ଭୁବନେଶ୍ୱର, ୭।୧୧(ବ୍ୟୁରୋ):ରାଜଧାନୀ ଭୁବନେଶ୍ୱରରେ ଥିବା ହାଟଗୁଡିକୁ ଆବର୍ଜନାମୁକ୍ତ କରାଯିବ। ଦୋକାନରୁ ବାହାରୁଥିବା ଅଳିଆ ଯଥା ପରିବା ଚୋପା, ପଚାଶଢ଼ା ପରିବା ଏବଂ ଅନ୍ୟାନ୍ୟ ବର୍ଜ୍ୟବସ୍ତୁ ସିଧାସଳଖ ଅଳିଆ ଗାଡ଼ିକୁ ଯିବ। ବ୍ୟବସାୟୀମାନେ କୌଣସି ଜାଗାରେ ଅଳିଆ ପକାଇବେ ନାହିଁ କିମ୍ବା ହାଟରେ ଥିବା ଡଷ୍ଟବିନ୍ରେ ଅଳିଆ ରହିବ ନାହିଁ। ଏଥିପାଇଁ ସଫେଇ ଏଜେନ୍ସିମାନେ ଅଳିଆ ଗାଡ଼ି ନିୟୋଜିତ କରିବେ। ନିର୍ଦ୍ଧାରିତ ସମୟରେ ଅଳିଆ ଗାଡ଼ି ହାଟରେ ଲାଗିବ ଏବଂ ସେମାନେ ଗାଡ଼ିରେ ଅଳିଆ ପକାଇବେ। ଯେଉଁ ହାଟ ମଧ୍ୟକୁ ବଡ଼ ଗାଡ଼ି ପ୍ରବେଶ କରିପାରିବ ନାହିଁ ସେଠାକୁ ଟ୍ରଲି ପଠାଇ ଅଳିଆ ସଂଗ୍ରହ କରାଯିବ ବୋଲି ସୂଚନା ଦିଆଯାଇଛି।
ରବିବାର ବିଏମ୍ସି କାର୍ଯ୍ୟାଳୟରେ ଏନେଇ ସମସ୍ତ ହାଟ ବ୍ୟବସାୟୀ ପ୍ରତିନିଧି, ସଫେଇ ସଂସ୍ଥାର ଅଧିକାରୀ ଏବଂ ବିଏମ୍ସି ଅଧିକାରୀଙ୍କ ଏକ ସମନ୍ବୟ ବୈଠକ ଅନୁଷ୍ଠିତ ହୋଇଥିଲା। ଏହାଦ୍ୱାରା ହାଟ ଅଞ୍ଚଳକୁ କିପରି ଆବର୍ଜନାମୁକ୍ତ କରାଯାଇପାରିବ ସେନେଇ ଗୁରୁତ୍ୱାରୋପ କରାଯାଇଥିଲା। ରବିବାର ରାତିରୁ ହିଁ ଗାଡ଼ିରେ ଅଳିଆ ଯିବ ବୋଲି ସୂଚନା ଦିଆଯାଇଛି। ତେବେ ବ୍ୟବସାୟୀମାନେ ଚାହିଁଲେ ଦିନରେ ମଧ୍ୟ ଏହି ସୁବିଧା ପାଇପାରିବେ। ଏଥିପାଇଁ ବ୍ୟବସାୟୀମାନଙ୍କୁ କିଛି ପରିମାଣରେ ୟୁଜର୍ସ ଫି’ ଦେବାକୁ ପଡ଼ିବ। ନୂଆ ସଫେଇ ସଂସ୍ଥାଗୁଡିକ ପାଖରେ ଆବଶ୍ୟକ ଗାଡ଼ି ନ ଥିବାବେଳେ ବିଏମ୍ସି ପାଖରେ ମଧ୍ୟ ଏହି ସୁବିଧା ନାହିଁ। ତେଣୁ ସମସ୍ତଙ୍କ ସହଯୋଗରେ ଏହି ବ୍ୟବସ୍ଥାକୁ କାର୍ଯ୍ୟକାରୀ କରିବା ପାଇଁ ବୈଠକରେ ନିଷ୍ପତ୍ତି ହୋଇଛି। ଏଥିସହ ହାଟଗୁଡିକ ନିୟମିତ ସଫେଇ କରାଯିବ। ସେହିପରି ହାଟ, ମାର୍କେଟ ଅଞ୍ଚଳରେ ବିଏମ୍ସିର ସ୍ବଚ୍ଛସାଥୀମାନେ ବୁଲି ଉଭୟ ବ୍ୟବସାୟୀ ଏବଂ ସାଧାରଣ ଲୋକଙ୍କୁ ସ୍ବଚ୍ଛତା ଦିଗରେ ସଚେତନ କରିବେ ବୋଲି ନିଷ୍ପତ୍ତି ହୋଇଛି। କମିଶନର ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଅତିରିକ୍ତ କମିଶନର ସୂର୍ଯ୍ୟବଂଶୀ ମୟୂର ବିକାଶ, ଡେପୁଟି କମିଶନର (ପରିମଳ) ଶୁଭେନ୍ଦୁ ସାହୁ ଏବଂ ଅନ୍ୟମାନେ ଉପସ୍ଥିତ ଥିଲେ।
ସୂଚନାଯୋଗ୍ୟ, ବିଏମ୍ସି ପକ୍ଷରୁ ରାଜଧାନୀର ସ୍ବଚ୍ଛତା ଉପରେ ପଦକ୍ଷେପ ନିଆଯାଉଛି। ଆଗକୁ ହକି ବିଶ୍ୱକପ୍ ହେବାକୁ ଥିବାରୁ ଏହା ପୂର୍ବରୁ କିପରି ସ୍ବଚ୍ଛତା କ୍ଷେତ୍ରରେ ସହରର ମାନଚିତ୍ର ବଦଳିବ ସେନେଇ ଗୁରୁତ୍ୱାରୋପ କରାଯାଉଛି। ବିଶେଷକରି ସହରର ବିଭିନ୍ନ ହାଟରେ ପରିବା ଚୋପାଠାରୁ ଆରମ୍ଭ କରି ଅନ୍ୟାନ୍ୟ ଅଳିଆ ଆବର୍ଜନା ବାହାରୁଛି। ସେଗୁଡିକୁ ଡଷ୍ଟବିନ୍ରେ ରଖିବା ପାଇଁ ବ୍ୟବସାୟୀମାନଙ୍କୁ ନିର୍ଦ୍ଦେଶ ରହିଛି। ତେବେ ଠିକ୍ ଭାବେ ଅଳିଆ ଗାଡ଼ି ଆସୁ ନ ଥିବାରୁ ଅଧିକାଂଶ ବ୍ୟବସାୟୀ ଡଷ୍ଟବିନ୍ର ଅଳିଆ ଆଖପାଖରେ ଗଦା କରି ରାତିରେ ଘରକୁ ଫେରୁଛନ୍ତି। ଫଳରେ ଗାଈଗୋରୁ ଏହାକୁ ଖାଇବା ସହିତ ଏଣେତେଣେ ପକାଉଛନ୍ତି। ତେଣୁ ଏହାକୁ କିପରି ସୁବ୍ୟବସ୍ଥିତ କରାଯିବ ଏବଂ ହାଟକୁ ଆବର୍ଜନାମୁକ୍ତ କରାଯିବ ସେ ନେଇ ବୈଠକରେ ଆଲୋଚନା ହୋଇଥିଲା।
