ନୂଆଦିଲ୍ଲୀ,୨୯।୧୦:ନ୍ୟୁଜିଲାଣ୍ଡ ବିପକ୍ଷ ତୃତୀୟ ଟି-୨୦ ମ୍ୟାଚ୍ରେ ଭାରତ ୬ ଉଇକେଟ୍ର ଦମଦାର ବିଜୟ ହାସଲ କରିଛି। ଏହି ବିଜୟ ସହ ୫ ମ୍ୟାଚ ବିଶିଷ୍ଟ ଟି-୨୦ ସିରିଜ୍ରେ ଭାରତ ୩-୦ରେ ଅଗ୍ରଣୀ ହାସଲ କରିଛି। ଐତିହାସିକ ବିଜୟ ପରେ ଭାରତୀୟ ଦଳର ମୁଖ୍ୟ କୋଚ ଗୌତମ ଗମ୍ଭୀର ଖେଳାଳିଙ୍କୁ ଏକ ଗୁରୁତ୍ୱପୂର୍ଣ୍ଣ ବାର୍ତ୍ତା ଦେଇଛନ୍ତି। ସେ କହିଛନ୍ତି,‘ବିନମ୍ର ରୁହ’ (Stay Humble)।
ଗମ୍ଭୀର ସୋସିଆଲ ମିଡିଆରେ ଭାରତୀୟ ଦଳର ଏକ ଫଟୋ ଶେୟାର କରି ଏହି ବାର୍ତ୍ତା ଦେଇଛନ୍ତି। ରେକର୍ଡ ବିଜୟ ପରେ ଖେଳାଳିମାନେ ସେଲିବ୍ରେଶନ କରିବା ସ୍ବାଭାବିକ। ତେବେ ଗମ୍ଭୀରଙ୍କ ଏହି ବାର୍ତ୍ତା ଦଳକୁ ମନେ ପକାଇ ଦେଉଛି ଯେ, ନ୍ୟୁଜିଲାଣ୍ଡ ଗସ୍ତ ଏପର୍ଯ୍ୟନ୍ତ ଶେଷ ହୋଇନାହିଁ। ଆଗକୁ ଟି-୨୦ ପରେ ଦିନିକିଆ ଓ ଟେଷ୍ଟ ସିରିଜ୍ର ଚ୍ୟାଲେଞ୍ଜ ରହିଛି।
ତୃତୀୟ ଟି-୨୦ ମ୍ୟାଚ୍ରେ ନ୍ୟୁଜିଲାଣ୍ଡ ୧୯୮ ରନ୍ର ଟାର୍ଗେଟ ଦେଇଥିଲା। ଏହାର ଜବାବରେ ଭାରତ ମାତ୍ର ୧୩.୨ ଓଭରରେ ୪ ଉଇକେଟ ହରାଇ ବିଜୟ ହାସଲ କରିଥିଲା।
ଏହି ମ୍ୟାଚ୍ର ହିରୋ ଥିଲେ ଅଭିଷେକ ଶର୍ମା। ସେ ମାତ୍ର ୩୮ ବଲ୍ରେ ୧୧୩ ରନ୍ର ବିସ୍ଫୋରକ ଇନିଂସ ଖେଳିଥିଲେ। ମାତ୍ର ୩୫ ବଲ୍ରେ ଶତକ ପୂରଣ କରିବା ସହ ୧୧ଟି ଛକା ଓ ୯ଟି ଚୌକା ମାରିଥିଲେ।
ଅନ୍ୟପଟେ ଯୁବ ବ୍ୟାଟର୍ ବୈଭବ ସୂର୍ଯ୍ୟବଂଶୀ ମଧ୍ୟ ୧୯ ବଲ୍ରେ ୪୫ ରନ କରିଥିଲେ। ଉଭୟଙ୍କ ଦ୍ରୁତ ବ୍ୟାଟିଂ ଭାରତକୁ ପାୱାରପ୍ଲେରେ ୧୧୮ ରନ୍ରେ ପହଞ୍ଚାଇଥିଲା। ପୁରୁଷ ଅନ୍ତର୍ଜାତୀୟ ଟି-୨୦ କ୍ରିକେଟ୍ରେ ପାୱାରପ୍ଲେରେ ଏହା ସର୍ବାଧିକ ଦଳଗତ ସ୍କୋର। ଅନ୍ୟପଟେ ନ୍ୟୁଜିଲାଣ୍ଡ ପାଇଁ ଡାରିଲ ମିଚେଲ ୫୨ ବଲ୍ରେ ଅପରାଜିତ ୮୯ ରନ କରିଥିଲେ ମଧ୍ୟ ଦଳକୁ ପରାଜୟରୁ ବଞ୍ଚାଇ ପାରି ନ ଥିଲେ।
ଟି-୨୦ ସିରିଜ ପରେ ଭାରତ ପାଇଁ ଦିନିକିଆ କ୍ରିକେଟ୍ରେ ନିଜ ଶକ୍ତି ପ୍ରମାଣ କରିବାର ସୁଯୋଗ ରହିଛି। ୨୦୨୭ ଦିନିକିଆ ବିଶ୍ୱକପକୁ ଆଖି ଆଗରେ ରଖି ଭାରତୀୟ ଦଳ ନିଜର ଖେଳାଳି ଚୟନ ଓ ଦଳୀୟ ସନ୍ତୁଳନକୁ ମଜଭୁତ କରିବାକୁ ଚାହିଁବ।
ଟେଷ୍ଟ ସିରିଜ ମଧ୍ୟ ଭାରତ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ବିଶ୍ୱ ଟେଷ୍ଟ ଚାମ୍ପିୟନଶିପ (ଡବ୍ଲ୍ୟୁଟିସି) ଫାଇନାଲ୍କୁ ଯିବା ପାଇଁ ଦଳକୁ ନିଜର ପଏଣ୍ଟ ପ୍ରତିଶତ ଉନ୍ନତ କରିବାକୁ ପଡ଼ିବ। ଏଥିପାଇଁ ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ମ୍ୟାଚ୍ଗୁଡ଼ିକରେ ଭଲ ପ୍ରଦର୍ଶନ ଜରୁରୀ।
Dharitri – Odisha’s No.1 Odia Daily
