ନୂଆଦିଲ୍ଲୀ,୩୦।୧୧: ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କୁ ଗଦ୍ଦାର କହିବା ପରେ ଏହାକୁ ନେଇ ଉତ୍ତେଜନା ଦେଖାଦେଇଥିଲା। ତେବେ ମଙ୍ଗଳବାର ଜୟପୁରରେ ଏକ ଖବରଦାତା ସମ୍ମିଳନୀରେ ଉଭୟ ନେତା ଗୋଟିଏ ମଞ୍ଚରେ ଉପସ୍ଥିତ ରହିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। କଂଗ୍ରେସ ରାଜସ୍ଥାନ ଶାଖାରେ ସବୁ ଠିକ୍ ଚାଲିଛି, ଏହା ଜଣାଇବା ପାଇଁ ଏଭଳି ଏକ ମଞ୍ଚର ଆୟୋଜନ କରାଯାଇଥିବା କୁହାଯାଉଛି। ଆମେ ଏକାଠି ଅଛୁ ବୋଲି କଂଗ୍ରେସ ସାଧାରଣ ସମ୍ପାଦକ କେ.ସି. ବେଣୁଗୋପାଳ କହିଛନ୍ତି। ଉଭୟ ଗେହଲଟ୍ ଓ ପାଇଲଟ୍ ଦଳର ସମ୍ପତ୍ତି ବୋଲି ସୋମବାର ରାହୁଲ ଗାନ୍ଧୀ କହିଥିଲେ। ଡିସେମ୍ବର ୪ରେ ରାହୁଲଙ୍କ ଭାରତ ଯୋଡ଼ୋ ଯାତ୍ରା ରାଜସ୍ଥାନରେ ପ୍ରବେଶ କରିବ। ଏନେଇ ଖବରଦାତା ସମ୍ମିଳନୀରେ ମୁଖ୍ୟମନ୍ତ୍ରୀ ଗେହଲଟ୍ ଓ ବରିଷ୍ଠ ନେତା ପାଇଲଟ୍ ସୂଚନା ଦେଇଛନ୍ତି। ରାଜ୍ୟରେ ରାହୁଲଙ୍କୁ ଉଚ୍ଛ୍ବସିିତ ସମ୍ବର୍ଦ୍ଧନା ଦିଆଯିବ। ରାଜସ୍ଥାନରେ ଭାରତ ଯୋଡ଼ୋ ଯାତ୍ରା ୧୨ ଦିନ ଚାଲିବ ଓ ଏଥିରେ ସବୁ ବର୍ଗର ଲୋକେ ସାମିଲ ହେବେ ବୋଲି ପାଇଲଟ୍ କହିଛନ୍ତି। ରାହୁଲ ଗାନ୍ଧୀ ଉଭୟଙ୍କୁ ଦଳର ଦମ୍ପତ୍ତି କହିବା ପରେ କ୍ଷମତା କନ୍ଦଳ ସମ୍ପର୍କରେ କିଛି କହିବାର ନାହିଁ ବୋଲି ଗେହଲଟ୍ କହିଥିଲେ।
ସୂଚନାଯୋଗ୍ୟ, ଗତ ୨୪ ତାରିଖରେ ଗେହଲଟ୍ ତାଙ୍କ ପ୍ରତିଦ୍ୱନ୍ଦ୍ୱୀ ପାଇଲଟ୍ଙ୍କୁ ଗଦ୍ଦାର କହିଥିଲେ। ୨ ବର୍ଷ ପୂର୍ବେ ନିଜ ଦଳର ସରକାର ଭାଙ୍ଗିବାକୁ ଉଦ୍ୟମ ଚଳାଇଥିବା ପାଇଲଟ୍ କିପରି ମୁଖ୍ୟମନ୍ତ୍ରୀ ହେବେ ବୋଲି ସେ ପ୍ରଶ୍ନ କରିଥିଲେ। ଏହାକୁ ନେଇ ବିବାଦ ଦେଖାଦେବା ପରେ ରାଜସ୍ଥାନରେ ସଂଗଠନକୁ ମଜଭୁତ କରିବା ପାଇଁ ଆବଶ୍ୟକ ପଡ଼ିଲେ କଂଗ୍ରେସ କଠୋର ନିଷ୍ପତ୍ତି ନେବ ବୋଲି ବରିଷ୍ଠ ନେତା ଜୟରାମ ରମେଶ ଦୁଇଦିନ ପୂର୍ବରୁ ଗଣମାଧ୍ୟମକୁ କହିଥିଲେ।
