ଚଣ୍ଡିଗଡ଼,୮।୪ : କଂଗ୍ରେସ ନେତା ନବଜୋତ ସିଂ ସିଦ୍ଧୁ ଜେଲରୁ ବାହାରିବା ପରେ ପଞ୍ଜାବ କଂଗ୍ରେସର ଆଭ୍ୟନ୍ତରୀଣ ରାଜନୀତି ପୁଣି ସରଗରମ ହେବାରେ ଲାଗିଛି। ପୂର୍ବତନ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ଭାଜପାରେ ଯୋଗଦେବେ ବୋଲି କଳ୍ପନାଜଳ୍ପନା ପ୍ରକାଶ ପାଇଛି। କାରଣ ଚନ୍ନି କିଛି ଦିନ ମଧ୍ୟରେ ପଞ୍ଜାବରେ କେତେକ ଭାଜପା ନେତାଙ୍କୁ ଭେଟିଥିବା ନେଇ ଚର୍ଚ୍ଚା ହେଉଛି। ୨୦୨୨ ପଞ୍ଜାବ ବିଧାନସଭା ନିର୍ବାଚନରେ କଂଗ୍ରେସର ଶୋଚନୀୟ ପରାଜୟ ପରେ ଚନ୍ନି ରାଜନୈତିକ ଦୃଶ୍ୟପଟ୍ଟରୁ ଅଦୃଶ୍ୟ ହୋଇଯାଇଥିଲେ। ଅପରପକ୍ଷେ ଦୁର୍ନୀତି ମାମଲାରେ ଜ୍ୱାଇଁ ଗିରଫ ହେବା ପରେ ମଧ୍ୟ ଚନ୍ନିଙ୍କୁ ସମାଲୋଚନାର ସମ୍ମୁଖୀନ ହେବାକୁ ପଡିଥିଲା। ତେବେ ପଞ୍ଜାବୀ ଗାୟକ ତଥା କଂଗ୍ରେସ ନେତା ସ୍ବର୍ଗତ ସିଦ୍ଧୁ ମୁସାୱାଲାଙ୍କ ଗ୍ରାମକୁ ଚନ୍ନିଙ୍କ ପରିଦର୍ଶନ ସୂଚନା ଦେଇଥିଲା ଯେ, ପୂର୍ବତନ ମୁଖ୍ୟମନ୍ତ୍ରୀ ପୁଣି ରାଜ୍ୟ ରାଜନୀତିରେ ସକ୍ରିୟ ହେବା ଆରମ୍ଭ କରିଛନ୍ତି। ରାହୁଲ ଗାନ୍ଧୀ ବିଦେଶ ଗସ୍ତରୁ ଫେରିବା ପରେ ଚନ୍ନି ରାଜସ୍ଥାନରେ ତାଙ୍କର ଭାରତ ଯୋଡ଼ୋ ଯାତ୍ରାରେ ମଧ୍ୟ ନଜର ଆସିଥିଲେ। ସେ ପ୍ରିୟଙ୍କା ଗାନ୍ଧୀ ଭଦ୍ରା ଏବଂ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କୁ ମଧ୍ୟ ଭେଟିଥିଲେ। ତେବେ ସିଦ୍ଧୁଙ୍କୁ ନେଇ ଏବେ ଚନ୍ନି ଦଳରେ ଅସୁରକ୍ଷିତ ଆଶଙ୍କା କରୁଛନ୍ତି ବୋଲି ଚର୍ଚ୍ଚା ହେଉଛି।
