ନୂଆଦିଲ୍ଲୀ,୨୬।୧୨: ଦିଲ୍ଲୀ, ପଞ୍ଜାବ, ହରିୟାଣା ଏବଂ ୟୁପି ସମେତ ଦେଶର ଅନେକ ରାଜ୍ୟରେ ସକାଳେ ଘନ କୁହୁଡି ରହିଥିଲା। ସବୁଠାରୁ ଖରାପ ପରିସ୍ଥିତି ହେଉଛି ରାଜଧାନୀ ଦିଲ୍ଲୀରେ। ପ୍ରଦୂଷଣ ଏବଂ କୁହୁଡି ଯୋଗୁ ଏଠାରେ ରାସ୍ତାଘାଟ ଦିଶୁନାହିଁ। ଯାହା ବିମାନ ସେବା ଉପରେ ସର୍ବାଧିକ ପ୍ରଭାବ ପକାଇଛି ।
କୁହୁଡି ଯୋଗୁ ଦିଲ୍ଲୀ ବିମାନ ବନ୍ଦରରେ ଅତି କମରେ ୫୦ ବିମାନ ପ୍ରଭାବିତ ହୋଇଥିବା ବେଳେ ଅନେକ ବିମାନ ବିଳମ୍ବ ଯୋଗୁ ଯାତ୍ରୀମାନେ ଅସୁବିଧାର ସମ୍ମୁଖୀନ ହୋଇଛନ୍ତି। ରେଳ ଏବଂ ସଡକ ପରିବହନର ସ୍ଥିତି ମଧ୍ୟ ସମାନ। କମ୍ ଦୃଶ୍ୟମାନତା ହେତୁ ଯାନବାହାନଗୁଡିକ ରାସ୍ତାରେ ଧୀରେ ଧୀରେ ଗତି କରୁଥିବାବେଳେ ଅନେକ ଟ୍ରେନ ବିଳମ୍ବ ହୋଇଛି । କୁହୁଡି ହେତୁ ସାମ୍ନାରେ କିଛି ଦିଶୁ ନ ଥିବାରୁ ଦୁର୍ଘଟଣାର ସମ୍ଭାବନା ମଧ୍ୟ ବଢିଛି। ତେଣୁ ଅତିରିକ୍ତ ସତର୍କତା ଅବଲମ୍ବନ କରାଯାଉଛି। ଡ୍ରାଇଭରମାନଙ୍କୁ ଧୀରେ ଗାଡି ଚଲାଇବାକୁ ପରାମର୍ଶ ଦିଆଯାଇଛି।
