ରୋମ୍, ୨୪ା୫: ଗିରୋ ଡି’ ଇଟାଲିଆ ସାଇକ୍ଲିଂ ରେସ୍ର ୧୪ତମ ଷ୍ଟେଜ୍ରେ ଇଟାଲିର ଲୋରେଞ୍ଜୋ ଫର୍ଟୁନାଟୋ ପ୍ରଥମ ସ୍ଥାନ ଅଧିକାର କରିଛନ୍ତି। ଏହା ହେଉଛି ତାଙ୍କ କ୍ୟାରିୟରର ପ୍ରଥମ ବିଜୟ। ମଣ୍ଟେ ଜୋନ୍କୋଲାନ ସମିଟ୍ରେ ଇଗାନ୍ ବର୍ନାଲ ଓଭରଅଲ୍ ଅଗ୍ରଣୀ ବ୍ୟବଧାନକୁ ବୃଦ୍ଧି କରିପାରିଛନ୍ତି। ଇଓଲୋ-କୋମେଟା ଟିମ୍ରୁ ପ୍ରତିନିଧିତ୍ୱ କରୁଥିବା ଲୋରେଞ୍ଜୋ ୨୦୫ କିଲୋମିଟର ଦୂରତା ବିଶିଷ୍ଟ ଷ୍ଟେଜ୍କୁ ୫ ଘଣ୍ଟା, ୧୭ ମିନିଟ୍ ଓ ୨୨ ସେକେଣ୍ଡ ଟାଇମିଂରେ ଶେଷ କରିଥିଲେ। କଲମ୍ବିଆର ବର୍ନାଲ ଯଦିଓ ଚତୁର୍ଥ ସ୍ଥାନରେ ରହିଥିଲେ ଓଭର ଅଲ୍ ଅଗ୍ରଣୀ ୯୩ ସେକେଣ୍ଡ ବୃଦ୍ଧି କରିପାରିଛନ୍ତି। ବ୍ରିଟେନର ସିମେନ ୟେଟ୍ସ ୬ଷ୍ଠ ସ୍ଥାନ ଅଧିକାର ସହ ଓଭର ଅଲ୍ ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛନ୍ତି। ଇଟାଲିର ଡାମିଆନୋ କାରୁସୋ ୧:୫୨ ପଛୁଆ ଓଭରଅଲ ତୃତୀୟ ହୋଇଛନ୍ତି। ମାଉଣ୍ଟେନ ଷ୍ଟେଜ୍ର ଶେଷଭାଗରେ ରୁଷିଆର ଆଲେକ୍ଜାଣ୍ଡର ଭ୍ଲ୍ଳାସୋଭଙ୍କୁ ୧ ମିନିଟରୁ ଅଧିକ ସମୟ ବ୍ୟବଧାନରେ ପଛରେ ପକାଇ ଇନୋସ ଗ୍ରେନାଡିଅର୍ସ ରାଇଡର ବର୍ନାଲ ପିଙ୍କ୍ ଜର୍ସି ପାଇଥିଲେ। ୨୦୧୯ ଟୁର୍ ଡି’ଫ୍ରାନ୍ସ ବିଜେତା ବର୍ନାଲ କହିଛନ୍ତି ବର୍ତ୍ତମାନ ସେ ବାସ୍ତବିକ୍ ଭଲ ସ୍ଥିତିରେ ଅଛନ୍ତି। ପ୍ରତ୍ୟେକ ମାଉଣ୍ଟେନ ଷ୍ଟେଜ୍ରେ ଆକ୍ରମଣାତ୍ମକ ହେବା ଆବଶ୍ୟକତା ରହିବ ନାହିଁ। ୧୪ତମ ଷ୍ଟେଜ୍ରେ ସ୍ଲୋଭେନିଆର ଟ୍ରାଟ୍ନିକ (ବାହାରିନ୍ ଭିକ୍ଟୋରିଅସ) ଦ୍ୱିତୀୟ ଏବଂ ଇଟାଲିର ଆଲେସାଣ୍ଡ୍ରୋ (ୟୁଏଇ ଟିମ୍ ଏମିରେଟ୍ସ) କୋଭି ତୃତୀୟ ହୋଇଥିଲେ। ୧୪୭ କିଲୋମିଟର ବିଶିଷ୍ଟ ୧୫ତମ ଷ୍ଟେଜ୍ ଇଟାଲି ଓ ସ୍ଲୋଭେନିଆର କ୍ରସ୍ ବର୍ଡର ସର୍କିଟରେ ଅନୁଷ୍ଠିତ ହେବ।
