ଭବାନୀପାଟଣା,୩।୯(ଉତ୍ତମ କୁମାର ଦାଶ)ପଞ୍ଜୁରି ଭିତରେ ମାଛ ଚାଷ। କଥାଟା ଶୁଣିଲେ ଟିକେ ଆଶ୍ଚର୍ଯ୍ୟ ଲାଗୁଥିବ। ହେଲେ ମତ୍ସ୍ୟ ବିଭାଗ ସହାୟତାରେ କଳାହାଣ୍ଡିର ଇନ୍ଦ୍ରାବତୀ ଜଳଭଣ୍ଡାରରେ ଆରମ୍ଭ ହୋଇଛି କେଜ୍ କଲଚର୍ ଫାର୍ମିଂ। ଭାସମାନ ଜେଟି ଓ ଜାଲରେ ତିଆରି ହୋଇଛି ଏହି ଫିଶିଙ୍ଗ କେଜ୍। ଆଦିବାସୀ ଅଧ୍ୟୁଷିତ କଳାହାଣ୍ଡି ଜିଲାରେ ଏବେ ପଞ୍ଜୁରୀ ଭିତରେ ମାଛ ଚାଷ କରି ସ୍ବାବଲମ୍ବୀ ହୋଇ ପାରିବେ ଚାଷୀ। ଜିଲାରେ ମତ୍ସ୍ୟ ଉତ୍ପାଦନ ବୃଦ୍ଧି ତଥା ମତ୍ସ୍ୟ ସମବାୟ ସମିତି, ମହିଳା ସ୍ବୟଂ ସହାୟକା ଗୋଷ୍ଠୀଗୁଡିକର ଆୟ ବୃଦ୍ଧି ଓ ଜୀବନ ଜୀବିକା ସୁରକ୍ଷିତ କରିବା ଉଦ୍ଦେଶ୍ୟରେ ପ୍ରଥମ ପର୍ଯ୍ୟୟରେ ଥୁଆମୂଳ ରାମପୁରର ସାନଛତ୍ରଙ୍ଗର ଇନ୍ଦ୍ରାବତୀ ଜଳଭଣ୍ଡାରରେ ଗୋଟିଏ ବୃତ୍ତାକାର ଓ ଦୁଇଟି ଆୟତ୍ତାକାର ପଞ୍ଜୁରୀ ସ୍ଥାପିତ କରାଯାଇଛି। ଗୁରୁବାର ମା’ ଖମ୍ବେଶ୍ବରୀ ମତ୍ସ୍ୟ ସମବାୟ ସମିତି ଦ୍ବାରା ଏହି ପଞ୍ଜୁରିରେ ଅମୁରକାର୍ଷ ମାଛ ଜାଆଁଳା ଛଡାଯାଇଛି। ଏହାକୁ ପ୍ରତିଦିନ ଖାଦ୍ୟ ଦେବା ସହ ପଞ୍ଜୁରି ସଫା ରଖିଲେ ୩ରୁ ୪ ମାସ ମଧ୍ୟରେ ଏହା ୧ କେଜି ପର୍ଯ୍ୟନ୍ତ ବଢ଼ିବେ ଏବଂ କ୍ୟୁବିକ ମିଟର ପ୍ରତି ୩୦ରୁ ୪୦ କେଜି ମାଛ ଉତ୍ପାଦନ ହୋଇପାରିବ। ଜଳଭଣ୍ଡାର ପାଇଁ ନିଜ ଭିଟା ମାଟି ହରାଇଥିବା ଏହି ଆଦିବାସୀ ଅଞ୍ଚଳରେ ଚାଷ ଜମି କମ ଓ ଚାରିଆଡେ ଜଳଭଣ୍ଡାର ରହିଥିବାରୁ ଲାଭଦାୟକ ଚାଷ କରିପାରୁ ନ ଥିଲେ ସ୍ଥାନୀୟ ଲୋକେ। କିନ୍ତୁ ଏବେ ଏକ ନୂଆ ଆଶା ଦେଖାଇଛି କେଜ୍ କଲଚର୍ ଫାର୍ମିଂ। ମଧୁର ମାଛର ଚାହିଦା ନିରନ୍ତର ବୃଦ୍ଧି ପାଉଛି। ଏହି କେଜ୍ ଫାର୍ମିଙ୍ଗ କରି ଟଙ୍କା ରୋଜଗାର କରିପାରିବେ ଏହି ଅଞ୍ଚଳବାସୀ। ଆଗରୁ ହୀରାକୁଦ ଓ ମାଲକାନଗିରିର ସତିଗୁଡା ଜଳ ଭଣ୍ଡାରରେ ଭାସମାନ ଜେଟି ଓ ଜାଲ ସହାୟତାରେ ଫିଶିଙ୍ଗ କେଜ ନିର୍ମାଣ କରାଯାଇ ଚାଷ କରା ଯାଉଥିବା ବେଳେ ଏହା କଳାହାଣ୍ଡି ଜିଲା ପାଇଁ ପ୍ରଥମ । ସ୍ଥାନୀୟ ଅଞ୍ଚଳରୁ ବାହାର ରାଜ୍ୟକୁ ଦାଦନ ଖଟିବା ପାଇଁ ଯାଉଥିବା ଯୁବପିଢିଙ୍କୁ ମଧ୍ୟ ଏହା ଆକୃଷ୍ଟ କରିବା ସହ ଅଞ୍ଚଳର ଭାଗ୍ୟ ପରିବର୍ତ୍ତନରେ ସହାୟକ ହେବ ବୋଲି ଆଶା କରାଯାଉଛି।
