ନୂଆଦିଲ୍ଲୀ,୧୭ା୨: ଆଟର୍ନି ଜେନେରାଲ କେ.କେ. ବେଣୁଗୋପାଳଙ୍କ ଅସହମତି ସତ୍ତ୍ୱେ ସୁପ୍ରିମକୋର୍ଟ ପୁଣି ଥରେ କେତେକ ଟୁଇଟ୍କୁ ବିଚାରକୁ ନେଇ ନିଜଆଡ଼ୁ ଏକ ଆପରାଧିକ ଅବମାନନା ମାମଲା ରୁଜୁ କରିଥିବା ରିପୋର୍ଟ ପ୍ରକାଶ ପାଇବା ପରେ ଏହାକୁ ଅସ୍ବୀକାର କରିଛନ୍ତି ଖୋଦ୍ ସର୍ବୋଚ୍ଚ ଅଦାଲତ। ପ୍ରଥମେ ବରିଷ୍ଠ ସାମ୍ବାଦିକ ରାଜଦୀପ ସର୍ଦେଶାଇଙ୍କ ବିରୋଧରେ ଅଦାଲତ ଅବମାନନା ମାମଲା ନଂ.ଏସ୍ଏମ୍ସି(ସିଆର୍ଏଲ୍)୨/୨୦୨୦ ରୁଜୁ ହୋଇଥିବା ସୁପ୍ରିମ୍କୋର୍ଟ ଓ୍ବେବ୍ସାଇଟ୍ରେ ପ୍ରକାଶ ପାଇଥିଲା। ବିଭିନ୍ନ ଜାତୀୟ ଗଣମାଧ୍ୟମରେ ଏ ସମ୍ପର୍କିତ ରିପୋର୍ଟ ଆସିବା ପରେ ସୁପ୍ରିମ୍କୋର୍ଟ ଖଣ୍ଡନ କରିଛନ୍ତି। ଏହା ପ୍ରକାଶ ପାଇବା ସମୟରେ ଅଦାଲତଙ୍କ ଓ୍ବେବ୍ସାଇଟ୍ର କେସ୍ ସେକ୍ସନ୍ ଡାଉନ୍ ଥିଲା। ଅସାବଧାନତାବଶତଃ ଏହି ତ୍ରୁଟିକୁ ସୁଧାରିବା ପାଇଁ ପ୍ରକ୍ରିୟା ଜାରି ରହିଛି ବୋଲି ସୁପ୍ରିମ୍କୋର୍ଟ ପକ୍ଷରୁ କୁହାଯାଇଛି। ତେବେ ଦେଶର ସବୁଠୁ ବଡ଼ ଅଦାଲତରେ ଏଭଳି ତ୍ରୁଟି କିପରି ହେଲା ସେ ନେଇ ନାନା ପ୍ରଶ୍ନ ସୃଷ୍ଟି ହୋଇଛି। ପ୍ରକାଶ ଯେ, ପୂର୍ବରୁ ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣଙ୍କ ବିରୋଧରେ ସୁପ୍ରିମ୍କୋର୍ଟରେ ଅଦାଲତ ଅବମାନନା ମାମଲା ହୋଇଥିଲା। ତାହାକୁ ନେଇ ୨୦୨୦ ଅଗଷ୍ଟରେ ଟିଭି ଉପସ୍ଥାପକ ରାଜଦୀପ ସର୍ଦେଶାଇ ନ୍ୟାୟପାଳିକାକୁ ସମାଲୋଚନା କରି କେତେକ ଟୁଇଟ୍ କରିଥିଲେ। ସର୍ଦେଶାଇଙ୍କ ଟୁଇଟ୍ ଉପରେ ଆସ୍ଥା ଖୁରାନା ୨୦୨୦ ସେପ୍ଟେମ୍ବରରେ ସୁପ୍ରିମକୋର୍ଟରେ ମାମଲା ରୁଜୁ ପାଇଁ ପିଟିଶନ ଦାଏର କରିଥିଲେ। ତେବେ ରାଜଦୀପଙ୍କ ବିରୋଧରେ ଆପରାଧିକ ଅବମାନନା ମାମଲା ଚଳାଇବା ପାଇଁ ଆଟର୍ନି ଜେନେରାଲ ବେଣୁଗୋପାଳ ଅସହମତି ପ୍ରକାଶ କରିଥିଲେ।
