ସାଣ୍ଟିଆଗୋ,୩୦।୩ : ଚିଲିରେ ମନୁଷଠାରେ ବାର୍ଡ ଫ୍ଲୁର ପ୍ରଥମ ମାମଲା ଚିହ୍ନଟ ହୋଇଛି। ଯାହା ପରେ ଦେଶରେ ଲୋକଙ୍କ ମଧ୍ୟରେ ଆତଙ୍କ ଦେଖାଦେଇଛି। ଦେଶର ସ୍ବାସ୍ଥ୍ୟ ମନ୍ତ୍ରଣାଳୟ କହିଛି ଯେ ଜଣେ ୫୩ ବର୍ଷ ବୟସ୍କ ବ୍ୟକ୍ତି ବାର୍ଡ ଫ୍ଲୁରେ ଆକ୍ରାନ୍ତ ହୋଇଛନ୍ତିି। ଏହି ବ୍ୟକ୍ତିଙ୍କଠାରେ ସ୍ବାଇନ ଫ୍ଲୁର ଲକ୍ଷଣ ଥିଲା। ଏବେ ତାଙ୍କ ସ୍ବାସ୍ଥ୍ୟାବସ୍ଥା ଅବସ୍ଥା ସ୍ଥିର ଅଛି।
ବାର୍ଡ ଫ୍ଲୁ ଆକ୍ରାନ୍ତଙ୍କୁ ଚିହ୍ନଟ କରିବା ପରେ ଚିଲି ସରକାର ସଂକ୍ରମଣର ଉତ୍ସ ତଥା ଅନ୍ୟ ରୋଗୀଙ୍କ ସହ ଯୋଗାଯୋଗ କରୁଥିବାର ଅନୁସନ୍ଧାନ କରୁଛନ୍ତି। ଗତ ବର୍ଷ ଶେଷରୁ ଚିଲିରେ ବନ୍ୟ ପ୍ରାଣୀମାନଙ୍କରେ ଏଚ-୫-ଏନ୍-୧ ବାର୍ଡ ଫ୍ଲୁ ମାମଲା ରେକର୍ଡ କରାଯାଇଥିଲା। ବାର୍ଡ ଫ୍ଲୁ ଯୋଗୁ ସମ୍ପ୍ରତି କୁକୁଡ଼ା ରପ୍ତାନି ବନ୍ଦ କରିବାକୁ ସରକାର ବାଧ୍ୟ ହୋଇଛନ୍ତି।
ଆର୍ଜେଣ୍ଟିନାରେ ଏହି ଫ୍ଲୁ ରୋଗ ଚିହ୍ନଟ ହୋଇଛି। କିନ୍ତୁ କୁକୁଡ଼ା ରପ୍ତାନୀ କରୁଥିବା ବିଶ୍ୱର ବୃହତ୍ତମ ବ୍ରାଜିଲ ବର୍ତ୍ତମାନ ଏଥିରୁ ମୁକ୍ତ। ଚିଲିର ସ୍ବାସ୍ଥ୍ୟ ଅଧିକାରୀମାନେ ଉଲ୍ଲେଖ କରିଛନ୍ତି ଯେ ଏହି ଭୂତାଣୁ ପକ୍ଷୀ କିମ୍ବା ସାମୁଦ୍ରିକ ପ୍ରାଣୀମାନଙ୍କଠାରୁ ମଣିଷକୁ ସଂକ୍ରମିତ ହୋଇପାରେ, କିନ୍ତୁ ମାନବ-ମାନବ ସଂକ୍ରମଣର କୌଣସି ମାମଲା ଜଣା ନାହିଁ।
ଏହା ପୂର୍ବରୁ, ଇକ୍ୟୁଏଡର୍ ୯ ବର୍ଷର ବାଳିକାଙ୍କଠାରେ ବାର୍ଡ ଫ୍ଲୁ ସଂକ୍ରମଣର ପ୍ରଥମ ମାମଲାକୁ ନିଶ୍ଚିତ କରିଥିଲା । ସ୍ବାସ୍ଥ୍ୟ ଅଧିକାରୀମାନେ କହିଛନ୍ତି ଯେ ଏହା ମଣିଷ ମଧ୍ୟରେ ସଂକ୍ରମଣ ହେବାର ଆଶଙ୍କା କମ, କିନ୍ତୁ ଟିକା ନିର୍ମାତା ମାନବଙ୍କ ପାଇଁ ବାର୍ଡ ଫ୍ଲୁ ଶଟ ପ୍ରସ୍ତୁତ କରୁଛନ୍ତି।
