ଟୋକିଓ,୧।୮: ୪୯ ବର୍ଷରେ ପ୍ରଥମ ଥର ପାଇଁ ଅଲିମ୍ପିକ୍ସ ସେମିଫାଇନାଲରେ ପ୍ରବେଶ କରିଛି ଭାରତୀୟ ପୁରୁଷ ହକି ଦଳ। ରବିବାର ଖେଳାଯାଇଥିବା କ୍ୱାର୍ଟର ଫାଇନାଲରେ ଟିମ୍ ଇଣ୍ଡିଆ ୩-୧ ଗୋଲରେ ଗ୍ରେଟ୍ ବ୍ରିଟେନକୁ ହରାଇ ଏହି ସଫଳତା ହାସଲ କରିଛି। ଭାରତ ପାଇଁ ଦିଲପ୍ରୀତ (୭ମ ମିନିଟ୍), ଗୁରଜାନ୍ତ (୧୬ ତମ) ଓ ହାର୍ଦ୍ଦିକ ସିଂ (୫୭ ତମ) ଗୋଲ ସ୍କୋର କରିଥିଲେ। ଏମାନଙ୍କ ବ୍ୟତୀତ ଗୋଲକିପର ପି ଆର ଶ୍ରୀଜେଶଙ୍କ ଚମତ୍କାର ସେଭିଂ କାରଣରୁ ୧୯୭୨ ପରେ ପ୍ରଥମ ଥର ପାଇଁ ଅଲିମ୍ପିକ୍ସ ସେମିଫାଇନାଲରେ ସ୍ଥାନ ପକ୍କା କରିଛି ଭାରତ। ଅନ୍ତିମ ୪ ରାଉଣ୍ଡରେ ଭାରତୀୟ ଦଳ ବିଶ୍ୱ ଚାମ୍ପିୟନ ବେଲଜିୟମକୁ ଭେଟିବ।
ଉଲ୍ଲେଖ ଯୋଗ୍ୟ, ୧୯୮୦ ମସ୍କୋ ଅଲିମ୍ପିକ୍ସରେ ଭାରତ ଶେଷ ଥର ହକିରେ ସ୍ବର୍ଣ୍ଣ ପଦକ ଜିତିଥିଲା। କିନ୍ତୁ ସେହି ସଂସ୍କରଣରେ ମାତ୍ର ୬ଟି ଦଳ ଅଂଶଗ୍ରହଣ କରିଥିବାରୁ ସେମିଫାଇନାଲ ନ ଥିଲା। ଅନ୍ତିମ ଥର ଭାରତ ୧୯୭୨ ମ୍ୟୁନିଚ୍ ଅଲିମ୍ପିକ୍ସରେ ସେମିଫାଇନାଲରେ ଖେଳିଥିଲା ଭାରତ। ଫାଇନାଲରେ ଟିମ୍ ଇଣ୍ଡିଆ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନ ଠାରୁ ୦-୨ ବ୍ୟବଧାନରେ ପରାସ୍ତ ହୋଇଥିଲା।
