ଭୁବନେଶ୍ୱର,୧୬।୫ (ବ୍ୟୁରୋ): ରାଜଧାନୀରେ ସବୁଆଡ଼େ ଚାଲିଛି ସୌନ୍ଦର୍ଯ୍ୟକରଣ। କିନ୍ତୁ ରାଜଧାନୀର ପ୍ରମୁଖ ସ୍ଥାନ ମାଷ୍ଟରକ୍ୟାଣ୍ଟିନ୍ ଛକ ସ୍ଥିତ ୨ ବିଶିଷ୍ଟ ବ୍ୟକ୍ତିଙ୍କ ପ୍ରତିର୍ମୂିସ୍ଥଳ ଅବହେଳିତ ହୋଇ ପଡ଼ିଛି। ଏହି ସ୍ଥାନରେ ରାଜନେତା ଲୋକନାୟକ ଜୟପ୍ରକାଶ ନାରାୟଣ ପାର୍କ ଓ ଦେଶର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁ ପାର୍କ ସ୍ଥାପନ ହୋଇଥିଲା। ପାର୍କର ସୌନ୍ଦର୍ଯ୍ୟକରଣ ପାଇଁ ଆବଶ୍ୟକୀୟ ସରଞ୍ଜାମ ସହିତ ଏଠାରେ ଦୁଇ ବିଶିଷ୍ଟ ବ୍ୟକ୍ତିଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇଥିଲା। ମାତ୍ର ଏବେ ଏହି ସ୍ଥାନ ଅନାବନା ଗଛର ଜଙ୍ଗଲ ଭାବେ ପରିଣତ ହୋଇଛି। ମାଷ୍ଟରକ୍ୟାଣ୍ଟିନରେ ହେବାକୁ ଥିବା ବହୁ ପ୍ରତୀକ୍ଷିତ ମଲ୍ଟିମୋଡ଼ାଲ ହବ୍ ପ୍ରକଳ୍ପ ଅଧିନରେ ସ୍ଥାନୀୟ ଅଞ୍ଚଳରୁ ପାର୍କକୁ ଉଚ୍ଛେଦ କରାଯାଇଛି। ଏହି କ୍ରମରେ ଉଭୟ ପାର୍କରେ ଲାଗିଥିବା ଗଛଗୁଡ଼ିକ ସ୍ଥାନାନ୍ତରିତ କରାଯାଇଛି। ସହରର ବିଭିନ୍ନ ପାର୍କରେ ଗଛ ଓ ଅନ୍ୟାନ୍ୟ ସୌନ୍ଦର୍ଯ୍ୟକରଣ ଜିନିଷ ସ୍ଥାପନ କରାଯାଇ ଥିବାବେଳେ ଉଭୟଙ୍କ ପ୍ରତିମୂର୍ତ୍ତି ସ୍ଥାନାନ୍ତରଣ ପାଇଁ ସ୍ଥାନ ଚିହ୍ନଟ କରାଯାଇ ପାରିନାହିଁ। ଫଳରେ ଉଚ୍ଛେଦକୁ ୨ବର୍ଷରୁ ଅଧିକ ସମୟ ବିତିଥିଲେ ମଧ୍ୟ ଉଭୟଙ୍କ ପ୍ରତିମୂର୍ତ୍ତି ଏକପ୍ରକାର ଅଣଦେଖା ହୋଇ ପଡି ରହିଛି। ପ୍ରତିମୂର୍ତ୍ତି ଓ ଏହାର ଚାରିପାଖ ସଫା ହେଉନାହିଁ। ଆବର୍ଜନାରେ ଭର୍ତ୍ତି ହୋଇ ରହିଛି। ନିକଟରେ ଥିବା ଐତିହ୍ୟ ଘୋଡ଼ାର ମରାମତି କରାଯାଇଥିଲେ ମଧ୍ୟ ୨ବିଶିଷ୍ଟ ବ୍ୟକ୍ତିଙ୍କ ପ୍ରତିମୂର୍ତ୍ତି ସ୍ଥଳ ପ୍ରଶାସନର ଦୃଷ୍ଟିକୁ ଆସୁନାହିଁ। ନିକଟରେ ରେଳଷ୍ଟେସନ ଥିବାରୁ ପ୍ରତିଦିନ ଏଠାକୁ ଯାତାୟାତ କରୁଥିବା ଯାତ୍ରୀଙ୍କ ନଜର ଏହି ବରପୁତ୍ରଙ୍କ ଉପରେ ପଡ଼ୁଛି। ମାତ୍ର ଏହାର ରକ୍ଷଣାବେକ୍ଷଣ ବାବଦରେ ବିଭାଗୀୟ କତ୍ତର୍ର୍ୃପକ୍ଷ ପଦକ୍ଷେପ ନ ନେବା ସ୍ଥାନୀୟ ଲୋକଙ୍କୁ ଆଶ୍ଚର୍ଯ୍ୟ କରିଛି। ଗୋଟିଏ ପଟରେ ସହରର ସୌନ୍ଦର୍ଯ୍ୟକରଣ ବାବଦରେ କୋଟି କୋଟି ଟଙ୍କା ବ୍ୟୟ ହେଉଥିବା ବେଳେ ଜନଗହଳିପୂର୍ଣ୍ଣ ରାସ୍ତାରେ ଥିବା ପ୍ରତିମୂର୍ତ୍ତିଙ୍କ ଏପରି ଅବ୍ୟବସ୍ଥା ପ୍ରଶ୍ନବାଚୀ ସୃଷ୍ଟି କରିଛି।
