ପାଣାଜୀ,୧୬।୨: ଭାରତରେ କରୋନା ସଂକ୍ରମଣ ଦ୍ରୁତ ଗତିରେ ହ୍ରାସ ପାଇଛି। ଟିକାକରଣ ଅଭିଯାନ ଯୋଗୁ ସଂକ୍ରମଣ କମିବାରେ ଲାଗିଛି। ଭାରତରେ ଚାଲିଥିବା ଟିକାକରଣ ଅଭିଯାନ ବିଷୟରେ ଆଉ ଏକ ଖୁସି ଖବର ଆସିଛି। ୧୦୦ ପ୍ରତିଶତ ବୟସ୍କ ବ୍ୟକ୍ତି କରୋନାର ଡବଲ୍ ଡୋଜ୍ ଟିକା ଗ୍ରହଣ କରିବାରେ ଗୋଆ ଦେଶର ପ୍ରଥମ ରାଜ୍ୟ ହୋଇଛି। ଏଠାରେ ସମସ୍ତ ବୟସ୍କ ବ୍ୟକ୍ତି କରୋନାର ଉଭୟ ଡୋଜ୍ ନେଇଛନ୍ତି।
ସ୍ବାସ୍ଥ୍ୟ ଅଧିକାରୀଙ୍କ ଅନୁଯାୟୀ, ଗୋଆରେ ୧୮ବର୍ଷରୁ ଅଧିକ ୧୧.୬୬ ଲକ୍ଷ ଲୋକ କରୋନା ଟିକା ଗ୍ରହଣ କରିଛନ୍ତି। ଏହି ଲକ୍ଷ୍ୟ ପୂରଣ ହେବା ପରେ କରୋନା ଟିକାକରଣ ପାଇଁ ସ୍ଥାପିତ କେନ୍ଦ୍ରଗୁଡ଼ିକୁ ବନ୍ଦ କରିବାକୁ ରାଜ୍ୟ ସ୍ବାସ୍ଥ୍ୟ ସେବା ନିର୍ଦ୍ଦେଶାଳୟ ନିଷ୍ପତ୍ତି ନେଇଛି। ଏବେ ସାଧାରଣ ଟିକାକରଣ କାର୍ଯ୍ୟକ୍ରମ ଅଧୀନରେ ଗୋଆରେ କରୋନା ଟିକା ଦିଆଯିବ।
ସୂଚନାଯୋଗ୍ୟ,ଗୋଆରେ, ଏଠାରେ ବୟସ୍କଙ୍କୁ କରୋନା ଟିକାର ପ୍ରଥମ ଡୋଜ୍ ଟିକାକରଣ ୨୦୨୧ ସେପ୍ଟେମ୍ବରରେ ଶେଷ ହୋଇଥିଲା। ଡିସେମ୍ବର ୨୦୨୧ ସୁଦ୍ଧା ଟିକାକରଣ ସମ୍ପୂର୍ଣ୍ଣ କରିବାକୁ ରାଜ୍ୟ ଲକ୍ଷ୍ୟ ଧାର୍ଯ୍ୟ କରିଥିଲା। ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ହେତୁ ଏହି ଲକ୍ଷ୍ୟରେ ପହଞ୍ଚିବାରେ ବିଳମ୍ବ ହୋଇଛି।
