ମାଉଣ୍ଟ ମାଉନଗାନୁଇ, ୫।୪: ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆ ମ୍ୟାଚ୍ରେ ଭ୍ରମଣକାରୀ ଅଷ୍ଟ୍ରେଲିଆ ମହିଳା ଦଳ ୬ ଉଇକେଟରେ ବିଜୟ ହାସଲ କରିଛି। ସ୍ଥାନୀୟ ବେ ଓଭାଲ ଗ୍ରାଉଣ୍ଡରେ ରବିବାର ଖେଳାଯାଇଥିବା ଏହି ମ୍ୟାଚ୍ରେ ଟସ୍ ଜିତି ଅଷ୍ଟ୍ରେଲିଆ ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ନ୍ୟୁଜିଲାଣ୍ଡ ୪୮.୫ ଓଭରରେ ୨୧୨ ରନ କରି ଅଲଆଉଟ ହୋଇଥିଲା। ଜବାବରେ ଅଷ୍ଟ୍ରେଲିଆ ୩୮.୩ ଓଭରରେ ୪ ଉଇକେଟ ହରାଇ ୨୧୫ ରନ କରି ବିଜୟୀ ହୋଇଛି। ଏଥିସହିତ ଅଷ୍ଟ୍ରେଲିଆ ୩ ମ୍ୟାଚ୍ ବିଶିଷ୍ଟ ଏହି ସିରିଜରେ ୧-୦ରେ ଅଗ୍ରଣୀ ହାସଲ କରିଛି। କେବଳ ସେତିକି ନୁହେଁ ଅଷ୍ଟ୍ରେଲିଆ ଦିନିକିଆ ଫର୍ମାଟ୍ରେ କ୍ରମାଗତ ୨୨ଟି ବିଜୟ ହାସଲ କରି ନୂଆ ରେକର୍ଡ ସୃଷ୍ଟି କରିଛି। ଏହି କ୍ରମରେ ମହିଳା ଦଳ ରିକି ପଣ୍ଟିଂଙ୍କ ୨୦୦୩ର ଅଷ୍ଟ୍ରେଲିଆ ଦଳର ରେକର୍ଡକୁ ପଛରେ ପକାଇଛି। କ୍ରମାଗତ ୩ ବର୍ଷ ମଧ୍ୟରେ ଅଷ୍ଟ୍ରେଲିଆ ଏହି ବିଜୟଗୁଡିକ ହାସଲ କରିଛି। ଏହା ଦଳର ସ୍ଥିର ପ୍ରଦର୍ଶନକୁ ସୂଚାଉଛି ବୋଲି ଅଷ୍ଟ୍ରେଲିଆ ଅଧିନାୟିକା ମେଗ୍ ଲାନିଙ୍ଗ୍ କହିଛନ୍ତି। ୨୦୧୭ ଅକ୍ଟୋବର ପରଠାରୁ ଅଷ୍ଟ୍ରେଲିଆ ମହିଳା ଦଳ ଗୋଟିଏ ହେଲେ ବି ମ୍ୟାଚରେ ପରାସ୍ତ ହୋଇନାହିଁ। ମହିଳା କ୍ରିକେଟ ପାଇଁ ଏହା ଏକ ବଡ଼ ସଫଳତା ବୋଲି ଲାନିଙ୍ଗ୍ କହିଛନ୍ତି।
ଅଷ୍ଟ୍ରେଲିଆ ତରଫରୁ ବ୍ୟାଟିଂରେ ଓପନର ଆଲିସା ହିଲି ସର୍ବାଧିକ ୬୫ ରନକରି ଆଉଟ ହୋଇଥିବା ବେଳେ ଏଲିସ ପେରୀ ୫୬ ଓ ଆସଲେ ଗାର୍ଡନର ୫୩ ରନର ଅପରାଜିତ ଅର୍ଦ୍ଧଶତକୀୟ ପାଳି ଖେଳି ଦଳକୁ ଜିତାଇଥିଲେ। ନ୍ୟୁଜିଲାଣ୍ଡ ତରଫରୁ ବୋଲିଂରେ ଜେସ କେର, ହାନ ରୋଏ, ଆମେଲିଆ କେର ଓ ଏମି ସାଟେର୍ଥଓ୍ବେଟ୍ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ନ୍ୟୁଜିଲାଣ୍ଡ ତରଫରୁ ଓପନର ଲଉରେନ ଡାଉନ ସର୍ବାଧିକ ୯୦, ଅଧିନାୟିକା ଏମି ସାଟେର୍ଥଓ୍ବେଟ୍ ୩୨, ଆମେଲିଆ କେର ୩୩ ରନ ସଂଗ୍ରହ କରିଥିଲେ। ଅଷ୍ଟ୍ରେଲିଆ ତରଫରୁ ବୋଲିଂରେ ମେଗାନ ସ୍କଟ ସର୍ବାଧିକ ୪, ନିକୋଲା କାରେ ୩, ଆସଲେ ଗାର୍ଡନର ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ନ୍ୟୁଜିଲାଣ୍ଡ ମହିଳା ଦଳ ୪୮.୫ ଓଭରରେ ୨୧୨
(ଲଉରେନ ଡାଉନ- ୯୦, ଆମେଲିଆ କେର- ୩୩, ଏମି ସାଟର୍ଥଓ୍ବେଟ୍- ୩୨, ମେଗାନ ସ୍କଟ- ୪/୩୨, ନିକୋଲା କାରେ- ୩/ ୩୪)।
ଅଷ୍ଟ୍ରେଲିଆ ମହିଳା ଦଳ ୩୮.୩ ଓଭରରେ ୨୧୫/୪
(ଆଲିସା ହିଲି- ୬୫, ଏଲିସ ପେରୀ- ୫୬*, ଆସଲେ ଗାର୍ଡନର- ୫୩*, ସାଟର୍ଥଓ୍ବେଟ- ୧/୧୦, ଆମେଲିଆ- ୧/୬୦, ଜେସ କେର- ୧/୩୦, ହାନ ରୋଏ- ୧/୩୧)।
