ଫୁଲବାଣୀ ଅଫିସ, ୧୩।୧୨ବଣ, ପାହାଡ ଘେରା କନ୍ଧମାଳ ଜିଲାର ଶତାଧିକ ଗ୍ରାମକୁ ଆଜି ପର୍ଯ୍ୟନ୍ତ ସବୁଦିନିଆ ରାସ୍ତା ନିର୍ମାଣ ହୋଇ ପାରିନାହିଁ। ଫଳରେ ଦୁର୍ଗମ ଅଞ୍ଚଳର ଲୋକେ ବର୍ଷର ଅଧିକାଂଶ ସମୟ ବାହ୍ୟ ଜଗତରୁ ବିଚ୍ଛିନ୍ନ ହୋଇ ରହୁଛନ୍ତି। ରୋଗୀଙ୍କୁ ଦୋଳାରେ ବୋହି ଡାକ୍ତରଖାନାରେ ପହଞ୍ଚାଇବା, ଗର୍ଭବତୀଙ୍କୁ ଭରା ନଈରେ ପାର କରିବା ଆଦି ଜିଲାରେ ସାଧାରଣ ଘଟଣାରେ ପରିଣତ ହୋଇଛି। ସରକାରୀ ସୂଚନା ଅନୁସାରେ, ଜିଲାର ୩୩୪ଟି ଗ୍ରାମକୁ ଏ ଯାଏ ରାସ୍ତା ନାହିଁ । ତେବେ ଏସବୁ ଦୁର୍ଗମ ଅଞ୍ଚଳବାସୀଙ୍କ ଭାଗ୍ୟ ବଦଳିବାକୁ ଯାଉଛି। ରାସ୍ତା ନିର୍ମାଣ ପାଇଁ ସର୍ଭେ କାର୍ଯ୍ୟ ଶେଷ ହେବା ପରେ ଟେଣ୍ଡର ଡକାସରିଛି । ଖୁବ୍ କମ୍ ଦିନ ମଧ୍ୟେରେ କାମ ଆରମ୍ଭ ହେବ ା ଉପାନ୍ତ ଅଞ୍ଚଳରେ ବସବାସ କରୁଥିବା ବହୁ ଗ୍ରାମବାସୀଙ୍କ ପ୍ର୍ରମୁଖ ମୌଳିିକ ସମସ୍ୟା ରାସ୍ତା କାର୍ଯ୍ୟ ହେବାକୁ ଯାଉ ଥିବାରୁ ସେମାନଙ୍କ ମନରେ ନୂଆ ଆଶା ସଞ୍ଚାର ହୋଇଛି।
ଜିଲାର ଅତି ଦୁର୍ଗମ ତଥା ମାଓବାଦୀ ପ୍ରବଣ ଭାବେ ପରିଚିତ ଫିରିଙ୍ଗିଆ ବ୍ଲ୍ଳକର ବିଭିନ୍ନ ଦୁର୍ଗମ ଅଞ୍ଚଳକୁ ରାସ୍ତା ସଂଯୋଗୀକରଣ ପାଇଁ ୩୪ଟି ପ୍ରକଳ୍ପର ସର୍ଭେ ସରିଛି। ଏଥିମଧ୍ୟରୁ କେତେକ ପ୍ରକଳ୍ପ ପାଇଁ ଟେଣ୍ଡର ପ୍ରକ୍ରିୟା ବି ଆରମ୍ଭ ହୋଇ ସାରିଛି। ପ୍ରକୃତପକ୍ଷେ ପ୍ରାୟ ୨ ବର୍ଷ ତଳେ ଏହି ଯୋଜନା ହାତକୁ ନିଆ ଯାଇଥିଲା। କିନ୍ତୁ କରୋନା କାରଣରୁ ପ୍ରକ୍ରିୟା ବିଳମ୍ବିତ ହୋଇଥିଲା। ଗ୍ରାମ୍ୟ ନିର୍ମାଣ ବିଭାଜନ(ଆରଡି) ପକ୍ଷରୁ ସର୍ଭେ ଶେଷ ହେବା ପରେ ଟେଣ୍ଡର ସରି କାର୍ଯ୍ୟ ପ୍ରକ୍ରିୟା ଆରମ୍ଭ ହୋଇଛି ା ସରକାରୀ ରିପୋର୍ଟ ଅନୁସାରେ ଫିରିଙ୍ଗିଆ ଜିଲାର ଦ୍ୱିତୀୟ ବୃହତମ ବ୍ଲକ । ଏହି ବ୍ଲକରେ ସର୍ବାଧିକ ୧୧୨ଟି ଗ୍ରାମକୁ ଯାତାୟତ ପାଇଁ କୌଣସି ପ୍ରକାର ସୁବିଧା ନ ଥିବା ଯୋଗୁଁ ଏହି ସବୁ ଗ୍ରାମଗୁଡିକରେ ଶିକ୍ଷା, ସ୍ବାସ୍ଥ୍ୟ ସେବା ଭଳି ବହୁ ସରକାରୀ ଯୋଜନା ପହଞ୍ଚାଇବା ସମ୍ଭବ ହୋଇ ପାରୁନାହିଁ। ବ୍ଲକରେ ଅନେକ ନଦୀ ଓ ନାଳ ରହିଛି। ବିଶେଷ କରି ବାଘନଦୀ ଓ କେଡ଼ିଜୋଡ଼ି ନାଳ ଯୋଗୁ ବର୍ଷାଦିନରେ ଅନେକ ଗ୍ରାମ ବିଛିନ୍ନ ହୋଇ ପଡୁଛି। ଗ୍ରାମ୍ୟ ନିର୍ମାଣ ବିଭାଜନ ପକ୍ଷରୁ ଫିରିଙ୍ଗିଆ ବ୍ଲକ ସଲାଗୁଡା ପଞ୍ଚାୟତର ବାଣିଜୁରି ଠାରୁ ମାଣ୍ଡିବାଲା ଭାୟା ଟିକିରିପଡା-ମୁର୍ଜା ଗାଁ ରାସ୍ତା ପାଇଁ ପାଖାପାଖି ୩ କୋଟି ଟଙ୍କାର ଟେଣ୍ଡର ପ୍ରକ୍ରିୟା ଚାଲୁରହିଛି। ଲୁଇସିଂ ଠାରୁ ମାଲାକାରି ଭାୟା କୁମ୍ବାରୁ ରାସ୍ତା ପାଇଁ ୪ କୋଟି ୨୧ ଲକ୍ଷ ୫୭ ହଜାର ଟଙ୍କା, ମୁଣ୍ଡାସାହି ଠାରୁ କାଟ୍ରାମାଲା ରାସ୍ତା ପାଇଁ ୪ କୋଟି ୨୧ ଲକ୍ଷ ୯୦ ହଜାର ଟଙ୍କା ବ୍ୟୟ ଅଟକଳ ହୋଇଛି। ଏହି ସବୁ ରାସ୍ତା ନିର୍ମାଣ ହେଲେ ବ୍ଲକର ଗୋଛାପଡା, ଲୁଇସିଂ, ବାଲନ୍ଦାପଡା, ସଲାଗୁଡା, କ୍ରାଣ୍ଡିବାଲି ଓ କୋଏରମାଣ୍ଡୁ ପଂଚାୟତର ବହୁ ବିଚ୍ଛିନାଞ୍ଚଳକୁ ସବୁଦିନିଆ ଯାତାୟତ ସମ୍ଭବ ହେଇପାରିବ। ସେହିପରି ମାଓବାଦୀ ପ୍ରବଣ ଅଞ୍ଚଳ କୁଟିକିଆ ଠାରୁ ସୁମେରବନ୍ଧ ଭାୟା ମାଜାବାଲି ପାଇଁ ପାଖା ପାଖି ୩ କୋଟି ଟଙ୍କା ଓ କଟାପଙ୍ଗା ଠାରୁ ସୁମେରବନ୍ଧ ପର୍ଯନ୍ତ ପ୍ରାୟ ୫ କୋଟି ଟଙ୍କାର ଟେଣ୍ଡର ପ୍ରକ୍ରିୟା ଆରମ୍ଭ ହୋଇଛି। ଏହି ରାସ୍ତା ସମ୍ୂର୍ଣ୍ଣ ହେଲେ ଦୁର୍ଗମ ଅଞ୍ଚଳରୁ ଜିଲା ସଦର ମହକୁମାକୁ ରାସ୍ତା ଫିଟିବ। ବିଭିନ୍ନ ପଞ୍ଚାୟତକୁ ମଧ୍ୟ ସଂଯୋଗୀକରଣ ହୋଇପାରିବ। ଜିଲାର ଆଉ ୨୭ ପ୍ରକଳ୍ପ ପାଇଁ ମଧ୍ୟ ସରକାରଙ୍କ ପକ୍ଷରୁ ସର୍ଭେ କରାଯାଇଛି। ଯଥାଶୀଘ୍ର ସର୍ଭେ ହୋଇଥିବା ପ୍ରକଳ୍ପ ପାଇଁ ଟେଣ୍ଡର ପ୍ରକାଶ ପାଇବ ବୋଲି ଫୁଲବାଣୀ ଗ୍ରାମ୍ୟ ଉନ୍ନୟନ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ସୁଶିଲ କୁମାର ମହାନ୍ତି ପ୍ରକାଶ କରିଛନ୍ତି।
