ଗୁଣପୁର,୩ା୨(ଡି.ଏନ.ଏ.): ଦେଢ଼ବର୍ଷ ଧରି ରାୟଗଡ଼ା ଜିଲା ଗୁଣପୁର ଅଞ୍ଚଳରେ ହାତୀପଲର ଦୌରାତ୍ମ୍ୟ ଚାଲିଛି। ଏଥିରେ ବ୍ୟାପକ ଫସଲ ହାନୀ ହେବା ସହ ୩ ଜଣଙ୍କ ଜୀବନ ଗଲାଣି। ଦୁଇଦିନ ହେଲା ୬ଟିକିଆ ହାତୀପଲ ଗଜପତି ଜିଲା ସୀମାନ୍ତ କାଶୀନଗର ବ୍ଲକର ଅମରଡା, ଫୁଲୁଗୁମି ଅଞ୍ଚଳକୁ ଚାଲିଯାଇଛନ୍ତି। ସେଠାରେ ମଧ୍ୟ ବ୍ୟାପକ ଫସଲହାନୀ ଘଟାଇଛନ୍ତି। ହାତୀପଲକୁ ଘଉଡ଼ାଇବା ପାଇଁ ରାୟଗଡ଼ା ବନ ବିଭାଗ ପକ୍ଷରୁ ଦିନରାତି ଏକ କରି ଉଦ୍ୟମ ଚାଲିଛି। ହେଲେ ଏଥିରେ ସଫଳତା ମିଳିନାହିଁ। ଅନ୍ୟପକ୍ଷରେ ଗଜପତି ଜିଲା ବନ କର୍ମଚାରୀ ରାୟଗଡ଼ା ସୀମାକୁ ହାତୀପଲ ଘଉଡ଼ାଇବାକୁ କେନ୍ଦ୍ରକରି ବୁଧବାର ରାତିରେ ଉଭୟ ଜିଲାର ବନ କର୍ମଚାରୀଙ୍କ ମଧ୍ୟରେ ଗଣ୍ଡଗୋଳ ଏବଂ ହାତାହାତି ପରିସ୍ଥିତି ଉପୁଜିଥିଲା। ଧନ ଓ ଜୀବନର ସୁରକ୍ଷା ବଦଳରେ ଦୁଇ ଜିଲାର ବନ କର୍ମଚାରୀଙ୍କ ଏଭଳି ଆଚରଣକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ଗଜପତି ଜିଲା ଲାଖାରୀ ଅଭୟରଣ୍ୟରୁ ୬ଟିକିଆ ହାତୀପଲ ଦେଢ଼ ବର୍ଷ ତଳେ ଖାଦ୍ୟ ଅନ୍ବେଷଣରେ ରାୟଗଡ଼ା ଜିଲାର ପଦ୍ମପୁର ଅଞ୍ଚଳକୁ ଚାଲି ଆସିଥିଲେ। ଏବେ ଗଜପତି ଜିଲାରେ ରହି ଫସଲ ନଷ୍ଟ କରିବାରୁ ସେଠାକାର ଶତାଧିକ ଲୋକ ଘଉଡ଼ାଇବାକୁ ଉଦ୍ୟମ ଚଳାଇଛନ୍ତି। ଗଜପତି ଜିଲା ବନବିଭାଗ ମଧ୍ୟ ଦୁଇଦିନ ହେଲା ଉଦ୍ୟମ ଚଳାଇଛି। ହେଲେ ସୀମାନ୍ତରୁ ହାତୀପଲକୁ ପୁଣି ରାୟଗଡ଼ା ମୁହାଁ କରିବାକୁ ଗଜପତି ବନ ବିଭାଗ ଉଦ୍ୟମ କରିବା ସହ ହାତୀପଲକୁ ନିଜ ଅଞ୍ଚଳକୁ ନେବା ପାଇଁ ରାୟଗଡ଼ା ବନ ବିଭାଗକୁ ବାଧ୍ୟ କରୁଛି। ଏହାକୁ ନେଇ ରାତିରେ ନାଉଡ଼ା ଗ୍ରାମ ନିକଟରେ ଗଣ୍ଡଗୋଳ ହୋଇଥିଲା। ହାତୀକୁ ନେଇ ଉଭୟ ଜିଲାର ବନ ବିଭାଗ ମଧ୍ୟରେ ବିବାଦ ବଢ଼ୁଛି। ଅଭାବନୀୟ ପରିସ୍ଥିତି ନେଇ ଉଭୟ ଜିଲାର ଡିଏଫଓଙ୍କ ନିକଟରେ କର୍ମଚାରୀମାନେ ଅବଗତ କରାଇଛନ୍ତି। ହାତୀପଲକୁ ଗନ୍ତବ୍ୟସ୍ଥଳରେ ପହଞ୍ଚାଇବା ଏବେ ଜରୁରୀ ହୋଇପଡ଼ିଛି। ଉଭୟ ଜିଲାର ଜିଲାପାଳ, ଉଚ୍ଚ କର୍ତ୍ତୃପକ୍ଷ ଏବଂ ରାଜ୍ୟ ସରକାର ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
