ଭୋପାଳ, ୨୩।୨ : ପାଠପଢ଼ା ପରେ ବିବାହ କାର୍ଯ୍ୟ ହେଲେ ଭଲ। ନାରୀ ନିକେତନରେ ଥିବା ଜଣେ ଯୁବତୀଙ୍କୁ ମଧ୍ୟପ୍ରଦେଶ ହାଇକୋର୍ଟଙ୍କ ପକ୍ଷରୁ ଏଭଳି ପରାମର୍ଶ ପ୍ରଦାନ କରାଯାଇଛି। ଯୁବତୀ ଜଣକ ନିଜ ସମ୍ପ୍ରଦାୟ ବାହାରେ ଜଣଙ୍କୁ ବିବାହ କରିବାକୁ ଚାହୁଁଛନ୍ତି।
ବିଚାରପତି ଶେଲ୍ ନାଗୁ ଏବଂ ମନିନ୍ଦର ସିଂ ଭଟ୍ଟଙ୍କ ନେତୃତ୍ୱରେ ଗଠିତ ଡିଭିଜନ୍ ବେଞ୍ଚ୍ ଯୁବତୀଙ୍କୁ ପରାମର୍ଶ ଦେଇଛନ୍ତି ଯେ, ବିବାହ ମଧ୍ୟ ଗୁରୁତ୍ୱପୂର୍ଣ୍ଣ। କିନ୍ତୁ ଏହାକୁ ପାଠପଢ଼ା ପାଇଁ ଘୁଞ୍ଚାଇ ଦେଇ ହେବ। ଏନେଇ ତାଙ୍କ ପରିବାର ପକ୍ଷରୁ ମଧ୍ୟ ବିରୋଧ କରାଯାଉଛି। ଯୁବତୀ ଜଣଙ୍କୁ ୧୯ ବର୍ଷ ହୋଇଥିବା ତାଙ୍କ ପରିବାର ପକ୍ଷରୁ ଦାଖଲ ହୋଇଥିବା ପିଟିଶନ୍ରେ ଉଲ୍ଲେଖ କରାଯାଇଛି। ସେ ୨୦୦୨ ଅକ୍ଟୋବର ୧୯ରେ ଜନ୍ମଗ୍ରହଣ କରିଥିଲେ। ସେ ଏବେ ନର୍ସିଂ ପାଠ୍ୟକ୍ରମରେ ଅଧ୍ୟୟନ କରୁଛନ୍ତି।
ଖଣ୍ଡପୀଠ ଏନେଇ ଏକ ସତ୍ୟପାଠ ଦାଖଲ କରିବାକୁ ମଧ୍ୟ କହିଛନ୍ତି। ସେ ସ୍ପେଶାଲ ମ୍ୟାରେଜ୍ ଆକ୍ଟ ୧୯୫୪ ଅନ୍ତର୍ଗତ ବିବାହ କରିବାକୁ ଚାହୁଁଥିବା ସତ୍ୟପାଠରେ ଉଲ୍ଲେଖ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ସେ ବୟସ୍କା ହୋଇଥିବାରୁ ନିଜ ପସନ୍ଦର ଧର୍ମ ଅବା ଜୀବନସାଥି ଚୟନ କରିପାରିବେ ବୋଲି କୋର୍ଟ କହିଛନ୍ତି। ଏବେ ତାଙ୍କ ବୟସ ୧୯ ବର୍ଷରୁ ଅଧିକ ଥିବାରୁ ସେ ନାରୀ ନିକେତନରେ ରହିବା ଅନାବଶ୍ୟକ। ତେଣୁ କୋର୍ଟ ତାଙ୍କୁ ମୁକ୍ତ କରିବା ଲାଗି ନିର୍ଦ୍ଦେଶ ଜାରି କରିଛନ୍ତି। ବ୍ୟକ୍ତିଗତ ସ୍ବାଧୀନତା ଅର୍ନ୍ତଗତ ସେ ନିଜ ପସନ୍ଦର ବିବାହ କରିପାରିବେ ବୋଲି ଖଣ୍ଡପୀଠଙ୍କ ପକ୍ଷରୁ କୁହାଯାଇଛି।
