ନୂଆଦିଲ୍ଲୀ, ୯।୭- କ୍ରିକେଟର୍ମାନେ ସାଧାରଣତଃ ଜନପ୍ରତିନିଧିଙ୍କ ପରି। ଏପରିକି ବିଶ୍ୱର ଲକ୍ଷ ଲକ୍ଷ ଲୋକଙ୍କ ପାଇଁ ସେମାନେ ରୋଲ୍ ମଡେଲ ପାଲଟିଥାନ୍ତି। ଏହି କ୍ରିକେଟର୍ମାନେ ବିଭିନ୍ନ ବ୍ରାଣ୍ଡ୍ର ପ୍ରମୋଟ୍ କରି ସେମାନଙ୍କ ଆୟର ଏକ ବୃହତ୍ ଅଂଶ ରୋଜଗାର କରିଥାନ୍ତି। କିନ୍ତୁ ଯେତେବେଳେ ମଦ୍ୟ ପ୍ରସ୍ତୁତକାରୀ କମ୍ପାନୀର ପ୍ରମୋଶନ କରିବା କଥା ଆସେ ବିଶ୍ୱରେ ଏମିତି କିଛି କ୍ରିକେଟର୍ ରହିଛନ୍ତି ଯେଉଁମାନେ ସେମାନଙ୍କର ଧାର୍ମିକ ବିଶ୍ୱାସ କିମ୍ବା ନୈତିକତା ଦୃଷ୍ଟିରୁ ଏହି ଲୋଗୋ ଜର୍ସିରେ ଲଗାଇବାକୁ ଅଗ୍ରାହ୍ୟ କରିଦେଇଛନ୍ତି। ଏହି କାରଣରୁ ବିନା କୌଣସି ପ୍ରାୟୋଜକରେ ଖେଳାଳିମାନେ ଖେଳିବାର ଦେଖାଯାଇଛି। ସେହିଭଳି କିଛି କ୍ରିକେଟର୍ଙ୍କ ମଧ୍ୟରେ ରହିଛନ୍ତି ଦକ୍ଷିଣ ଆଫ୍ରିକାର ହାସିମ ଅମ୍ଲା, ଆଫଗାନିସ୍ତାର ରଶିଦ୍ ଖାନ, ପାକିସ୍ତାନର ଆଝାର ଅଲୀ ଓ ଇମାଦ ଓ୍ବାସିମ ପ୍ରମୁଖ।
ଆଫ୍ରିକାର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ଗଣାଯାଉଥିବା ହାସିମ ଅମ୍ଲା ଉଭୟ ଟେଷ୍ଟ ଓ ଏକଦିବସୀୟ କ୍ରିକେଟ୍ରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଜଣେ ଧାର୍ମିକ ବ୍ୟକ୍ତି ଭାବେ ମଧ୍ୟ ସେ ପରିଚିତ। ସେ ଯେତେବେଳେ ମଧ୍ୟ ଦକ୍ଷିଣ ଆଫ୍ରିକା ଜର୍ସି ପରିଧାନ କରିଥାନ୍ତି ସେଥିରେ ‘କାଷ୍ଟଲେ ଲାଗର୍’ ଲୋଗୋ ଲାଗି ନ ଥିବାର ଦେଖାଯାଏ। ବିୟର ପ୍ରସ୍ତୁତକାର କମ୍ପାନୀ କାଷ୍ଟେଲ ଲାଗର ଜାତୀୟ କ୍ରିକେଟ୍ ଦଳର ପ୍ରାୟୋଜକ ରହିଛି। ଯେହେତୁ ଅମ୍ଲା ଏହି ଲୋଗୋ ଲଗାଇ ନ ଥାନ୍ତି ସେ ଜାତୀୟ କ୍ରିକେଟ୍ ଆସୋସିଏଶନକୁ ଫାଇନ୍ ମଧ୍ୟ ଦେଇଥାନ୍ତି। ସେହିଭଳି ଆଫଗାନିସ୍ତାନର ଷ୍ଟାର୍ ସ୍ପିନର ରଶିଦ ଖାନ ନିଜର ଯାଦୁକାରୀ ବୋଲିଂ ଲାଗି ବିଶ୍ୱର ବିଭିନ୍ନ ଟି୨୦ ଲିଗ୍ରେ ଖେଳିଥାନ୍ତି। ଯେତେବେଳେ ସେ ଅଷ୍ଟ୍ରେଲିଆର ଘରୋଇ ଟି୨୦ ଟୁର୍ନାମେଣ୍ଟ ବିଗ୍ ବାସ୍ ଲିଗ୍ରେ ଖେଳିଥାନ୍ତି ତାଙ୍କ ଜର୍ସିରେ ମୁଖ୍ୟ ପ୍ରାୟୋଜକ ‘ଓ୍ବେଷ୍ଟ ଏଣ୍ଡ୍’ ଲୋଗୋ ଲାଗି ନ ଥାଏ। ଓ୍ବେଷ୍ଟ ଏଣ୍ଡ ଏକ ବିୟର ପ୍ରସ୍ତୁତକାରୀ କମ୍ପାନୀ ହୋଇଥିବାବେଳେ ଏହା ଟୁର୍ନାମେଣ୍ଟର ମୁଖ୍ୟ ପ୍ରାୟୋଜକ ମଧ୍ୟ ରହିଛି। ନିଜର ଧାର୍ମିକ ବିଶ୍ୱାସ ଲାଗି ରଶିଦ୍ ଜର୍ସିରେ ଏହି ମଦ୍ୟ ପ୍ରସ୍ତୁତକାରୀ କମ୍ପାନୀର ଲୋଗୋ ଲଗାଇ ନ ଥାନ୍ତି। ସେହିଭଳି ପାକିସ୍ତାନ ଟେଷ୍ଟ କ୍ରିକେଟ୍ ଦଳର ଅଧିନାୟକ ଆଝାର ଅଲୀ ମଧ୍ୟ ବେଶ୍ ଧର୍ମ ବିଶ୍ୱାସୀ। ଇଂଲଣ୍ଡରେ ସମରସେଟ୍ କ୍ଲବ ପକ୍ଷରୁ କାଉଣ୍ଟି କ୍ରିକେଟ୍ ଖେଳୁଥିବାବେଳେ ସେ ମଧ୍ୟ ବିନା ଲୋଗୋ ଥିବା ଜର୍ସି ପରିଧାନ କରିଥାନ୍ତି। ‘ଟ୍ରିବ୍ୟୁଟ୍ ଆଲେ’ କାଉଣ୍ଟି କ୍ରିକେଟ୍ର ମୁଖ୍ୟ ପ୍ରାୟୋଜକ ରହିଛି, ଯାହାକି ଏକ ବିୟର ପ୍ରସ୍ତୁକାରୀ କମ୍ପାନୀ। ତେଣୁ ଆଝାର ନିଜ ଜର୍ସିରେ ଏହି କମ୍ପାନୀର ଲୋଗୋ ଲଗାଇ ନଥାନ୍ତି।
