ପ୍ରତି ଦେଶ, ଧର୍ମ, ସମୁଦାୟର ନିଜ ନିଜର ପ୍ରଥା, ପରମ୍ପରା ଓ ଲୋକ ମାନ୍ୟତା ଥାଏ। ଆଉ ତାକୁ ସମସ୍ତେ ବେଶ୍ ଆଗ୍ରହ ଓ ଉତ୍ସାହର ସହ ପାଳନ କରନ୍ତି। ତେବେ ଏଇ ପ୍ରଥା ପରମ୍ପରା ମଧ୍ୟରୁ କିଛିଟା ଥାଏ ବେଶ୍ ଆଶ୍ଚର୍ଯ୍ୟଜନକ; ଯାହାକୁ ଦେଖି ଅନ୍ୟମାନେ ବେଶ୍ ଚକିତ ହୁଅନ୍ତି। ସେମିତି ଏକ ପ୍ରଥା ଚାଇନାରେ ପ୍ରଚଳିତ ଅଛି, ଯାହାକୁ ଘୋଷ୍ଟ ଓ୍ବେଡିଂ ବୋଲି କୁହାଯାଏ। ଏହା ୩୦୦୦ ବର୍ଷ ପୁରୁଣା ପରମ୍ପରା। ଖାସ୍କରି ଶ୍ୟାଙ୍ଗଜି ପ୍ରାନ୍ତରେ ପାଳିତ ହେଉଥିବା ଏହି ପରମ୍ପରାରେ ଦୁଇଜଣଙ୍କର ବିବାହ କରାଯାଏ, ଯେଉଁମାନେ କି ବିବାହ କରିବା ପୂର୍ବରୁ ମୃତ୍ୟୁବରଣ କରିଥାନ୍ତି। ଏଭଳି ବିବାହ କରାଇବା ପଛର କାରଣ ହେଉଛି ଯେଉଁ ବିବାହର ସୁଖ ସେମାନଙ୍କୁ ଜୀବିତ ଥିବା ସମୟରେ ମିଳି ନ ଥିଲା ତାହା ମରିବା ପରେ ମିଳୁ; ଯଦ୍ଦ୍ବାରା ମୃତ୍ୟୁପରେ ସେମାନଙ୍କ ଜୀବନ ସୁଖମୟ ହେଉ। ଏହି ବିବାହ ବେଳେ ପୁରୁଷର କବର ଭିତରେ ନାରୀର ଅସ୍ଥିକୁ ରଖି ଦିଆଯାଏ। ଯଦ୍ଦ୍ବରା କି ସେମାନେ ସାଙ୍ଗ ହୋଇ ରହିପାରିବେ। ଏଇ ବିବାହ ବେଶ୍ ଧୁମ୍ଧାମ୍ରେ କରାଯାଏ। କନିଆକୁ ଗହଣା ବି ଦିଆଯାଏ। ତେବେ ଏବେ କିଛି ଅସାମାଜିକ ବ୍ୟକ୍ତିଙ୍କ ପାଇଁ ଏହି ପ୍ରଥା କଳୁଷିତ ହେବାକୁ ଲାଗିଲାଣି। ବିବାହ ପୂର୍ବରୁ ମୃତ୍ୟୁବରଣ କରିଥିବା ପୁରୁଷ ପାଇଁ କୌଣସି ନାରୀର ମୃତ ଶରୀର ନ ମିଳିଲେ ପୁରୁଣା କବର ଖୋଳି ଶବ ଚୋରି କରାଯାଉଛି। ଏମିତି କି ଯୁବତୀଙ୍କ ମୃତ ଶରୀର ଓ ହାଡ ବଜାରରେ ଲକ୍ଷ ଲକ୍ଷ ଟଙ୍କାରେ ବିକ୍ରି ମଧ୍ୟ କରାଯାଉଛି।
