ନୂଆଦିଲ୍ଲୀ,୧୧।୧୨ : ଜି-୭ ଦେଶ ଏବଂ ସେମାନଙ୍କର ସହଯୋଗୀମାନଙ୍କ ପକ୍ଷରୁ ରୁଷିଆ ତୈଳ ଉପରେ ଲଗାଯାଇଥିବା କଟକଣାକୁ ଭାରତ ସମର୍ଥନ କରିବାକୁ ମନା କରିଛି। ରୁଷିଆର ତୈଳ ଉପରେ ପ୍ରାଇସ କ୍ୟାପ୍ ନ ଲଗାଇବାକୁ ଭାରତର ନିଷ୍ପତ୍ତିକୁ ରୁଷିଆ ସୱାଗତ କରିଛି। ରୁଷିଆର ଉପ ପ୍ରଧାନମନ୍ତ୍ରୀ ଆଲେକ୍ସଜାଣ୍ଡାର୍ ନୋଭାକ ରୁଷିଆରେ ଥିବା ଭାରତୀୟ ରାଷ୍ଟ୍ରଦୂତ ପଓ୍ବନ କପୁରଙ୍କ ସହ ସାକ୍ଷାତ ସମୟରେ ଏହି ସୂଚନା ଦେଇଛନ୍ତି।
ରୁଷିଆର ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛନ୍ତି ଯେ ଉପ-ପ୍ରଧାନମନ୍ତ୍ରୀ ରୁଷ ତେଲ ଉପରେ ପ୍ରାଇସ୍ କ୍ୟାପ ଲଗାଇବାକୁ ସମର୍ଥନ ନକରିଥିବା ଭାରତର ନିଷ୍ପତ୍ତିକୁ ସ୍ବାଗତ କରିଛନ୍ତି, ଯାହାକି ଡିସେମ୍ବର ୭ରେ ଜି-୭ ଦେଶ ଏବଂ ସେମାନଙ୍କ ସହଯୋଗୀମାନଙ୍କ ଦ୍ୱାରା ଘୋଷଣା କରାଯାଇଥିଲା। ଏହାପୂର୍ବରୁ ସେପ୍ଟେମ୍ବର ମାସରେ ଜି- ୭ ଦେଶ ରୁଷିଆରୁ ତୈଳ ଆମଦାନୀ ଉପରେ ପ୍ରାଇସ୍ କ୍ୟାପ ଲଗାଇବାକୁ ରାଜି ହୋଇଥିଲେ।
ବିବୃତ୍ତି ଅନୁଯାୟୀ ନୋଭାକ କହିଛନ୍ତି ଯେ ଶକ୍ତି ସଙ୍କଟ ମଧ୍ୟରେ ଶକ୍ତି ସମ୍ବଳ ଯୋଗାଣ ଏବଂ ପୂର୍ବ-ଦକ୍ଷିଣ ଦେଶକୁ ଶକ୍ତି ରପ୍ତାନି ପାଇଁ ରୁଷିଆ ନିଜରଦାୟିତ୍ୱକୁ ପାଳନ କରୁଛି। ରୁଷିଆ ବୈଦେଶିକ ମନ୍ତ୍ରଣାଳୟର ବିବୃତ୍ତିରେ କୁହାଯାଇଛି ଯେ, ୨୦୨୨ ବର୍ଷର ପ୍ରଥମ ଆଠ ମାସରେ, ଭାରତକୁ ରୁଷିଆର ତେଲ ଆମଦାନୀ ୧୬.୩୫ ମିଲିୟନ ଟନ କୁ ବୃଦ୍ଧି ପାଇଛି। ସୂଚନାଯୋଗ୍ୟ, ୟୁକ୍ରେନ ଯୁଦ୍ଧ ସତ୍ତ୍ୱେ ଭାରତ ରୁଷିଆରୁ ତେଲ ଆମଦାନି ଜାରି ରଖିଥିଲା ।
ଚଳିତ ବର୍ଷ ଗ୍ରୀଷ୍ମ ସମୟରେ ରୁଷିଆ ଭାରତକୁ ତୈଳ ଯୋଗାଣ କ୍ଷେତ୍ରରେ ଦ୍ୱିତୀୟ ସ୍ଥାନରେ ଥିଲା। ଏଥିସହ ରୁଷିଆରୁ ତୈଳଜାତ ଦ୍ରବ୍ୟ ଏବଂ କୋଇଲା ଯୋଗାଣରେ ମଧ୍ୟ ବୃଦ୍ଧି ଘଟିଛି।
ଭାରତୀୟ ରାଷ୍ଟ୍ରଦୂତ ପଓ୍ବନ କପୁରଙ୍କ ସହ ଏକ ସାକ୍ଷାତକାରରେ ନୋଭାକ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ହାର୍ଦ୍ଦିକ ସିଂ ପୁରୀଙ୍କୁ ଅନ୍ତର୍ଜାତୀୟ ଫୋରମ ’ରୁଷିଆ ଶକ୍ତି ସପ୍ତାହ ୨୦୨୩’ ରେ ଭାଗ ନେବାକୁ ଆମନ୍ତ୍ରଣ କରିଛନ୍ତି। ଆସନ୍ତା ବର୍ଷ ଅକ୍ଟୋବର ୧୧-୧୨ରେ ମସ୍କୋରେ ଏହା ଅନୁଷ୍ଠିତ ହେବ।
