ଗାନ୍ଧୀନଗର,୨୯ା୮: ଯେଉଁ ଅପରାଧ ଘଟାଇଲେ ଦୋଷୀଙ୍କୁ ୬ ବର୍ଷରୁ ଅଧିକ ଅବଧିର ଦଣ୍ଡ ଦିଆଯାଇଥାଏ, ତାହାର ତଦନ୍ତରେ ଫରେନ୍ସିକ୍ ଯାଞ୍ଚକୁ ବାଧ୍ୟତାମୂଳକ କରାଯିବ। କେନ୍ଦ୍ର ସରକାର ଅପରାଧଗୁଡ଼ିକରେ ଦଣ୍ଡବିଧାନ ହାର ବୃଦ୍ଧି ପାଇଁ ଏହି ନିଷ୍ପତ୍ତି ନେବାକୁ ଗମ୍ଭୀରତା ସହ ବିଚାର କରୁଥିବା ରବିବାର ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ସୂଚନା ଦେଇଛନ୍ତି।
ଗୁଜରାଟ ଗାନ୍ଧୀନଗରସ୍ଥିତ ନ୍ୟାଶନାଲ ଫରେନ୍ସିକ୍ ସାଇନ୍ସେସ୍ ୟୁନିଭର୍ସିଟି (ଏନ୍ଏଫ୍ଏସ୍ୟୁ)ର ପ୍ରଥମ ସମାବର୍ତ୍ତନ ଉତ୍ସବରେ ସ୍ବରାଷ୍ଟ୍ରମନ୍ତ୍ରୀ ଶାହା ମୁଖ୍ୟ ଅତିଥି ରୂପେ ଯୋଗଦେଇଛନ୍ତି। ଏହି ଅବସରରେ ସ୍ନାତକ ଛାତ୍ରୀଛାତ୍ରଙ୍କୁ ସମ୍ବୋଧିତ କରି ସେ କହିଛନ୍ତି, କେନ୍ଦ୍ର ସରକାର ଦେଶର ପ୍ରତ୍ୟେକ ଜିଲାକୁ ଫରେନ୍ସିକ୍ ମୋବାଇଲ ଇନ୍ଭେଷ୍ଟିଗେଶନ ଫାସିଲିଟି ଯୋଗାଇଦେବେ। ଏଥିସହ ତଦନ୍ତର ସ୍ବାଧୀନତା ଓ ନିରପେକ୍ଷତାକୁ ସୁନିଶ୍ଚିତ କରିବା ଲାଗି ସ୍ବତନ୍ତ୍ର ଆଇନଗତ ଢାଞ୍ଚା ନିର୍ମାଣ କରାଯିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ସରକାର ଭାରତୀୟ ଦଣ୍ଡବିଧି ଆଇନ (ଆଇପିସି), ଆପରାଧିକ ଦଣ୍ଡ ସଂହିତା (ସିଆର୍ପିସି) ଏବଂ ସାକ୍ଷ୍ୟପ୍ରମାଣ ଆଇନରେ ମଧ୍ୟ ସଂଶୋଧନ ଆଣିବାକୁ ଯାଉଛନ୍ତି।
ଏଥି ସକାଶେ ବିଶେଷଜ୍ଞ ଓ ଆଇନଜ୍ଞମାନଙ୍କ ପରାମର୍ଶ ନିଆଯାଉଛି। ଦେଶ ସ୍ବାଧୀନ ହେବା ପରଠାରୁ ଏହି ଆଇନଗୁଡ଼ିକୁ କେହି ଭାରତୀୟ ଦୃଷ୍ଟିକୋଣରୁ ଦେଖୁ ନ ଥିବାରୁ ଏଥିରେ ସଂଶୋଧନ ଜରୁରୀ ହୋଇପଡ଼ିଥିବା ଶାହା କହିଛନ୍ତି। ସ୍ବରାଷ୍ଟ୍ର ମନ୍ତ୍ରୀ ଶାହା ଆହୁରି କହିଛନ୍ତି, ଯେତେବେଳେ ୬ ବର୍ଷରୁ ଅଧି ଅବଧିର ଦଣ୍ଡବିଧାନ ହେଉଥିବା ଅପରାଧ କ୍ଷେତ୍ରରେ ଫରେନ୍ସିକ୍ ସାଇନ୍ସକୁ ବାଧ୍ୟତାମୂଳକ କରାଯିବ ସେତେବେଳେ ବହୁ ସଂଖ୍ୟକ ଫରେନ୍ସିକ୍ ସାଇନ୍ସ ଏକ୍ସପର୍ଟ ଗ୍ରାଜୁଏଟ୍ ଆବଶ୍ୟକ ହେବ। ସେହି ସମୟରେ ଏନ୍ଏଫ୍ଏସ୍ୟୁର କୌଣସି ଛାତ୍ରୀଛାତ୍ର ନିଯୁକ୍ତି ନ ପାଇ ରହିବେ ନାହିଁ।
