ବ୍ରହ୍ମପୁର ଅଫିସ,୧୩ା୧:ଗଞ୍ଜାମ ଜିଲାରେ ଏବେ ସାଇବର ଅପରାଧୀଙ୍କ ଦୌରାତ୍ମ୍ୟ ଦିନକୁ ଦିନ ବଢ଼ିବାରେ ଲାଗିଛି। ପ୍ରଥମେ ଅଜଣା ନମ୍ବରରେ ଫୋନ୍, ପରେ ଇନ୍ଷ୍ଟାଗ୍ରାମରେ ଚାଟିଂ କରି ଜଣେ ମହିଳାଙ୍କୁ ନିଜ ଜାଲରେ ଫସାଇଲା ସାଇବର ଠକ। ପରେ ବିଦେଶୀ ମୁଦ୍ରା ପାର୍ସଲ ପଠାଇବା ବାହାନାରେ ତାଙ୍କ ଠାରୁ ଅନ୍ଲାଇନରେ ୪ଲକ୍ଷ ୮୨ହଜାର ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି। ଏନେଇ ସାଇବର ଓ ଅର୍ଥନେତିକ ଅପରାଧ ଥାନାରେ ୨/୨୩ ରେ ଏକ ମାମଲା ରୁଜୁ ହୋଇଛି।
ପ୍ରକାଶ ଯେ, କଟକର ମୂଳ ବାସିନ୍ଦା ଗୀତିଶ୍ରୀ ଦାସ(୪୬) ଏବେ କୋଦଳାରେ ରହୁଥିବା ବେଳେ ଗତ ୨୨ ତାରିଖରେ କୌଣସି ସାମଗ୍ରୀ କିଣାକିଣି କରିବାକୁ ବ୍ରହ୍ମପୁର ଆସିଥିଲେ। ସେତେବେଳେ ଏକ ଅଜଣା ନମ୍ବରରୁ ଜଣେ କଲ୍ କରିଥିଲେ। ଏହାପରେ ସେ ନିଜକୁ ଡାକ୍ତର ବୋଲି ପରିଚୟ ଦେଇ ଇନ୍ଷ୍ଟାଗ୍ରାମ୍ରେ ଚାଟିଂ କରିଥିଲେ। ଏଥିସହ କିଛି ବିଦେଶୀ ମୁଦ୍ରା ସେ ପ୍ୟାକିଂ କରି ଉକ୍ତ ମହିଳାଙ୍କ ପାଖକୁ ପାର୍ସଲ ପଠାଉଥିବା କହିଥିଲେ। ଏପରି କି ପ୍ୟାକିଂର ଭିଡିଓ ମଧ୍ୟ ପଠାଇଥିଲେ। ଏହାପରେ ପୁଣି ଆଉ ଏକ ଅଜଣା ନମ୍ବରରୁ ପାର୍ସଲ ଆସିଥିବା ନେଇ ମହିଳାଙ୍କୁ ଫୋନ୍ ଆସିଲା,ଏଥିପାଇଁ ୩୦ହଜାର ଟଙ୍କା ପଠାଇବାକୁ କହିବାରୁ ମହିଳା ଜଣକ ଗୁଗୁଲ୍ ପେ’ ମାଧ୍ୟମରେ ତାହା ପଠାଇଥିଲେ। କିନ୍ତୁ ତାଙ୍କ ପାଖେ ପାର୍ସଲ ପହଞ୍ଚତ୍ ନ ଥିଲା। ପାର୍ସଲ ଆଣି ଆସିଥିବା ବ୍ୟକ୍ତି ଜଣକ ବିଭିନ୍ନ ବାହାନା କରି ମହିଳାଙ୍କଠାରୁ ପରବର୍ତ୍ତୀ ସମୟରେ ୫-୬ଥରରେ ମୋଟ ୪ ଲକ୍ଷ ୮୨ହଜାର ଟଙ୍କା ଅନ୍ଲାଇନ୍ ଟ୍ରାଞ୍ଜାକ୍ସନରେ ଠକି ନେଇଥିଲେ। ପୁଣି ଥରେ ଠକ ଜଣଙ୍କ ଭୁବନେଶ୍ୱର ବିମାନବନ୍ଦରରୁ ପାର୍ସଲ ରିଲିଜ୍ କରାଇବା ପାଇଁ ୨୫ ହଜାର ଟଙ୍କା ମାଗିଥିଲେ। ସେତେବେଳେ ଯାଇ ମହିଳା ଜଣକ ଠକାମିର ଶିକାର ହୋଇଥିବା ସନ୍ଦେହ କରିଥିଲେ। ପାର୍ସଲ ପରିବର୍ତ୍ତେ ସେ ଦେଇଥିବା ସମସ୍ତ ଟଙ୍କା ଫେରାଇବାକୁ କହିବାରୁ ଠକ ଜଣକ ଆଉ ଧରାଛୁଆଁ ଦେଇ ନ ଥିଲେ।
