ଗଞ୍ଜାମ,୧୧।୫(ବିଦ୍ୟାଧର ସାହୁ):ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ (ଓଷ୍ଟା) ଗଞ୍ଜାମ ଜିଲାର ନବନିର୍ବାଚିତ କର୍ମକର୍ତ୍ତାଙ୍କ ଏକ ବନ୍ଧୁ ମିଳନ କାର୍ଯ୍ୟକ୍ରମ ଗଞ୍ଜାମ ବ୍ଲକ ଅନ୍ତର୍ଗତ ପ୍ରସିଦ୍ଧ ବଟେଶ୍ୱର ଶୈବପୀଠରେ ଅନୁଷ୍ଠିତ ହୋଇଯାଇଛି। ନବନିର୍ବାଚିତ ସଭାପତି ଦିଲ୍ଲୀପ କୁମାର ପ୍ରଧାନଙ୍କ ଅଧ୍ୟକ୍ଷତାରେ ପରିଚାଳିତ ଏହି ବୈଠକରେ ଓଷ୍ଟାର ରାଜ୍ୟ ସାଧାରଣ ସମ୍ପାଦକ ରଞ୍ଜନ କୁମାର ଦାଶ ମୁଖ୍ୟ ଅତିଥି ରୂପେ ଯୋଗ ଦେଇଥିଲେ। ସେ ଶିକ୍ଷକମାନଙ୍କର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିବା ସହ ସେଗୁଡ଼ିକର ସମାଧାନ କ୍ଷେତ୍ରରେ ରାଜ୍ୟ ସରକାରଙ୍କ କାଳକ୍ଷେପଣ ନୀତିକୁ କଠୋର ସମାଲୋଚନା କରିଥିଲେ।
ମାନ୍ୟବର ସୁପ୍ରିମ କୋର୍ଟଙ୍କ ନିର୍ଦ୍ଦେଶ କାର୍ଯ୍ୟକାରୀ କରିବାରେ ସରକାର ଟାଳଟୁଳନୀତି ଅବଲମ୍ବନ କରୁଥିବାରୁ, ଏହା ବିରୋଧରେ ସଂଗ୍ରାମ ପାଇଁ ସମସ୍ତ ଶିକ୍ଷକ ସମାଜକୁ ଐକ୍ୟବଦ୍ଧ ହେବାକୁ ସେ ଆହ୍ବାନ ଦେଇଥିଲେ। ଓଷ୍ଟାର ପ୍ରାକ୍ତନ କୋଷାଧ୍ୟକ୍ଷ ତଥା ଗଞ୍ଜାମର ପୂର୍ବତନ ସମ୍ପାଦକ କାମରାଜୁ ମହାରଣା ଓଷ୍ଟା ଗଠନରେ ଗଞ୍ଜାମର ତତ୍କାଳୀନ ଶିକ୍ଷକ ସମାଜର ଭୂମିକା ଏବଂ ସାମ୍ପ୍ରତିକ ସ୍ଥିତି ଉପରେ ଆଲୋକପାତ କରିଥିଲେ।
ରାଜ୍ୟ ଯୁଗ୍ମ ସାଧାରଣ ସମ୍ପାଦକ ବ୍ରଜ କିଶୋର ବିଶ୍ୱାଳ ଗଞ୍ଜାମ ସଂଗଠନକୁ ଅଧିକ ଶାଣିତ କରି ଜିଲା ଶିକ୍ଷାଧିକାରୀଙ୍କ (DEO) କାର୍ଯ୍ୟାଳୟର ଦୁର୍ନୀତି ବିରୋଧରେ ସଂଗ୍ରାମ କରିବା ପାଇଁ ପରାମର୍ଶ ଦେଇଥିଲେ। ନବନିର୍ବାଚିତ ସମ୍ପାଦକ ରାମ ଚନ୍ଦ୍ର ପୋଲାଇ ନୂତନ କାର୍ଯ୍ୟକାରୀ କମିଟିର କାର୍ଯ୍ୟଶୈଳୀ ଓ ଆଗାମୀ ଆନ୍ଦୋଳନର ରୂପରେଖ ସମ୍ପର୍କରେ ନିଜର ମତ ପ୍ରକାଶ କରିଥିଲେ।
ଅନ୍ୟମାନଙ୍କ ମଧ୍ୟରେ ପୂର୍ବତନ କର୍ମକର୍ତ୍ତା ଲକ୍ଷ୍ମୀନାରାୟଣ ଶତପଥୀ, କୋରା ମହାରଣା, ବିଜୟ ବିଶ୍ୱାଳ, ସୁଶାନ୍ତ ନାୟକ, ପ୍ରଶାନ୍ତ ପତି, ରାମ ଚନ୍ଦ୍ର ଗୌଡ଼, ବିଦାୟୀ ସଭାପତି ସନ୍ତୋଷ କୁମାର ଜେନା, ପୂର୍ବତନ ସମ୍ପାଦକ ବିଜୟ କୁମାର ବେହେରା, ଏଲୋଷ୍ଟା ଉପଦେଷ୍ଟା ଜଗବନ୍ଧୁ ଜେନା ଏବଂ ଓଷ୍ଟା କାର୍ଯ୍ୟକାରୀ କମିଟି ସଦସ୍ୟ ମଧୁସୂଦନ ଦେ ପ୍ରମୁଖ ସଂଗଠନକୁ ଅଧିକ କ୍ରିୟାଶୀଳ କରିବା ପାଇଁ ଉଦ୍ବୋଧନ ଦେଇଥିଲେ।
କାର୍ଯ୍ୟକାରୀ ସଭାପତି କେଦାରନାଥ ପଟ୍ଟନାୟକ ଅତିଥିମାନଙ୍କୁ ସ୍ବାଗତ କରିଥିବା ବେଳେ ଯୁଗ୍ମ ସମ୍ପାଦକ ସୁଦୀପ୍ତ କୁମାର ପଟ୍ଟନାୟକ ସ୍ବାଗତ ସଂଗୀତ ପରିବେଷଣ କରିଥିଲେ। ଶେଷରେ ସମ୍ପାଦକ ରାମଚନ୍ଦ୍ର ପୋଲାଇ ଧନ୍ୟବାଦ ଅର୍ପଣ କରିଥିଲେ।
