ଭୁବନେଶ୍ୱର, ୧୦।୩(ବ୍ୟୁରୋ): ନବଜାତ ଶିଶୁଙ୍କ ପାଇଁ ଆଉ ମା’ କ୍ଷୀର ଅଭାବ ରହିବ ନାହିଁ। ଏହି ଆବଶ୍ୟକତା ପୂରଣ କରିବା ପାଇଁ କ୍ୟାପିଟାଲ ହସ୍ପିଟାଲରେ ଏକ ହ୍ୟୁମ୍ୟାନ ବ୍ରେଷ୍ଟ ମିଲ୍କ ବ୍ୟାଙ୍କ ବା ମଦର୍ସ ମିଲ୍କ ବ୍ୟାଙ୍କ୍ (ମା’ କ୍ଷୀର ଭଣ୍ଡାର) ପ୍ରତିଷ୍ଠା କରାଯାଇଛି। ଏ ସମ୍ପର୍କରେ ସୂଚନା ଦେଇ ହସ୍ପିଟାଲ ନିର୍ଦ୍ଦେଶକ ଡା. ଲକ୍ଷ୍ମୀଧର ସାହୁ କହିଛନ୍ତି, ଏହା ରାଜ୍ୟରେ ପ୍ରଥମ। ଏହାକୁ ମିଶାଇ ଦେଶରେ ମଦର୍ସ ମିଲ୍କ ବ୍ୟାଙ୍କ୍ ସଂଖ୍ୟା ୩୪ରେ ପହଞ୍ଚତ୍ଛି। ଯେକୌଣସି ସ୍ତନ୍ୟପାନ କରାଉଥିବା ମା’ ସ୍ବେଚ୍ଛାକୃତ ଭାବରେ ଏହି ବ୍ୟାଙ୍କରେ ନିଜର ଅତ୍ୟଧିକ କ୍ଷୀର ଦାନ କରିପାରିବେ। ଅସୁସ୍ଥତା କିମ୍ବା ମୃତ୍ୟୁ, ପ୍ରିମାଚ୍ୟୁର ଡେଲିଭରି ଆଦି ବିଭିନ୍ନ କାରଣରୁ ସ୍ତନ୍ୟପାନ କରାଇବାରେ ଅସମର୍ଥ ମା’ଙ୍କ ଶିଶୁଙ୍କୁ ଏଠାରେ ସାଇତି ରଖାଯାଇଥିବା କ୍ଷୀର ଖାଇବାକୁ ଦିଆଯାଇପାରିବ। ବୈଜ୍ଞାନିକ ପ୍ରକ୍ରିୟାରେ ମା’ମାନଙ୍କଠାରୁ ବଳକା କ୍ଷୀରକୁ ସଂଗ୍ରହ କରାଯାଇ ଛଅ ମାସ ପର୍ଯ୍ୟନ୍ତ ସଂରକ୍ଷଣ କରାଯାଇପାରିବ। ତେଣୁ ବର୍ତ୍ତମାନ କୌଣସି ଶିଶୁ ମା’ କ୍ଷୀର ଅଭାବରୁ ମରିବେ ନାହିଁ କିମ୍ବା ପୁଷ୍ଟିହୀନତାର ଶିକାର ହେବେ ନାହିଁ। ଏହା ବ୍ୟତୀତ ଆବଶ୍ୟକତାଠାରୁ ଅଧିକ ପରିମାଣର ମା’ କ୍ଷୀର ଷ୍ଟକ୍ ରହିଲେ, ତାହାକୁ ରାଜ୍ୟର ଅନ୍ୟ ଡାକ୍ତରଖାନାକୁ ମଧ୍ୟ ଯୋଗାଇ ଦିଆଯାଇପାରିବ ବୋଲି ଡା. ସାହୁ କହିଛନ୍ତି।
କ୍ୟାପିଟାଲ ହସ୍ପିଟାଲର ଶିଶୁରୋଗ ବିଶେଷଜ୍ଞ ଡା. ଆଲୋକ ସ୍ବାଇଁ କହିଛନ୍ତି, ଦୁଇଦିନ ପୂର୍ବେ ଖୋଲାଯାଇଥିବା ଏହି ହ୍ୟୁମାନ ବ୍ରେଷ୍ଟ ମିଲ୍କ ବ୍ୟାଙ୍କରେ ବୁଧବାର ସୁଦ୍ଧା ୧୩ଜଣ ମା’ ସ୍ବେଚ୍ଛାକୃତ ଭାବେ ସେମାନଙ୍କ କ୍ଷୀର ଦାନ କରିଛନ୍ତି। ଏହାକୁ ୩ ମାସ ପାଇଁ ଗଚ୍ଛିତ କରାଯାଇପାରିବ ଏବଂ ପାଶ୍ଚ୍ୟୁରାଇଜେଶନ (pasteurization)ପରେ ଏହାକୁ ଆଉ ୩ ମାସ ପାଇଁ ସଂରକ୍ଷଣ କରାଯାଇପାରିବ। ଏହିପରି ଭାବେ ପୂରା ୬ ମାସ ପାଇଁ ମା’ କ୍ଷୀର ଗଚ୍ଛିତ ରଖାଯାଇପାରିବ ବୋଲି ଡା. ସ୍ବାଇଁ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି, ପ୍ରଥମେ ସ୍ତନ୍ୟପାନ କରାଉଥିବା ମା’ମାନଙ୍କୁ ନର୍ସମାନେ ସେମାନଙ୍କ କ୍ଷୀର ଦାନ କରିବାକୁ ପରାମର୍ଶ ଦେଇଥାନ୍ତି। ସମ୍ମତି ପ୍ରକାଶ କଲେ ସେମାନଙ୍କ କ୍ଷୀର ପରୀକ୍ଷା କରାଯାଏ। ଠିକ୍ ଥିଲେ ସେମାନଙ୍କୁ ଦୁଗ୍ଧ ଅଭିବ୍ୟକ୍ତି ପ୍ରକୋଷ୍ଠକୁ ନିଆଯାଇ କ୍ଷୀର ସଂଗ୍ରହ କରାଯାଇଥାଏ। ପରେ ରେଫ୍ରିଜରେଟରରେ ବିଯୁକ୍ତ ୨୦ ଡିଗ୍ରୀ ତାପମାତ୍ରାରେ ସଂରକ୍ଷଣ କରାଯାଇଥାଏ ବୋଲି ଡା. ସ୍ବାଇଁ ସୂଚନା ଦେଇଛନ୍ତି।
