ନୂଆଦିଲ୍ଲୀ,୨।୪ : ଲୋକସଭା ନିର୍ବାଚନ ପୂର୍ବରୁ ବିରୋଧୀ ଏକତା ଗଠନ ନେଇ ଚାଲିଥିବା ଆଲୋଚନା ମଧ୍ୟରେ ଜନତା ଦଳ (ସେକୁଲାର) ପୃଷ୍ଠପୋଷକ ତଥା ପୂର୍ବତନ ପ୍ରଧାନମନ୍ତ୍ରୀ ଏଚଡି ଦେବ ଗୌଡା ରବିବାର କଂଗ୍ରେସକୁ ପରାମର୍ଶ ଦେଇଛନ୍ତି। ସେ କହିଛନ୍ତି, କଂଗ୍ରେସ ପ୍ରଥମେ ନିଜ ଘରକୁ ସଜାଡିବା ଉଚିତ। ନ୍ୟୁଜ ଏଜେନ୍ସିକୁ ଦେଇଥିବା ଏକ ସାକ୍ଷାତକାରରେ ସେ ଏହା ମଧ୍ୟ କହିଛନ୍ତି ବିରୋଧୀ ଦଳଙ୍କ ଆଗରେ ଅନେକ ବିକଳ୍ପ ଅଛି ଏବଂ ଦେଶରେ ନେତୃତ୍ୱର ଅଭାବ ନାହିଁ।
କର୍ନାଟକରେ ହେବାକୁ ଥିବା ମେ ’୧୦ ବିଧାନସଭା ନିର୍ବାଚନରେ ଜେଡି (ଏସ)ା ଆଶାକୁ ନେଇ ଉତ୍ସାହିତ ହୋଇ ବରିଷ୍ଠ ନେତା ଦେବ ଗୌଡା କହିଛନ୍ତି, ଏହି ନିର୍ବାଚନ ଚଳିତ ବର୍ଷ ଅନ୍ୟ ରାଜ୍ୟରେ ହେବାକୁଥିବା ମତଦାନ ଏବଂ ୨୦୨୪ ଲୋକସଭା ନିର୍ବାଚନ ପାଇଁ ଏକ ନୂତନ ସ୍ବର ସୃଷ୍ଟି କରିବ।
ଦୁଇ ଜାତୀୟ ଦଳ ଭାଜପା ଏବଂ କଂଗ୍ରେସ ମଧ୍ୟରେ ଚାଲିଥିବା କଡ଼ା ନିର୍ବାଚନ ମୁକାବିଲା ମଧ୍ୟରେ ଗୌଡା ତାଙ୍କ ଦଳ ଜେଡି (ଏସ) କ୍ଷମତାକୁ ଆସିବା ଉପରେ ଆତ୍ମବିଶ୍ୱାସ ପ୍ରକାଶ କରିବା ସହ କହିଛନ୍ତିତାଙ୍କ ଦଳ ଏକ ସାମାଜିକ ତଥା ବିକାଶ ଦୃଷ୍ଟିକୋଣ, ପଞ୍ଚରତ୍ନ କାର୍ଯ୍ୟକ୍ରମ ନାମରେ ଭୋଟ ମାଗିବ। ତାଙ୍କ ଦଳ ପୁରୁଣା ମହୀଶୂର ଅଞ୍ଚଳ ମଧ୍ୟରେ ସୀମିତ ରହିଛି ବୋଲି କହି ଜାତୀୟ ଦଳ ଅତି ଚତୁରତାର ସହିତ ପ୍ରଚାର କରୁଛନ୍ତି। ମାତ୍ର ସେମାନଙ୍କର ଏଭଳି ମିଥ୍ୟା କଥାରେ ରାଜ୍ୟ ଭୋଟର ପ୍ରଭାବିତ ହେବେ ନାହିଁ। ଜାତୀୟ ଦଳମାନେ ବଡ଼ ବଡ଼ ଏବଂ ମିଥ୍ୟା ଦାବି କରୁଛନ୍ତି । ମାତ୍ର ସେଥିରେ କୌଣସି ସତ୍ୟତା ନାହିଁ। ବୟସ ସମ୍ବନ୍ଧୀୟ ଅସୁସ୍ଥତା ହେତୁ ସେ ବର୍ତ୍ତମାନ ସକ୍ରିୟ ପ୍ରଚାର ଠାରୁ ଦୂରରେ ଅଛନ୍ତି ବୋଲି କହିଛନ୍ତି।
