ନୂଆଦିଲ୍ଲୀ,୧୮।୧୧: ଦକ୍ଷିଣ ଆଫ୍ରିକା ଗସ୍ତରେ ୩ ଟେଷ୍ଟ ଏବଂ ସମାନ ସଂଖ୍ୟକ ଦିନିକିଆ ଖେଳିବ ଭାରତ। ଏହି ଗସ୍ତରେ ଟେଷ୍ଟ ଦଳର ନେତୃତ୍ୱ ନେବେ ବିରାଟ କୋହଲି। ଏଥିସହ ଟି-୨୦ ଫର୍ମାଟର ପରିଚାଳନା କରିବେ ରୋହିତ ଶର୍ମା। ଏହି ଗସ୍ତ ପୂର୍ବରୁ ଦିନିକିଆ ଅଧିନାୟକ ପଦରୁ କୋହଲିଙ୍କୁ ହଟାଇ ଦିଆଯାଇଛି। ପୂର୍ବରୁ ଟି-୨୦ ଦଳର ଅଧିନାୟକତ୍ୱ କୋହଲି ଛାଡ଼ିଥିବା ହେତୁ ଏବେ କେବଳ ଟେଷ୍ଟ ଦଳର ଦାୟିତ୍ୱ ସେ ନେବେ। ଏହାକୁ ନେଇ ଚର୍ଚ୍ଚା ହେଉଥିବା ବେଳେ ଭେଟେରାନ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର ବଡ଼ କଥା କହିଛନ୍ତି।
ଗାଭାସ୍କର କହିଛନ୍ତି, ଦିନିକିଆ ଏବଂ ଟି-୨୦ ଅଧିନାୟକ ନ ଥିବାରୁ ସେ ଖୋଲାମନରେ ଖେଳିପାରନ୍ତି। ଗତ ୨ ବର୍ଷ ମଧ୍ୟରେ ଶତକ ମାରି ନ ଥିବା କୋହଲି ବ୍ୟାଟ୍ସମ୍ୟାନ୍ ଭାବେ ପୂର୍ବ ଫର୍ମକୁ ଫେରିବାର ବଡ଼ ସମ୍ଭାବନା ରହିଛି। ପୁଣିଥରେ ବଡ ଶତକ ସେ ମାରିପାରନ୍ତି। ରୋହିତଙ୍କୁ ଦେଖିଲେ ସେ ୨୦୧୩ରେ ମୁମ୍ବାଇ ଦଳର ଦାୟିତ୍ୱ ଗ୍ରହଣ କରିବା ପରଠାରୁ ଖେଳରେ ଉନ୍ନତି କରିଥିଲେ। ସେତେବେଳେ ସେ ୨୦,୩୦,୪୦ ରନ୍ର ପାଳିକୁ ବଡ଼ ସ୍କୋରରେ ପରିଣତ କରିଥିଲେ।
