ଗଞ୍ଜାମ,୧୨।୧୦(ବିଦ୍ୟାଧର ସାହୁ): ଗଞ୍ଜାମ ବ୍ଲକ କଣ୍ଟିଆଗଡ଼ ସ୍ଥିତ ବଟେଶ୍ୱର ପୀଠରେ କାର୍ତ୍ତିକ ମାସର ଚାରୋଟି ସୋମବାର ପାଇଁ ଯାତ୍ରା କମିଟି ପକ୍ଷରୁ ଏକ ପ୍ରସ୍ତୁତି ବୈଠକ ରବିବାର ଅନୁଷ୍ଠିତ ହୋଇଯାଇଛି। ଏଥିରେ ଯାତ୍ରା ପରିଚାଳନା କମିଟି ସଭାପତି ରଙ୍କନିଧି ସ୍ବାଇଁ ସଭାପତିତ୍ୱ କରିଥିଲେ। ହୁମ୍ମା ଫାଣ୍ଡି ଅଧିକାରୀ ସତ୍ୟଜିତ ବେଣୀ ଉପସ୍ଥିତ ରହି ପ୍ରତ୍ୟେକ ସୋମବାର ଦିନ ପ୍ରବଳ ଭିଡ଼କୁ ଦୃଷ୍ଟିରେ ରଖି ଟ୍ରାଫିକ ସମସ୍ୟା ଏବଂ ବେଳାଭୂମିରେ ଭକ୍ତ ଓ ପର୍ଯ୍ୟଟକଙ୍କ ସୁରକ୍ଷା ଉପରେ ଯାତ୍ରା କମିଟିର ସମସ୍ତ ସଦସ୍ୟଙ୍କ ସହ ଆଲୋଚନା କରିଥିଲେ। କମିଟି ସଦସ୍ୟମାନେ ପୋଲିସ ପ୍ରଶାସନକୁ ସହଯୋଗ କରିବାକୁ ଆଲୋଚନା ହୋଇଥିଲା l ଏଥିସହ ବଟେଶ୍ୱର ବାଲିଯାତ୍ରା ଉପଲକ୍ଷେ ଚଳିତ ମାସ ଶେଷ ତଥା ୨୯ରୁ ୧ ପର୍ଯ୍ୟନ୍ତ ଚାରିଦିନ ଧରି ଯାତ୍ରା ଇନ୍ଦ୍ରଭୁବନ ଅପେରା ମଞ୍ଚସ୍ଥ କରିବ। ଶାନ୍ତି ଶୃଙ୍ଖଳା ସହ ଯାତ୍ରା କିଭଳି ସମ୍ପୂର୍ଣ୍ଣ ହେବ ସେନେଇ ବିସ୍ତୃତ ଆଲୋଚନା ହୋଇଥିଲା। କଣ୍ଟିଆଗଡ଼, ନୀଳାଦ୍ରିପୁର, ଖଟୁଆକୁଦା ମୟୁରପଦା, ଗୋଖରକୁଦା ଓ ପୋଡମପେଟା ଆଦି ୬ ଖଣ୍ଡ ଗ୍ରାମବାସୀ ଏହି ଯାତ୍ରାକୁ ପରିଚାଳନା କରୁଛନ୍ତି। ବୈଠକରେ ରଞ୍ଜିତ କୁମାର ପଲାଇ, ଶବର କୁମାର ତରାଇ,ବୀରେନ ପ୍ରଧାନ,ସଞ୍ଜୟ କୁମାର ତରାଇ, ଯୋଗେନ୍ଦ୍ର ଛଟେଇ, କୃଷ୍ଣଚନ୍ଦ୍ର ବାରିକ, ସିମାଞ୍ଚଳ ନାହାକ ,ଧ୍ରୁବ ଚରଣ ପଲାଇ, ତ୍ରିଲୋଚନ ପ୍ରଧାନ ,ଶିବରାମ ପଲାଇ, ନିରାକାର ଜେନା, ଦୁର୍ଯ୍ୟୋଧନ ପ୍ରଧାନ,ରବୀନ୍ଦ୍ର ପଲାଇଙ୍କ ସମେତ ସମସ୍ତ ସଦସ୍ୟ ଉପସ୍ଥିତ ଥିଲେ। ତେବେ ଯାତ୍ରା ସମୟରେ ବିଶୃଙ୍ଖଳାକାରୀଙ୍କୁ ବରଦାସ୍ତ କରାଯିବ ନାହିଁ ବୋଲି ଆଲୋଚନା ହୋଇଥିଲା।
