ଭୁବନେଶ୍ୱର, ୨୧।୨(ବ୍ୟୁରୋ):ବିଶିଷ୍ଟ ହିନ୍ଦୀ ଔପନ୍ୟାସିକା ଗୀତାଞ୍ଜଳି ଶ୍ରୀ ଓ ବିଶିଷ୍ଟ ଶିକ୍ଷାବିତ୍, ଲେଖକ, ସଂଳାପକାର, କଳା ବିଶ୍ଳେଷକ ତଥା ଥିଏଟର ନିଦ୍ଦେର୍ର୍ଶକ ଡ. ରମେଶ ପ୍ରସାଦ ପାଣିଗ୍ରାହୀଙ୍କୁ ୨୦୨୩ ବର୍ଷ ପାଇଁ ସମ୍ମାନଜନକ ‘କଳିଙ୍ଗ ସାହିତ୍ୟ ପୁରସ୍କାର’ ପ୍ରଦାନ କରାଯିବ। ସେହିଭଳି ପେଙ୍ଗୁଇନ୍ ରାଣ୍ଡମ୍ ହାଉସ୍ ଓ ରାଜକମଳ ପ୍ରକାଶନକୁ ‘ପବ୍ଲିଶିଂ ହାଉସ୍ ଅଫ୍ ଦି ଇୟର’ ପୁରସ୍କାର ଦିଆଯିବ। କଳିଙ୍ଗ ସାହିତ୍ୟ ଉତ୍ସବର ପ୍ରତିଷ୍ଠାତା ତଥା ନିର୍ଦ୍ଦେଶକ ରଶ୍ମିରଞ୍ଜନ ପରିଡ଼ା ଏନେଇ ସୋମବାର ସୂଚନା ଦେଇଛନ୍ତି।
୨୦୧୩ରୁ କଳିଙ୍ଗ ସାହିତ୍ୟ ଉତ୍ସବ ପକ୍ଷରୁ ୩ଟି ବର୍ଗରେ ଏହି ପୁରସ୍କାର ପ୍ରଦାନ କରାଯାଉଛି। ତେବେ ଚଳିତ ବର୍ଷଠାରୁ ‘କଳିଙ୍ଗ ଆନ୍ତର୍ଜାତିକ ସାହିତ୍ୟ ପୁରସ୍କାର’ ବିଜେତାଙ୍କୁ ୧ ଲକ୍ଷ ଟଙ୍କା ଏବଂ କଳିଙ୍ଗ ସାହିତ୍ୟ ପୁରସ୍କାର ବିଜେତାଙ୍କୁ ୫୦ ହଜାର ଟଙ୍କାର ପୁରସ୍କାର ରାଶି ପ୍ରଦାନ କରାଯିବ। ଆସନ୍ତା ୨୪ ତାରିଖରେ ଆରମ୍ଭ ହେବାକୁ ଥିବା ନବମ କଳିଙ୍ଗ ସାହିତ୍ୟ ଉତ୍ସବର ଉଦ୍ଘାଟନୀ ସମାରୋହରେ ଏହି ପୁରସ୍କାର ପ୍ରଦାନ କରାଯିବ। ୨୬ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି କାର୍ଯ୍ୟକ୍ରମରେ ଭାଷା ବିବିଧତାକୁ ନେଇ ସାହିତ୍ୟର ଏକ ବର୍ଗମାଳା ଦେଖିବାକୁ ମିଳିବ। ଏଥିରେ ୧୦ଟି ଦେଶର ୨୫ରୁ ଅଧିକ ଭାଷା ଉପସ୍ଥାପନ ହେବ। ୫୦୦ରୁ ଅଧିକ ବକ୍ତା ଯୋଗଦେବେ। ପାଣିପାଗ ନ୍ୟାୟ ଭଳି ସାମ୍ପ୍ରତିକ ଆହ୍ବାନଠାରୁ ଆରମ୍ଭ କରି ମହିଳାଙ୍କ ସ୍ବର ଓ ପରିଚୟ ଆଧାରିତ ବିଷୟବସ୍ତୁ ଯଥା -ମହାନ୍ ମହିଳା ଲେଖିକା ଓ କଳାକାର, ଅପରାଧ ଉପନ୍ୟାସ, ସ୍ମରଣିକା, ଅନୁବାଦ, କବିତା, ଅର୍ଥନୀତି ବିଶ୍ୱ ସଙ୍କଟ, ଅତ୍ୟାଧୁନିକ ବିଜ୍ଞାନ, ଭାରତ ଓ ଦୁନିଆ, କଳା ଓ ଫଟୋଗ୍ରାଫି, ସ୍ବାସ୍ଥ୍ୟ ଏବଂ ଔଷଧ ଆଦି ଉପରେ ଆଲୋଚନା ହେବ।
