ଦିଗପହଣ୍ଡି, ୨ା୭ (ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ କୋଟିନଡ଼ା ଗ୍ରାମର ଜଣେ ଗାଡ଼ି ଚାଳକ ବାପୁଜୀ ସ୍ୱାଇଁ ରହସ୍ୟଜନକ ଭାବେ ନିଖୋଜ ହୋଇଯାଇଛନ୍ତି। ଗତ ୮ ଦିନ ଧରି ତାଙ୍କର କୌଣସି ପତ୍ତା ମିଳୁ ନଥିବା ବେଳେ, ତାଙ୍କ ସ୍ୱାମୀଙ୍କୁ ଅପହରଣ କରାଯାଇଥିବା ନେଇ ପତ୍ନୀ ପ୍ରଭାସିନୀ ସ୍ବାଇଁ ସଙ୍ଗୀନ ଅଭିଯୋଗ ଆଣିଛନ୍ତି। ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଏକ ଚର୍ଚ୍ଚାର ପ୍ରସଙ୍ଗ ପାଲଟିଛି।
ନିଖୋଜ ବାପୁଜୀ ଛତ୍ରପୁର ଅଞ୍ଚଳର ଜଣେ ଟ୍ରକ୍ ମାଲିକଙ୍କ ପାଖରେ ଡ୍ରାଇଭର ଭାବେ କାମ କରୁଥିଲେ। ପତ୍ନୀଙ୍କ କହିବା ଅନୁଯାୟୀ, ଗତ ଜୁନ୍ ୨୫ ତାରିଖରେ ସେ ଛତ୍ରପୁରରୁ ଟ୍ରକ୍ ନେଇ ଆନ୍ଧ୍ରପ୍ରଦେଶ ଅଭିମୁଖେ ବାହାରିଥିଲେ। ସେହିଦିନ ରାତି ପ୍ରାୟ ୮ଟାରେ ବାପୁଜୀ ଶେଷ ଥର ପାଇଁ ତାଙ୍କ ସ୍ତ୍ରୀଙ୍କ ସହ ମୋବାଇଲ୍ରେ କଥା ହୋଇଥିଲେ। ମାତ୍ର ପରଦିନ ଭୋର ପ୍ରାୟ ୬ଟାରେ ପ୍ରଭାସିନୀ ଫୋନ୍ କରିବାରୁ ବାପୁଜୀଙ୍କ ମୋବାଇଲ୍ ସୁଇଚ୍ ଅଫ୍ ଦେଖାଇଥିଲା। ପରବର୍ତ୍ତୀ ସମୟରେ ଉକ୍ତ ଟ୍ରକ୍ଟି ଗୋଳନ୍ଥରା ଥାନା ନିକଟସ୍ଥ ଏକ ପେଟ୍ରୋଲ ପମ୍ପ ସମ୍ମୁଖରେ ଛିଡ଼ା ହୋଇଥିବା ଦେଖିବାକୁ ମିଳିଥିଲା। ଆଶ୍ଚର୍ଯ୍ୟର କଥା, ଟ୍ରକ୍ରେ ଚାବି ଲାଗି ରହିଥିବା ବେଳେ ସେଠାରେ ବାପୁଜୀଙ୍କ ଚପଲ ପଡ଼ି ରହିଥିଲା।
ଖବରପାଇ ଏଭଳି ଅବସ୍ଥା ଦେଖି ପ୍ରଭାସିନୀ ପ୍ରଥମେ ଗୋଳନ୍ଥରା ଥାନାରେ ଏତଲା ଦେବାକୁ ଯାଇଥିଲେ। ହେଲେ ସେଠାକାର ପୋଲିସ ମାମଲା ଗ୍ରହଣ ନକରି ତାଙ୍କୁ ଛତ୍ରପୁର ଥାନାକୁ ପଠାଇ ଦେଇଥିଲା। ଛତ୍ରପୁର ଥାନାକୁ ଯିବାରୁ ସେଠାକାର ପୋଲିସ ଅଧିକାରୀ ସବୁ ଶୁଣିବା ପରେ ତାଙ୍କୁ ଦିଗପହଣ୍ଡି ଥାନାକୁ ଯିବାକୁ ପରାମର୍ଶ ଦେଇଥିଲେ। ଶେଷରେ ସେ ଦିଗପହଣ୍ଡି ଥାନାରେ ପହଞ୍ଚିବାରୁ, “ସ୍ୱାମୀ ଛତ୍ରପୁରରୁ ଗାଡ଼ି ନେଇ ଯାଉଥିଲେ, ତେଣୁ ଛତ୍ରପୁର ପୋଲିସ ହିଁ ତଦନ୍ତ କରିବ” କହି ସେଠାରୁ ମଧ୍ୟ ତାଙ୍କୁ ଫେରାଇ ଦିଆଯାଇଥିଲା। ପୋଲିସର ଏଭଳି ବିବାଦ ଯୋଗୁ ଜଣେ ମହିଳା ଭୋକ ଉପାସରେ ୩ଟି ଥାନାକୁ ଦୌଡ଼ି ଦୌଡ଼ି ନୟାନ୍ତ ହୋଇ ସାରିଲେଣି।
ବାପୁଜୀଙ୍କର ଗୋଟିଏ ପୁଅ ଓ ଦୁଇଟି ଝିଅ ଥିବା ବେଳେ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ନିଖୋଜ ହେବା ପରେ ପରିବାର ଭାଙ୍ଗି ପଡ଼ିଛି। ଏହାକୁ ନେଇ ପ୍ରଭାସିନୀ ସଂଘାତିକ ଅଭିଯୋଗ ଆଣିଛନ୍ତି। ତାଙ୍କ କହିବା ଅନୁସାରେ, ସମ୍ପୃକ୍ତ ଟ୍ରକ୍ ମାଲିକ ଏବଂ ତାଙ୍କର ଜଣେ ପୁରୁଣା ଡ୍ରାଇଭର ବାବୁଲା ମିଶି ବାପୁଜୀଙ୍କୁ ଅପହରଣ କରି କେଉଁଠି ଲୁଚାଇ ରଖିଛନ୍ତି। ଏ ସଂକ୍ରାନ୍ତରେ ସେ ପୁନର୍ବାର ଛତ୍ରପୁର ଥାନାରେ ଏତଲା ଦେଇଥିବା ପ୍ରକାଶ କରିଛନ୍ତି। ତେବେ ଘଟଣାକୁ ୮ ଦିନ ବିତିଯାଇଥିଲେ ସୁଦ୍ଧା ବାପୁଜୀଙ୍କ କୌଣସି ସନ୍ଧାନ ନ ମିଳିବା ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
