ଭୁବନେଶ୍ୱର,୨୬।୪ (ବ୍ୟୁରୋ): ବାରମ୍ବାର ଚଢ଼ାଉ ହେଉଛି। ବିପୁଳ ପରିମାଣର ଛାଲ, ଦାନ୍ତ, ନଖ ଆଦି ବନ୍ୟପ୍ରାଣୀ ସାମଗ୍ରୀ ଜବତ ହେଉଛି। ଜୀବନ୍ତ ବ୍ରଜକାପ୍ତା ଚାଲାଣ ମଧ୍ୟ ଧରାପଡୁଛି। ହେଲେ ଯେତେ ଧରିଲେ ବି ସେତେ ଚୋରା ଚାଲାଣ ହେଉଛି। ଏଥିରୁ ଜଣାପଡୁଛି ବିଭିନ୍ନ ବନାଞ୍ଚଳରେ ବେଧଡ଼କ ଶିକାର ଚାଲୁଛି। ଜଙ୍ଗଲ ଓ ବନ୍ୟପ୍ରାଣୀଙ୍କ ସୁରକ୍ଷା ଦାୟିତ୍ୱ ବନ ବିଭାଗ ହାତରେ ରହିଛି। ଏପଟେ ତଦନ୍ତ କରି ଶିକାରୀ ଓ ଚାଲାଣକାରୀଙ୍କୁ ଧରିବା କ୍ଷମତା କ୍ରାଇମବ୍ରାଞ୍ଚ ଏସ୍ଟିଏଫ୍ର ରହିଛି। ହେଲେ ତଦନ୍ତ ଓ ସୁରକ୍ଷା ଢିଲା କାରଣରୁ ଶିକାରୀ ଓ ଚୋରା ଚାଲାଣକାରୀଙ୍କୁ ସୁଯୋଗ ମିଳୁଛି। ଫଳରେ ରାଜ୍ୟର ବନ୍ୟପ୍ରାଣୀ ବିପଦ ମୁହଁକୁ ଠେଲି ହୋଇଯାଉଛନ୍ତି। କିଛିଦିନ ତଳେ ଖୋର୍ଦ୍ଧା, ନୟାଗଡ଼ ଓ କଟକ ଜିଲାରୁ ବାଘ ଛାଲ, ହାତୀଦାନ୍ତ ଓ ଜୀବନ୍ତ ବଜ୍ରକାପ୍ତା ଧରା ହୋଇଥିବାବେଳେ ଶନିବାର ପୁଣିଥରେ ନୟାଗଡ଼ ଅଞ୍ଚଳରୁ ଗୋଟିଏ କଲରାପତରିଆ ବାଘ ଛାଲ ଓ ୨ଟି ହାତୀ ଦାନ୍ତ ଜବତ ହୋଇଛି। ନୟାଗଡ଼ ଜିଲା ଗଣିଆ-ଛାମୁଣ୍ଡିଆ ରାସ୍ତାର ମହାନଦୀ ପଠା ମା’ କଳାପାଟ ମନ୍ଦିର ନିକଟରେ ଏହାକୁ ବିକ୍ରି ପାଇଁ ଡିଲ୍ ଚାଲିଥିବାବେଳେ କ୍ରାଇମବ୍ରାଞ୍ଚର ସ୍ପେଶାଲ୍ ଟାସ୍କ ଫୋର୍ସ (ଏସ୍ଟିଏଫ) ଚଢ଼ାଉ କରି ୨ଜଣଙ୍କୁ ଗିରଫ କରିଛି। ସେମାନେ ହେଲେ, ନୟାଗଡ଼ ଗଣିଆ ଥାନା ଅନ୍ତର୍ଗତ ବେଠିଆସାହିର ବିମ୍ବାଧର ତରାଇ ଓ କଟକ ଜିଲା ନରସିଂହପୁର ଅଞ୍ଚଳର ରମେଶ ପ୍ରତିହାରୀ। ଉଭୟଙ୍କ ବିରୋଧରେ ମାମଲା (ନଂ.୧୬/୨୧) ରୁଜୁ କରାଯାଇ ରବିବାର କୋର୍ଟ ଚାଲାଣ କରାଯାଇଛି। ଜବତ ହାତୀଦାନ୍ତ ଓ ବାଘ ଛାଲକୁ ପରୀକ୍ଷା ପାଇଁ ଡେରାଡୁନସ୍ଥିତ ଇନ୍ଷ୍ଟିଚ୍ୟୁଟ୍ ଅଫ୍ ୱାଇଲ୍ଡ ଲାଇଫକୁ ପଠାଯିବ। ଏଥିସହ ର଼୍ୟାକେଟ୍ରେ ସମ୍ପୃକ୍ତ ବ୍ୟକ୍ତିଙ୍କୁ ଚିହ୍ନଟ ସହ ଗିରଫ ପାଇଁ ଅଧିକ ତଦନ୍ତ ଚଳାଇଛି ଏସ୍ଟିଏଫ୍।
ନୟାଗଡ଼ ଜିଲାରେ ବନ୍ୟଜନ୍ତୁ ଶିକାର କରାଯାଇ ହାତୀ ଦାନ୍ତ ଓ ବାଘ ଛାଲ ବିକ୍ରି କରାଯାଉଥିବା ନେଇ ଏସ୍ଟିଏଫକୁ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା। ଏହା ପରଠାରୁ ଏସ୍ଟିଏଫ ଘଟଣା ଉପରେ ନଜର ରଖିଥିଲା। ଶନିବାର ୨ଜଣ ବ୍ୟବସାୟୀ ବାଘ ଛାଲ ଓ ହାତୀଦାନ୍ତ ବିକ୍ରି କରିବାକୁ ଡିଲ୍ କରୁଥିବା ନେଇ ଏସ୍ଟିଏଫ ସୂଚନା ପାଇଥିଲା। ଏହା ପରେ ଏସ୍ଟିଏଫର ଏକ ଟିମ୍ ଘଟଣା ସ୍ଥଳରେ ଚଢ଼ାଉ କରି ଉଭୟ ବ୍ୟବସାୟୀଙ୍କୁ ଗିରଫ କରିଥିଲା। ଗିରଫ ଅଭିଯୁକ୍ତ ଦ୍ୱୟଙ୍କୁ କେଉଁମାନେ ଏହି ସବୁ ସାମଗ୍ରୀ ଯୋଗାଉଛନ୍ତି ସେନେଇ ଏସ୍ଟିଏଫ୍ ପକ୍ଷରୁ ତଦନ୍ତ ଚାଲିଛି।
ଓଁକାର ମିଶ୍ର
