ଛତ୍ରପୁର,୮।୧୨(ଦିଲୀପ ସାମଲ)ସଂଘବଦ୍ଧ ଆକ୍ରମଣରେ ସେନା କର୍ମଚାରୀଙ୍କୁ ହତ୍ୟା କରାଯାଇଥିବା ଘଟଣାର ପର୍ଦାଫାସ କରିଛି ଗଞ୍ଜାମର ଚମାଖଣ୍ଡି ପୋଲିସ। କାଳିପଲ୍ଲୀ ଗ୍ରାମର ଜେ.ଡିଲେଶ୍ୱର ପାତ୍ର ହତ୍ୟା ଘଟଣାରେ ପୋଲିସ ପାଞ୍ଚ ଜଣଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ କାଳିପଲ୍ଲୀ ଗ୍ରାମର ଜେ.କଲ୍ୟାଣୀ ପାତ୍ର, ସିଏଚ. ଶେଖର,
ବି. ଚେନେୟା, ନିମଖଣ୍ଡି ଥାନା ଅଞ୍ଚଳର ବି. ବୁଲୁ ପାତ୍ର ଓ ସିଏଚ. ବିକି କୁମାର ପାତ୍ର।
ସୂଚନାଯୋଗ୍ୟ, କିଛିଦିନ ତଳେ ସେନା କର୍ମଚାରୀ ଜେ.ଡିଲେଶ୍ୱରଙ୍କର ଝିଅଟିଏ ହୋଇଥିଲା। ତାଙ୍କୁ ଦେଖିବା ପାଇଁ ସେ ଛୁଟିରେ ଘରକୁ ଆସିଥିଲେ।
ଡିସେମ୍ବର ୩ରେ କାଳିପଲ୍ଲୀ ଗ୍ରାମର ସେନା କର୍ମଚାରୀ ଜେ.ଡିଲେଶ୍ୱର ପାତ୍ର ଗୋପାଳପୁରରୁ କ୍ରିକେଟ ଖେଳ ଦେଖି ଘରକୁ ଫେରୁଥିବାବେଳେ ରାତି ୮.୩୦ରେ କିଛି ଜଣ ଦୁର୍ବୃତ୍ତ ହରିପୁର ଛକ ନିକଟରେ ତାଙ୍କ ଉପରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନାେରେ ଭର୍ତ୍ତି କରାଯାଇଥିଲେ ହେଁ ଚିକିତ୍ସାଧିନ ଅବସ୍ଥାରେ ଡିସେମ୍ବର ୬ରେ ତାଙ୍କର ମୃତ୍ୟୁ ହୋଇଥିଲା।
ସାମ୍ବାଦିକ ସମିଳନୀ କରି ଗଞ୍ଜାମ ଏସପି ଜଗମୋହନ ମିନା କହିଛନ୍ତି, ଏବେ ବି ଘଟଣାର ତଦନ୍ତ ଜାରି ରହିଛି। ହତ୍ୟା ଘଟଣାରେ ଆଗକୁ ଯେଉଁମାନଙ୍କର ସମ୍ପୃକ୍ତି ଆସିବ ସେମାନଙ୍କୁ ଗିରଫ କରାଯିବ। ଗ୍ରାମରେ ଦୁଇ ଗୋଷ୍ଠୀ ମଧ୍ୟ୍ୟରେ ସବୁବେଳେ ତିକ୍ତତା ରହି ଆସୁଥିଲା। ଗୋଟିଏ ଗୋଷ୍ଠୀର ଲିଡ ନେଉଥିଲେ ଶେଖର ଓ ଅନ୍ୟ ଗୋଷ୍ଠୀର ଡ଼ିଲେଶର। ତେବେ ଗୋଷ୍ଠୀ କନ୍ଦଳ ଉଗ୍ର ରୂପ ହେବାରୁ ଡିଲେଶ୍ୱରଙ୍କୁ ହତ୍ୟା କରାଯାଇଥିଲା। ତେବେ ଅଭିଯୁକ୍ତଙ୍କ ଠାରୁ ପୋଲିସ ଦୁଇଟି ମୋବାଇଲ ଫୋନ ଓ ଦୁଇଟି ଗାଡି ଜବତ କରିଛି ବୋଲି ଏସପି ସୂଚନା ଦେଇଛନ୍ତି।
