ଭୁବନେଶ୍ୱର, ୨୯।୫ (ବ୍ୟୁରୋ): ସୋମବାର ସାବିତ୍ରୀ ବ୍ରତ। ମହିଳାମାନେ ସ୍ବାମୀଙ୍କ ମଙ୍ଗଳ ମନାସି ଠାକୁରଙ୍କ ନିକଟରେ ସାତ ଫଳ ଭୋଗ କରି ପୂଜା କରିବେ। ତେଣୁ ଫଳବଜାରେ ପ୍ରବଳ ଭିଡ଼ ଦେଖିବାକୁ ମିଳୁଛି। ଗ୍ରାହକଙ୍କ ଚାହିଦାକୁ ଦେଖି ଫଳ ଦର ମଧ୍ୟ ଆକାଶ ଛୁଆଁ ହୋଇଛି। ବିଶେଷ କରି ଭୁବଶ୍ୱେରର ୟୁନିଟ୍-୧, ୟୁନିଟ୍-୨, ୟୁନିଟ୍-୪ ବଜାର ସମେତ ରାଜମହଲ, ଆଜାଦ୍ ମାର୍ଗ, ଗୋପବନ୍ଧୁ ଛକ ଆଦି ସ୍ଥାନରେ ଥିବା ଫଳ ଦୋକାନରେ ଶନିବାର ଦିନ ତମାମ ଭିଡ଼ ଲାଗି ରହିଥିଲା। ଖରାଦିନିଆ ଫଳ ଆମ୍ବ, ପଣସ, ଖଜୁରି, ଲିଚୁ, ତାଳ, କଦଳୀ, ସପୁରି ଆଦିର ବିଶେଷ ଚାହିଦା ରହିଥିବାବେଳେ ସେଓ, ଅଙ୍ଗୁର, ତରଭୁଜ ଆଦି ମଧ୍ୟ ଯଥେଷ୍ଟ ପରିମାଣରେ ବଜାରରେ ଉପଲବ୍ଧ ହେଉଛି। ତେବେ ବାଇଗଣପଲେଇ, ଲେଙ୍ଗଡା, ଆମ୍ରପାଲି ଆମ୍ବ କିଲୋ ପିଛା ୮୦ଟଙ୍କା ଥିବାବେଳେ ସୁନ୍ଦରୀ ଆମ୍ବର ଦର ୧୦୦ଟଙ୍କା ଡ଼େଇଁଛି। ସେହିପରି ଛୋଟ ପଣସ ଗୋଟିକୁ ୨୦୦ ଟଙ୍କା ଓ ବଡ଼ ପଣସ ୩୦୦ରୁ ଅଧିକ ଟଙ୍କାରେ ବିକ୍ରି ହେଉଛି। ଲିଚୁ ଦର କେଜି ପ୍ରତି ୧୦୦ ଟଙ୍କାରୁ ଆରମ୍ଭ କରି ୧୬୦ ଟଙ୍କା ପର୍ଯ୍ୟନ୍ତ ରହିଛି। ଡାଳିମ୍ବ ୨୨୦ରୁ ୨୪୦ଟଙ୍କା, ଅଙ୍ଗୁର ୧୨୦ରୁ ୧୪୦ ଟଙ୍କା, ଖଜୁରି ପେନ୍ଥାକୁ ୩୦ଟଙ୍କା ରହିଛି। ୬୦ ଟଙ୍କାରେ ବିକ୍ରି ହେଉଥିବା କଦଳୀ ଡଜନ ଏବେ ୧୦୦ ଟଙ୍କା ଟପିଛି। ସେହିପରି ଛୋଟ ସେଓର ଦାମ୍ କେଜି ପ୍ରତି ୧୬୦ ଟଙ୍କା ରହିଥିବାବେଳେ ବଡ଼ ଦାମ୍ ୨୦୦ରୁ ଅଧିକ ରହିଛି। ତରଭୁଜ କେଜି ୨୫ଟଙ୍କା, ପିଜୁଳି ୪୦ ଟଙ୍କା, ସପୁରି ଗୋଟିକୁ ୫୦ ଟଙ୍କା ବିକ୍ରି ହେଉଥିବାବେଳେ କମଳା, ତାଳ, ନଡ଼ିଆ ଅଙ୍ଗୁରକୁ ମଧ୍ୟ ଗ୍ରାହକ ଚଢ଼ା ଦରରେ କିଣୁଛନ୍ତି। ବଡ଼ ବଡ଼ ଫଳ ବଜାରରକୁ ବାଦ ଦେଲେ ଖୁଚୁରା ବ୍ୟବସାୟୀ ଆହୁରି ଅଧିକ ଦାମରେ ଫଳ ବିକୁଛନ୍ତି। ଏହାର ପ୍ରଭାବ ସିଧାସଳଖ ଗ୍ରାହକଙ୍କ ପକେଟ୍ ଉପରେ ପଡ଼ୁଛି।
ରାଜମହଲ ଛକକୁ ଫଳ କିଣିବାକୁ ଆସିଥିବା ଗ୍ରାହକ ପୂଜା ବରିହା କୁହନ୍ତି, ବର୍ଷକୁ ଥରେ ସାବିତ୍ରୀ ବ୍ରତ। ସାତ ପ୍ରକାର ଫଳ ତ ପୂଜା କରିବାକୁ ପଡ଼ିବ। ଯେତେ ଦର ହେଲେ ବି କିଣିବାକୁ ପଡ଼ିବ। ଯଦିଓ ଦାମ୍ ଅଧିକ ରହିଛି, କିନ୍ତୁ ରାଜଧାନୀ ବଜାରରେ ମନ ପସନ୍ଦର ଯେକୌଣସି ଫଳ ମିଳିଯାଉଛି। ସେହିପରି ବ୍ୟବସାୟୀ ପ୍ରଫୁଲ୍ଲ ବେହେରା କୁହନ୍ତି, ରଜ ସାବିତ୍ରୀ ସମୟରେ ପ୍ରତିବର୍ଷ ଚଢ଼ା ଦରରେ ଫଳ ବିକ୍ରି ହୁଏ। ଚଳିତ ଥର ଫଳର ଦାମ୍ ସେତେ ବୃଦ୍ଧି ପାଇନାହିଁ। ସାବିତ୍ରୀ ଥିବାରୁ କେତେକ ଫଳରେ ୫/୬ଟଙ୍କା ବୃଦ୍ଧି ପାଇଛି। ପୂର୍ବବର୍ଷ ତୁଳନାରେ ଏଥର ବିକ୍ରି କମ୍ ହେଉଥିବାରୁ ଆମକୁ କ୍ଷତି ସହିବାକୁ ପଡୁଛି ବୋଲି ସେ କହିଛନ୍ତି।
