ଅହମଦାବାଦ, ୨୮ା୪ (ପି.ଟି.)- କୋଭିଡ୍ ପାଇଁ ଲକ୍ଡାଉନ ସତ୍ତ୍ୱେ ଖେଳ ସମ୍ଭବ ବୋଲି କହିଛନ୍ତି ଇଂଲଣ୍ଡ ଓ କୋଲକାତା ନାଇଟ ରାଇଡର୍ସ ଅଧିନାୟକ ଇଅନ ମୋର୍ଗାନ। ଅତୀତରେ ବୁନ୍ଦେସ ଲିଗା ଓ ପ୍ରିମିୟର ଲିଗ୍ ଖେଳାଯାଇଛି। ବର୍ତ୍ତମାନ ଆଇପିଏଲ୍ ସେହି ମାର୍ଗରେ ଚାଲିଛି। ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ୨୦୨୦ ସଂସ୍କରଣ ଶେଷ ହେବାର ୬ ମାସ ନ ପୂରୁଣୁ ୨୦୨୧ ସଂସ୍କରଣ ଆରମ୍ଭ ହୋଇଛି। ଏଥର କୋଭିଡ୍ ଦ୍ୱିତୀୟ ଲହରର କବ୍ଜାରେ ରହିଛି ଆଇପିଏଲ୍। ଭାରତର ରବିଚନ୍ଦ୍ରନ ଅଶ୍ୱିନ ଓ ଅଷ୍ଟ୍ରେଲିଆର କେତେଜଣ ଖେଳାଳି ଇତିମଧ୍ୟରେ ଇଭେଣ୍ଟ ଛାଡ଼ି ଚାଲିଯାଇଛନ୍ତି। ଭାରତର ସ୍ବାସ୍ଥ୍ୟ ବ୍ୟବସ୍ଥା ବର୍ତ୍ତମାନ ସଙ୍କଟ ଦେଇ ଗତି କରୁଛି। ବହୁ ରାଜ୍ୟରେ ବିଭିନ୍ନ କଟକଣା ବ୍ୟତୀତ ଲକ୍ଡାଉନ ଓ ନାଇଟ କର୍ଫ୍ୟୁ ଜାରି ହୋଇଛି। ଗତବର୍ଷ ୟୁକେରେ ବହୁଦିନ ଧରି ଲକ୍ଡାଉନ ଲାଗୁ କରାଯାଇଥିଲା। ସେତେବେଳେ ମନେହେଉଥିଲା ବହୁଦିନ ଧରି ଆଉ କ୍ରିକେଟ ସମ୍ଭବ ନୁହେଁ। ଯେତେବେଳେ ଲକ୍ଡାଉନ ହଟିଲା ସେତେବେଳେ ଆମେ ପ୍ରଥମେ ଟିଭିରେ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡରେ ଖେଳ ଦେଖିବାକୁ ମିଳିଥିଲା। ଏହାଥିଲା ରଗ୍ବୀ ୟୁନିୟନ ଲିଗ୍। ପରେ କ୍ରମେ ବୁନ୍ଦେସ୍ଲିଗା ଓ ପ୍ରିମିୟର ଲିଗ୍ ଆରମ୍ଭ ହୋଇଥିଲା। ଏଥିରୁ ସ୍ପଷ୍ଟ ସୂଚିତ ହୋଇଥିଲା ଯେ କୌଣସି ଦେଶରେ ସମ୍ପୂର୍ଣ୍ଣ ଲକ୍ଡାଉନ୍ ବେଳେ ମଧ୍ୟ ଖେଳ ସମ୍ଭବ। କିନ୍ତୁ ଏଥିପ୍ରତି ମଧ୍ୟ ନଜର ଦେବାକୁ ହେବ ଯେ ଲୋକେ ଏହାକୁ ଠିକ୍ ଭାବେ ଗ୍ରହଣ କରୁଛନ୍ତି କି ନା।
