ଭୁବନେଶ୍ୱରସ୍ଥ ଲକ୍ଷ୍ମୀସାଗରରେ ମୋ ଜନ୍ମ। ହରିହର ଉଚ୍ଚବିଦ୍ୟାଳୟରୁ ମାଟ୍ରିକ୍ ପାସ୍ କରିବା ପରେ ବିଜେବି କଲେଜରେ ଯୁକ୍ତ ଦୁଇ ପଢିଥିଲି। ସେତେବେଳେ ମୋ ବାପା ଡ. ବିଜୟ କୁମାର ମିଶ୍ର ବିଜେବି କଲେଜର ପ୍ରିନ୍ସିପାଲ୍ ଥାନ୍ତି। ହେଲେ ଚାକିରି କ୍ଷେତ୍ରରେ ତାଙ୍କର ବଦଳି ହେବା ଯୋଗୁ ଯୁକ୍ତ ତିନି ମୋତେ ସମ୍ବଲପୁରସ୍ଥ ଗଙ୍ଗାଧର ମେହେର କଲେଜରେ ପଢିବାକୁ ପଡିଥିଲା। ତା’ପରେ ମୁଁ ଜ୍ୟୋତି ବିହାର ୟୁନିର୍ଭସିଟିରେ ବି.ଇଡି କଲି। ଆଉ ତା’ପରେ ସ୍ଥାନୀୟ ଏକ ବେସରକାରୀ ବିଦ୍ୟାଳୟରେ ଶିକ୍ଷୟିତ୍ରୀ ଭାବେ କାମ କରିବାକୁ ଲାଗିଲି। ସେଠାରୁ ମୋତେ ଯେଉଁ ଦରମା ମିଳିଲା, ସେଥିରୁ କିଛି ନେଇ ସ୍ଥାନୀୟ ଏକ ଅନାଥାଶ୍ରମରେ ଦାନ କରିଥିଲି। ଆଉ ବାକି ଟଙ୍କାରେ ବାପା, ମା’, ବଡ଼ ଭାଇ ଓ ସାନ ଭଉଣୀ ପାଇଁ ଗିଫ୍ଟ କିଣିକି ଆଣିଥିଲି। ଏମିତି କିଛିଦିନ ଚାଲିବା ପରେ ୧୯୯୭ରେ ମୋର ବାହାଘର ହୋଇଗଲା। ଅବଶ୍ୟ ତା’ରି ଭିତରେ ମୁଁ ନର୍ସରୀ ଟିଚ୍ଚର୍ସ ଟ୍ରେନିଂ କୋର୍ସ ସାରି ଦେଇଥିଲି। ଯେଉଁଥିପାଇଁ ମୋତେ ବାହାଘର ପରେ ରୋଟାରୀ ପବ୍ଲିକ୍ ସ୍କୁଲ୍ରେ ଚାକିରି କରିବାର ସୂଯୋଗ ମିଳିଥିଲା। ଶାଶୁଘର ଭୂବନେଶ୍ୱରରେ ହୋଇଥିଲେ ହେଁ, ସ୍ବାମୀ ମନୋରଞ୍ଜନ ମିଶ୍ର ଯେହେତୁ ଅନୁଗୁଳରେ ଚାକିରି କରୁଥିଲେ ତେଣୁ ମୁଁ ବି ସେହିଠାରେ ରହି ସ୍ଥାନୀୟ ରୋଟାରୀ ପବ୍ଲିକ୍ ସ୍କୁଲ୍ରେ ଶିକ୍ଷୟିତ୍ରୀ ଭାବେ କାମ କରିବାକୁ ଲାଗିଲି। ସେଠାରେ ମୋତେ ଯେଉଁ ପ୍ରଥମ ଦରମା ମିଳିଲା, ସେଥିରୁ କିଛି ନେଇ ମୁଁ ମୋ ସ୍ବାମୀଙ୍କ ପାଇଁ ଗିଫ୍ଟ କିଣିକି ଆଣିଥିଲି। ତା’ସହିତ ମୋର ଯେହେତୁ ସଙ୍ଗୀତରେ ରୁଚି ରହିଥିଲା, ତେଣୁ ବଳକା ଟଙ୍କାରେ ମୁଁ ମୋ ନିଜ ପାଇଁ ବାଦ୍ୟଯନ୍ତ୍ର କିଣିଥିଲି। କିନ୍ତୁ ଏହି ଚାକିରି ବି ବେଶୀ ଦିନ କରିପାରିଲି ନାହିଁ। କାରଣ ଘରର ଜଞ୍ଜାଳ ବଢି ଯାଇଥିଲା। ତେଣୁ ଚାକିରି ଛାଡ଼ି ଘର କଥା ବୁଝିବାକୁ ଲାଗିଲି। ହେଲେ ସ୍ବାମୀଙ୍କ ପ୍ରେରଣାରେ ସଙ୍ଗୀତ କ୍ଷେତ୍ରରେ ନିଜର ଏକ ସ୍ବତନ୍ତ୍ର ପରିଚୟ କରିବାକୁ ଚେଷ୍ଟା କଲି। ଏଠାରେ କହି ରଖିବାକୁ ଚାହେଁ ଯେ, ମୁଁ ଯେତେବେଳେ ସ୍କୁଲ୍ରେ ପଢୁଥିଲି, ସେତେବେଳେ ମା’ଙ୍କ ପ୍ରେରଣାରେ ଗୀତ ଶିଖିବା ଆରମ୍ଭ କରିଥିଲି। ମଧୁମିତା ଦେ’ ହେଲେ ମୋର ପ୍ରଥମ ସଙ୍ଗୀତ ଗୁରୁ। ସମୟକ୍ରମେ ଜ୍ଞାନ ମହାପାତ୍ର, ସଞ୍ଜୟ ଦାସଙ୍କ ଭଳି ଗୁରୁମାନଙ୍କଠାରୁ ବି ଗୀତ ଶିଖିବାର ସୂଯୋଗ ମୁଁ ପାଇଛି। ଏପରିକି ଶାସ୍ତ୍ରୀୟ ସଙ୍ଗୀତରେ ବିଶାରଦ ମଧ୍ୟ କରିଛି। ତା’ସହିତ ଆକାଶବାଣୀର ମୁଁ ହେଉଛି ଜଣେ ସ୍ବୀକୃତିପ୍ରାପ୍ତ କଣ୍ଠଶିଳ୍ପୀ। ୟା’ଭିତରେ ହରେକୃଷ୍ଣ ନାୟକ, ନିର୍ମଳ ନାୟକ, ଅରୁଣ ମନ୍ତ୍ରୀଙ୍କ ଭଳି କେତେଜଣ ବିଶିଷ୍ଟ ଗୀତିକାରଙ୍କର ଅନେକ ଲୋକପ୍ରିୟ ଗୀତରେ ମଧ୍ୟ ମୁଁ କଣ୍ଠଦାନ କରିସାରିଛି। ମୋ ଦ୍ୱାରା କଣ୍ଠଦାନ କରାଯାଇଥିବା କେତୋଟି ଲୋକପ୍ରିୟ ଭଜନ ମଧ୍ୟରେ ଧନ କୁଞ୍ଜଦୋଳି ଖୋଜୁଛି, ଦେଉଳ ଉପରେ ବସିଛି, ମରା ମରା କହୁ କହୁ ରାମ ହୋଇ ଯିବରେ ଇତ୍ୟାଦି ହେଉଛି ଅନ୍ୟତମ । ସେହିପରି କହନା ଏ ଫୁଲ କହନା(ରିମିକ୍ସ), ମୁଁ ସୁନ୍ଦରୀ ମୋ ମନ ମୟୂରୀ, କାଲି ଯଦି ଯିବି ହଜି ମୋତେ କିଏ ଯିବ ଖୋଜି ଭଳି ଅନେକ ଆଧୁନିକ ଗୀତରେ ବି ମୁଁ କଣ୍ଠଦାନ କରିସାରିଛି। ତା’ସହିତ ୟା’ଭିତରେ ଅନେକ ଷ୍ଟେଜ୍ ପୋଗ୍ରାମ୍ରେ ବହୁ ଲୋକପ୍ରିୟ କଣ୍ଠଶିଳ୍ପୀମାନଙ୍କ ସହ ସଙ୍ଗୀତ ପରିବେଷଣ କରି ଶ୍ରୋତାଙ୍କର ପ୍ରଶଂସା ମଧ୍ୟ ସାଉଁଟିପାରିଛି। କେବଳ ଏତିକି ନୁହେଁ, ଅନେକ ଟେଲିଭିଜନ ଚ୍ୟାନେଲ୍ରେ ମଧ୍ୟ ମୁଁ ଗୀତ ବୋଲିଛି। ସଙ୍ଗୀତ ବ୍ୟତିତ ଆଙ୍କରିଂ କରିବା, ନାଟକ ଲେଖିବାରେ ବି ମୋର ରୁଚି ରହିଛି। ଏପରିକି ଦୁଇଟି ନାଟକର ସ୍କ୍ରିପ୍ଟ ମଧ୍ୟ ମୁଁ ଲେଖିସାରିଛି। ତେବେ ସେ ଯାହା ହେଉ ସଙ୍ଗୀତ କ୍ଷେତ୍ରରେ ଆଜି ମୁଁ ଯେଉଁ ସ୍ଥାନରେ ପହଁଞ୍ଚତ୍ପାରିଛି, ସେଥିପାଇଁ ଭଗବାନଙ୍କ ଆର୍ଶୀବାଦ ସହ ମା’ଙ୍କର ପ୍ରେରଣା ଓ ମୋ ସ୍ବାମୀଙ୍କର ସହଯୋଗ ଓ ଭଲପାଇବାକୁ ମୁଁ ସମ୍ପୂର୍ଣ୍ଣ ଶ୍ରେୟ ଦେବି।
-ଅମ୍ବ୍ରିତା
