମାସିକ ୩,୫୦୦ ଟଙ୍କା ଭତ୍ତା ପାଇବାର ସୁଯୋଗ ପାଇଛନ୍ତି। ଏକ ପ୍ରଶାସନିକ କାର୍ଯ୍ୟରେ ଗ୍ରାମକୁ ଯାଇଥିବା ବେଳେ ବିଡିଓଙ୍କ ନଜର ଏକ ଜରାଜୀର୍ଣ୍ଣ ଘର ଉପରେ ପଡ଼ିଥିଲା। ସେଠାରେ ଏକାକୀ ରହୁଥିବା ବୃଦ୍ଧାଙ୍କ ସହ କଥାବାର୍ତ୍ତାରୁ ସେ ଭତ୍ତା ନ ପାଉଥିବା ଜାଣିଥିଲେ। ଏହାପରେ ତୁରନ୍ତ ତାଙ୍କ ପାଇଁ ଆଧାରକାର୍ଡ କରାଇବା, ବ୍ୟାଙ୍କ ଖାତା ଖୋଲିବା, ଭତ୍ତା ଆବେଦନ କରାଇବା ଓ ଅନୁମୋଦନ ପ୍ରକ୍ରିୟା ଶେଷ କରିଥିଲେ। ଉପଜିଲାପାଳଙ୍କ ଅନୁମୋଦନ ପରେ ବିଡିଓ ନିଜେ ବୃଦ୍ଧାଙ୍କ ଘରକୁ ଯାଇ ୩,୫୦୦ ଟଙ୍କାର ଭତ୍ତା ପ୍ରଦାନ କରିଥିଲେ। ଏହି ସମୟରେ ବୃଦ୍ଧାଙ୍କ ମୁହଁରେ ଫୁଟିଥିବା ହସ ହିଁ ତାଙ୍କ ପାଇଁ ସବୁଠୁ ବଡ଼ ସନ୍ତୋଷ ବୋଲି ବିଡିଓ ପ୍ରକାଶ କରିଛନ୍ତି।
