ବେଜିଂ,୨୫ ।୩: ବ୍ରାଜିଲର ପୂର୍ବତନ ରାଷ୍ଟ୍ରପତି ଡିଲମା ରୁସେଫ ଶୁକ୍ରବାର ନ୍ୟୁ ଡେଭଲପମେଣ୍ଟ ବ୍ୟାଙ୍କ୍(ଏନଡିବି)ର ନୂଆ ମୁଖ୍ୟ ନିର୍ବାଚିତ ହୋଇଛନ୍ତି । ଏନଡିବି ବ୍ରିକ୍ସ ଦେଶ(ବ୍ରାଜିଲ, ଭାରତ, ରୁଷିଆ, ଚାଇନା ଓ ଦକ୍ଷିଣ ଆଫ୍ରିକା) ଦ୍ୱାରା ସ୍ଥାପିତ ଏକ ବିତ୍ତିୟ ସଂସ୍ଥା, ଯାହା ବ୍ରିକ୍ସ ବ୍ୟାଙ୍କ ନାମରେ ପରିଚିତ ।
୭୫ ବର୍ଷିୟ ରୁସେଫ ମାର୍କେସ ଟ୍ରାୟଜୋଙ୍କ ସ୍ଥାନ ନେବେ । ଏହାର ଘୋଷଣା ସାଂଘାଇ ମୁଖ୍ୟାଳୟରେ ଥିବା ବ୍ୟାଙ୍କ କରିଛି । ବ୍ୟାଙ୍କ ପକ୍ଷରୁ ଜାରି ଏକ ପ୍ରେସ ବିଜ୍ଞପ୍ତିରେ କୁହାଯାଇଛି ବି ଏନଡିବିର ବୋର୍ଡ ଅଫ ଗଭର୍ନର୍ସ ସର୍ବସମ୍ମତିରେ ରୁସେଫଙ୍କୁ ତତ୍କାଳ ପ୍ରଭାବରେ ବ୍ୟାଙ୍କର ଅଧ୍ୟକ୍ଷ ନିର୍ବାଚିତ କରିଛନ୍ତି । ରୁସେଫ ବର୍ତ୍ତମାନ ବ୍ରାଜିଲର ରାଷ୍ଟ୍ରପତି ଲୁଲା ଡା ସିଲ୍ଭାଙ୍କ ନିକଟତମ ସହଯୋଗୀ, ଯେକି ଗତବର୍ଷ ଅକ୍ଟୋବରରେ ହୋଇଥିବା ନିର୍ବାଚନରେ ଜାୟର ବୋଲସୋନାରୋଙ୍କୁ ହରାଇଥିଲେ । ରୁସେଫ ଦୁଇଥର ବ୍ରାଜିଲ ରାଷ୍ଟପତି ଭାବେ ନିର୍ବାଚିତ ହୋଇଥିଲେ । ହେଲେ ୨୦୧୬ରେ ବଜେଟରେ ହେରଫେର ଅଭିଯୋଗରେ ତାଙ୍କୁ ପଦରୁ ହଟାଇ ଦିଆଯାଇଥିଲା । ସେ ତାଙ୍କ ଉପରେ ଲାଗିଥିବା ସମସ୍ତ ଅଭିଯୋଗକୁ ଖାରଜ କରିଦେଇଥିଲେ । ଜୁଲାଇ ୨୦୧୪ରେ ସେ ଏନଡିବିର ସ୍ଥାପନାରେ ବ୍ରିକ୍ସ ଦେଶ ସହ ଭାଗ ନେଇଥିଲେ ।
