ବଲାଙ୍ଗୀର, ୧୧।୮ (ସୁନିଲ କୁମାର ମହାନ୍ତି):ବଲାଙ୍ଗୀର ସରକାରୀ ଆୟୁର୍ବେଦିକ ମହାବିଦ୍ୟାଳୟ ଓ ହସ୍ପିଟାଲରେ ମଙ୍ଗଳବାର କୌମାରଭୃତ୍ୟ–ଶିଶୁରୋଗ ବିଭାଗ ପକ୍ଷରୁ ଶିଶୁମାନଙ୍କ ସୁସ୍ଥତା ଓ ସାମଗ୍ରିକ ବିକାଶକୁ ଲକ୍ଷ୍ୟ କରି ସ୍ୱର୍ଣ୍ଣପ୍ରାଶନ କାର୍ଯ୍ୟକ୍ରମ ଆୟୋଜିତ ହୋଇଯାଇଛି।
ଏହି କାର୍ଯ୍ୟକ୍ରମରେ ୦ରୁ ୧୬ ବର୍ଷ ବୟସର ପ୍ରାୟ ୬୦୦ ଜଣ ଶିଶୁଙ୍କୁ ସ୍ୱର୍ଣ୍ଣପ୍ରାଶନ ଡ୍ରପ୍ ପ୍ରଦାନ କରାଯାଇଥିଲା। କୌମାରଭୃତ୍ୟ–ଶିଶୁରୋଗ ବିଭାଗର ଶିଶୁରୋଗ ବିଶେଷଜ୍ଞ ତଥା ସହକାରୀ ପ୍ରାଧ୍ୟାପକ ଡା. ଅମ୍ବୁଜ କୁମାର ବିଶ୍ୱାଳଙ୍କ ତତ୍ତ୍ୱାବଧାନରେ କାର୍ଯ୍ୟକ୍ରମଟି ସଫଳତାର ସହ ସମ୍ପନ୍ନ ହୋଇଥିଲା।
ଆୟୁର୍ବେଦୀୟ ପରମ୍ପରାରେ ସ୍ୱର୍ଣ୍ଣପ୍ରାଶନକୁ ଶିଶୁମାନଙ୍କ ଶାରୀରିକ ଓ ମାନସିକ ବିକାଶ ତଥା ରୋଗପ୍ରତିରୋଧକ କ୍ଷମତାର ଉନ୍ନତି ପାଇଁ ଏକ ପାରମ୍ପରିକ ପ୍ରୟୋଗ ଭାବେ ଗୁରୁତ୍ୱ ଦିଆଯାଏ। ଶିଶୁମାନଙ୍କ ସ୍ୱାସ୍ଥ୍ୟ ସୁରକ୍ଷା ଓ ଆୟୁର୍ବେଦୀୟ ଜନସ୍ୱାସ୍ଥ୍ୟ ସଚେତନତା ବୃଦ୍ଧି ଉଦ୍ଦେଶ୍ୟରେ ଏଭଳି କାର୍ଯ୍ୟକ୍ରମ ବଲାଙ୍ଗୀର ସରକାରୀ ଆୟୁର୍ବେଦିକ ମହାବିଦ୍ୟାଳୟ ଓ ହସ୍ପିଟାଲରେ ନିୟମିତ ଭାବେ ଆୟୋଜନ କରାଯାଉଛି।
ପରବର୍ତ୍ତୀ ସ୍ୱର୍ଣ୍ଣପ୍ରାଶନ କାର୍ଯ୍ୟକ୍ରମ ଆସନ୍ତା ସେପ୍ଟେମ୍ବର ୮ ତାରିଖ, ମଙ୍ଗଳବାର ଦିନ ଆୟୋଜିତ ହେବ ବୋଲି ମହାବିଦ୍ୟାଳୟର ଅଧ୍ୟକ୍ଷ ଡା. ମନୋଜ କୁମାର ସାହୁ ସୂଚନା ଦେଇଛନ୍ତି।
