ଭଞ୍ଜନଗର, ୨୩ା୭(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଥାନା ସମ୍ମୁଖରେ ଥିବା ଏକ ବିଦ୍ୟୁତ୍ ଖୁଣ୍ଟରେ ଗୁରୁବାର ସନ୍ଧ୍ୟାରେ ହଠାତ୍ ନିଆଁ ଲାଗିଯାଇଥିବାରୁ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ସଟ୍ ସର୍କିଟ୍ ଯୋଗୁ ଖୁଣ୍ଟରେ ଓହଳି ରହିଥିବା ବିଦ୍ୟୁତ୍ ତାରଗୁଡ଼ିକ ହୁ ହୁ ହୋଇ ଜଳିବା ଦେଖି ସେଠାରେ ଉପସ୍ଥିତ ଥିବା ସାଧାରଣ ଲୋକେ ଓ ଯାତ୍ରୀମାନେ ଭୟଭୀତ ହୋଇପଡ଼ିଥିଲେ।
ଘଟଣା ସମ୍ପର୍କରେ ଖବର ପାଇବା ପରେ ଟାଟା ପାୱାର କର୍ମଚାରୀମାନେ ତତକ୍ଷଣାତ୍ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ସଂଶ୍ଳିଷ୍ଟ ଅଞ୍ଚଳରେ ପାୱାର୍ କଟ୍ କରିବା ସହିତ ନିଆଁକୁ ଆୟତ୍ତ କରି ବିଦ୍ୟୁତ୍ ସେବାକୁ ସଜାଡ଼ିବା ପାଇଁ ଜୋରଦାର ପ୍ରୟାସ ଚଳାଇଛନ୍ତି।
ପ୍ରକାଶଥାଉ କି, ସହରର ଅଧିକାଂଶ ବିଦ୍ୟୁତ୍ ଖୁଣ୍ଟରେ ବିଭିନ୍ନ କେବୁଲ୍ ଓ ଇଣ୍ଟରନେଟ୍ କମ୍ପାନୀର ତାରଗୁଡ଼ିକୁ ମନଇଚ୍ଛା ଝୁଲାଇ ରଖାଯାଇଛି। ଏହାସହ ଉପଭୋକ୍ତାଙ୍କ ଘରକୁ ଯାଇଥିବା ତାରଗୁଡ଼ିକ ମଧ୍ୟ ଜାଲି ବୁଦା ଭଳି ଅସଜଡ଼ା ଅବସ୍ଥାରେ ରହୁଛି। ଏହିପରି ବିପଦପୂର୍ଣ୍ଣ ପରିସ୍ଥିତି ଯୋଗୁ ଆଜି ଥାନା ସାମ୍ନାରେ ଥିବା ଖୁଣ୍ଟରେ ଏଭଳି ଅଘଟଣ ଘଟିଥିବା ବେଳେ, ଭବିଷ୍ୟତରେ ଏପରି ବଡ଼ଧରଣର ଦୁର୍ଘଟଣା ଏଡ଼ାଇବା ପାଇଁ ଟାଟା ପାୱାର କର୍ତ୍ତୃପକ୍ଷ ତୁରନ୍ତ ଦୃଷ୍ଟି ଦେଇ ଆବଶ୍ୟକ କଡ଼ା ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି।
