ନୂଆଦିଲ୍ଲୀ, ୧୧।୧ : ଦେଶରେ କରୋନା ମହାମାରୀ ସଙ୍କଟ ଯୋଗୁ ଆତଙ୍କ ଦେଖାଦେଇଛି। ଦୈନିକ ସଂକ୍ରମଣ ପୁଣି ବୃଦ୍ଧି ପାଇବାରେ ଲାଗିଛି। ଫଳରେ ସ୍ଥିତି ଅଣାୟତ୍ତ ହେବାରେ ଲାଗିଛି। କରୋନା ସଙ୍କଟ ମଧ୍ୟରେ ମକର ସଂକ୍ରାନ୍ତି ୧୪ ଜାନୁୟାରୀରେ ପଡୁଛି। ଏହି ଦିନ ଗଙ୍ଗାରେ ବୁଡ଼ ପକାଇବାର ମହତ୍ତ୍ୱ ରହିଛି।
ଦେଶର ବିଭିନ୍ନ ପ୍ରାନ୍ତରୁ ଶ୍ରଦ୍ଧାଳୁମାନେ ଗଙ୍ଗାରେ ବୁଡ଼ ପକାଇବାକୁ ଆସିଥାନ୍ତି। ତେବେ କରୋନାର ତୃତୀୟ ଲହର ସଂକ୍ରମଣକୁ ଦୃଷ୍ଟିରେ ରଖି ଗଙ୍ଗା ସ୍ନାନ ବନ୍ଦ ଲାଗି ନିର୍ଦ୍ଦେଶ ଜାରି ହୋଇଛି।
ହରିଦ୍ୱାରରେ କରୋନାର ନୂଆ ଭାରିଆଣ୍ଟ ଓମିକ୍ରନ ଯୋଗୁ ସଙ୍କଟ ସୃଷ୍ଟି ହୋଇଛି। ବଢୁଥିବା ସଂକ୍ରମଣକ ଦୃଷ୍ଟିରେ ରଖି ଏଭଳି ପରିସ୍ଥିତିରେ ଜିଲା ନିିର୍ବାଚନ ଅଧିକାରୀ ଏବଂ ଜିଲାପାଳ ଏଭଳି ନିଷ୍ପତ୍ତି ନେଇଛନ୍ତି।
ସଂକ୍ରମଣକୁ ଦୃଷ୍ଟିରେ ରଖି ହରିଦ୍ୱାର ଜିଲାପାଳ ବିନୟ ଶଙ୍କର ପାଣ୍ଡେ ଗଙ୍ଗା ସ୍ନାନକୁ ବାରଣ କରିଛନ୍ତି। ଏହା ସହିତ ସ୍ଥାନୀୟ ବାସିନ୍ଦା ଏବଂ ବାହାରୁ ଆସୁଥିବା ଶ୍ରଦ୍ଧାଳୁଙ୍କ ପ୍ରବେଶ ଉପରେ ନିଷେଧାଦେଶ ଜାରି କରାଯାଇଥିବା ସମ୍ପର୍କରେ ସୂଚନା ଦେଇଛନ୍ତି।
ଯେଉଁମାନେ ଆଦେଶ ପାଳନ କରୁ ନଥିବା ଲୋକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
ସେହିପରି ଋଷିକେଶରେ ମଧ୍ୟ ଗଙ୍ଗା ସ୍ନାନ ଉପରେ ପ୍ରତିବନ୍ଧକ ଲଗାଯାଇଛି।
ଯଦି ଗଙ୍ଗା ସ୍ନାନକୁ ଅନୁମତି ଦିଆଯାଏ, ତେବେ ବହୁ ସଂଖ୍ୟାରେ ଶଦ୍ଧାଳୁ ଘାଟରେ ପହଞ୍ଚିବେ। ଯାହା ଦ୍ୱାରା କରୋନା ସଂକ୍ରମଣ ହେବାର ଆଶଙ୍କା ରହିବ ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି। ଏଭଳି ପରିସ୍ଥିତିରେ ସତର୍କତାମୂଳକ ପଦକ୍ଷେପ ଭାବରେ ଗଙ୍ଗା ସ୍ନାନକୁ ବାରଣ କରାଯାଇଛି।
