ରାଉରକେଲା ଅଫିସ, ୨୪।୧: ହକି ବିଶ୍ୱକପ୍କୁ ଅବସରରେ ରାଉରକେଲା ସେକ୍ଟର-୫ ଭଞ୍ଜଭବନ ସ୍ଥିତ ପ୍ରଦର୍ଶନୀ ପଡିଆରେ ଚାଲିଥିବା ସରସ ମେଳାର ମଙ୍ଗଳବାର ଦଶମ ଦିବସ ଥିଲା। ସରସ ମେଳାରେ ଖାଦ୍ୟ, ବସ୍ତ୍ର ଓ ଗୃହାଦି ଉପକରଣ ସାମଗ୍ରୀର ପସରା ଜମୁଛି। ରାଜ୍ୟ ତଥା ରାଜ୍ୟ ବାହାର ସ୍ବୟଂ ସହାୟକ ଗୋଷ୍ଠୀ, ମିଶନ ଶକ୍ତି ମହିଳା ମଣ୍ଡଳ ଓ କ୍ଷୁଦ୍ର ଉଦ୍ୟୋଗୀ ସରସ ମେଳାରେ ନିଜ ନିଜ ପସରା ଖୋଲି ରୋଜଗାର କରୁଛନ୍ତି। ଆଜିକୁ ୧୦ ଦିନ ହେଲାଣି ସରସ ମେଳା ପ୍ରଦର୍ଶନୀ ବଜାରରେ ଗ୍ରାହକଙ୍କ ପ୍ରବଳ ଭିଡ଼ ଜମୁଥିବା ଦେଖିବାକୁ ମିଳିଛି। ଏହା ଭିତରେ ରାତ୍ରିକାଳୀନ ସାଂସ୍କୃତିକ କାର୍ଯ୍ୟକ୍ରମ ମେଳାର ଆକର୍ଷଣକୁ ଦ୍ୱିଗୁଣିତ କରୁଛି । ଦର୍ଶକ ଓ ଗ୍ରାହକ ବିଭିନ୍ନ ଦ୍ରବ୍ୟ କିଣାବିକା ସହ ସାଂସ୍କୃତିକ କାର୍ଯ୍ୟକ୍ରମର ମଜା ନେଉଛନ୍ତି। ୧୦ ଦିନ ମଧ୍ୟରେ ସରସ ମେଳା ମଞ୍ଚରେ ରାଜ୍ୟ ତଥା ରାଜ୍ୟ ବାହାରର ୨୬ରୁ ଊର୍ଦ୍ଧ୍ୱ ନୃତ୍ୟକଳା ପରିଷଦର କଳାକାରମାନେ ଅଂଶଗ୍ରହଣ କରି ସେମାନଙ୍କ ନୃତ୍ୟ ପରିବେଷଣ ସାରିଲେଣି। ସରସ ମେଳା ଏବେ ସାଂସ୍କୃତିକ ବର୍ଣ୍ଣାଳିର ପେଣ୍ଠସ୍ଥଳ ପାଲଟିଛି। ମଙ୍ଗଳବାର ଏହି ମଞ୍ଚରେ ରାଉରକେଲା ପ୍ରତିଭା କଳା କେନ୍ଦ୍ର, ରାୟଗଡର ଡଙ୍ଗରିଆ କନ୍ଧ ନୃତ୍ୟକଳା ପରିଷଦ, ମଣିପୁର କରମା ନୃତ୍ୟକଳା ପରିଷଦ, ଆନ୍ଧ୍ରପ୍ରଦେଶର ଭାରତ ନାଟ୍ୟମ କଳା ପରିଷଦର କଳାକାରମାନେ ନୃତ୍ୟ ପରିବେଷଣ କରିଥିଲେ। ବିଳମ୍ବିତ ରାତ୍ରି ପର୍ଯ୍ୟନ୍ତ ଦର୍ଶକମାନେ ସାଂସ୍କୃତିକ କାର୍ଯ୍ୟକ୍ରମକୁ ଉପଭୋଗ କରିଥିଲେ।
