ମୁମ୍ବାଇ,୧୬।୨ : ମହାରାଷ୍ଟ୍ରର ଥାନେ ଜିଲାର ଆସନଙ୍ଗାଓ ଷ୍ଟେଶନ ନିକଟରେ ଏକ ଲୋକାଲ ଟ୍ରେନର ଚକାରେ ଗୁରୁବାର ଅଗ୍ନିକାଣ୍ଡ ଘଟିଛି। ଏହି ଘଟଣା ପରେ ଟ୍ରେନରେ ଥିବା ଯାତ୍ରୀମାନେ ନିଜ ଜୀବନ ବଞ୍ଚାଇବା ପାଇଁ କୋଚରୁ ଡେଇଁପଡିଥିବାର ଦୃଶ୍ୟ ଦେଖିବାକୁ ମିଳିଥିଲେ। ଅଧିକାରୀ କହିଛନ୍ତି ଯେ ବ୍ରେକ ଜାମ ହେବା କାରଣରୁ ଟ୍ରେନର ଚକାରେ ନିଆଁ ଲାଗିଯାଇଥିଲା। ଏହି ଘଟଣାରେ କୌଣସି ଯାତ୍ରୀ ଆହତ ହେବାର ଖବର ମିଳିନାହିଁ।
ଏହି ଘଟଣାର ଏକ ଭିଡିଓ ମଧ୍ୟ ଭାଇରାଲ ହୋଇଛି ଯେଉଁଥିରେ କୁହାଯାଇଛି ଯେ ମୁମ୍ବାଇଠାରୁ ୭୦କିଲୋମିଟର ଦୂରରେ ଏହି ଘଟଣା ଘଟିଛି। ସୋସିଆଲ ମିଡିଆରେ ଭାଇରାଲ ହୋଇଥିବା ଏହି ଭିଡିଓରେ ଯାତ୍ରୀମାନେ ଟ୍ରେନରୁ ଡେଇଁପଡୂଥିବାର ନଜର ଆସିଛନ୍ତି। ରେଳବିଭାଗ ସୂତ୍ର ଅନୁଯାୟୀ, ସକାଳେ ବହୁ ସଂଖ୍ୟକ ଯାତ୍ରୀ ଟ୍ରେନରେ ଥିବା ବେଳେ ଏହି ଘଟଣା ଘଟିଥିଲା। ଚକାଟି ନିଆଁ ଲାଗିବା ପରେ ଟ୍ରେନଟି ଅଟକି ଯାଇଥିଲା। ତେବେ ଏହା ପୂର୍ବରୁ ଅନେକ ଯାତ୍ରୀ ଟ୍ରେନରୁ ଡେଇଁପଡିଥିଲେ।
କେନ୍ଦ୍ରୀୟ ରେଳବାଇ ମୁଖପାତ୍ର କହିଛନ୍ତି ଯେ ଏହି ଘଟଣା ସକାଳ ପ୍ରାୟ ୮ଟା ୫୫ ସମୟରେ ଆସନଙ୍ଗାଓ ଷ୍ଟେଶନରେ ଘଟିଛି। ଏହି ଲୋକାଲ ଟ୍ରେନ ଦକ୍ଷିଣ ମୁମ୍ବାଇର ଛତ୍ରପତି ଶିବାଜୀ ମହାରାଜ ଟର୍ମିନାସରୁ ଥାନାର କସାରା ଅଭିମୁଖେ ଯାଉଥିଲା। ଉଲ୍ଲେଖନୀୟ ବିଷୟ ହେଉଛି, କେନ୍ଦ୍ରୀୟ ରେଳବାଇ ଏହାର ଚାରୋଟି କରିଡରରେ ୧୮୦୦ ଉପନଗରୀୟ ଟ୍ରେନ ସେବା ଜାରି ରଖିଉୀ। ଏଥିରେ ପ୍ରତିଦିନ ୪୦ଲକ୍ଷ ଯାତ୍ରୀ ଯାତ୍ରା କରିଥାନ୍ତି।
