ବ୍ରହ୍ମପୁର ଅଫିସ,୯।୫: ସଡ଼କ ସୁରକ୍ଷା ନିୟମ ପାଳନ ପାଇଁ ବ୍ରହ୍ମପୁର ଟ୍ରାଫିକ ପୋଲିସ ପକ୍ଷରୁ ଯାଞ୍ଚ କଡ଼ାକଡ଼ି କରାଯାଉଛି। ବିଶେଷକରି ହେଲମେଟ୍ ଧରପଗଡ଼ ଅଭିଯାନ ଜୋରଦାର ଚାଲିଛି। ହେଲମେଟ ପିନ୍ଧୁ ନ ଥିବା ଅମାନିଆଙ୍କଠାରୁ ଆଉ ୫ଶହ ନୁହେଁ ସଂଶୋଧିତ ନିୟମ ଅନୁସାରେ ୧ହଜାର ଟଙ୍କା ଜରିମାନା ଆଦାୟ କରିବା ବ୍ୟବସ୍ଥା କରାଯାଇଛି। ଏପରିକି ହେଲମେଟ୍ ନ ପିନ୍ଧିଲେ ୩ ମାସ ପର୍ଯ୍ୟନ୍ତ ଗାଡି ଚାଳକଙ୍କ ଡ୍ରାଇଭିଂ ଲାଇସେନ୍ସ(ଡିଏଲ୍) ରଦ୍ଦ କରିବା ପାଇଁ ପୋଲିସ ଆଞ୍ଚଳିକ ପରିବହନ ଅଧିକାରୀ (ଆରଟିଓ)ଙ୍କୁ ସୁପାରିସ୍ କରିବ ବୋଲି ନିୟମ କରାଯାଇଛି। ଗତ ଏପ୍ରିଲ ମାସରେ ବ୍ରହ୍ମପୁର ଟ୍ରାଫିକ ଥାନା ପକ୍ଷରୁ ମୋଟ ୪୬ ଲକ୍ଷ ୪୮ ହଜାର ଟଙ୍କା ଜରିମାନା ଆଦାୟ କରାଯାଇଥିବା ବିଭାଗୀୟ ସୂତ୍ରରୁ ସୂଚନା ମିଳିଛି। ଏହି ଜରିମାନା ମାନୁଆଲ୍ ଏବଂ ଇ-ଚାଲାନ୍ରେ ମୋଟ ୪୮୧୭ ଅମାନିଆ ଗାଡି ଚାଳକଙ୍କ ଉପରେ ଧାର୍ଯ୍ୟ ହୋଇଛି ବୋଲି ଟ୍ରାଫିକ୍ ଥାନାଧିକାରୀ ସୁନୀଲ ବେହେରା ସୂଚନା ଦେଇଛନ୍ତି। ସେଥିମଧ୍ୟରୁ ହେଲମେଟ ନ ପିନ୍ଧିବା ଅଭିଯୋଗରେ ସହରବାସୀ ସର୍ବାଧିକ ୪୪ ଲକ୍ଷ ୪୨ ହଜାର ଟଙ୍କା ଜରିମାନା ଗଣିଛନ୍ତି। ସେହିପରି ରାସ୍ତାରେ ଗାଡି ଚଳାଇବା ସମୟରେ ମୋବାଇଲ ବ୍ୟବହାର କରିବା, ଟ୍ରିପଲ ରାଇଡିଂ ଆଦିି ନିୟମ ପାଳନ କରୁନଥିବା ଚାଳକଙ୍କ ଠାରୁ ୨ ଲକ୍ଷ ୬ ହଜାର ଟଙ୍କା ଜରିମାନା ଆଦାୟ କରାଯାଇଛି।
୧୬୨ ଗାଡି ଚାଳକଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ ପାଇଁ ଆରଟିଓଙ୍କୁ ସୁପାରିସ କରାଯାଇଥିବା ଥାନାଧିକାରୀ ବେହେରା ସୂଚନା ଦେଇଛନ୍ତି। ଏପରି ଧରପଗଡ଼ ଆଗକୁ ମଧ୍ୟ ଜାରି ରହିବ ବୋଲି ସେ ସ୍ପଷ୍ଟ କରିଛନ୍ତି। ତେଣୁ ହେଲମେଟ୍ ପିନ୍ଧି, ଟ୍ରାଫିକ୍ ନିୟମ ପାଳନ କରିବା ସହ ନିଜ ଜୀବନକୁ ସୁରକ୍ଷିତ ରଖନ୍ତୁ ବୋଲି ପୋଲିସ ପକ୍ଷରୁ ଆହ୍ବାନ କରାଯାଇଛି।
ବ୍ରହ୍ମପୁର ସହରର ବିଭିନ୍ନ ଛକରେ ଲାଗିଥିବା ସମନ୍ବିତ ଟ୍ରାଫିକ ପରିଚାଳନା ସିଷ୍ଟମ (ଆଇଟିଏମ୍ଏସ୍)ର ସିସି କ୍ୟାମେରାରେ ଯେଉଁମାନେ ଧରା ପଡ଼ୁଥିଲେ ସେମାନଙ୍କ ମୋବାଇଲକୁ ଇ-ଚାଲାନ୍ ପଠାଯାଉଥିଲା। ଏବେ ଏହାକୁ ଆହୁରି କଡ଼ାକଡ଼ି ପାଳନ କରାଯାଇଛି। ଆଇଟିଏମଏସ ବ୍ୟବସ୍ଥା ସହିତ ପୋଲିସ ସହରର ବିଭିନ୍ନ ଛକରେ ଜଗି ରହି ହେଲମେଟ୍ ଯାଞ୍ଚ କରୁଛି। କେତେଜଣ ଅମାନିଆ ଏବେ ବି ସୁଧୁରୁ ନାହାନ୍ତି। ଯେଉଁମାନେ କି ପୋଲିସ ହାତରେ ଧରାପଡ଼ି ଜରିମାନା ଗଣୁଛନ୍ତି। ସଡ଼କ ସୁରକ୍ଷା ନିୟମକୁ କଡ଼ାକଡ଼ି କରିବା ପାଇଁ ୨୦୧୯ ସେପ୍ଟେମ୍ବର ୧ ତାରିଖରୁ ବ୍ରହ୍ମପୁର ମହାନଗରରେ ଆଇଟିଏମ୍ଏସ୍ ବ୍ୟବସ୍ଥା ଆରମ୍ଭ କରାଯାଇଥିଲା। ମହାନଗରରେ ୩ କୋଟି ୭୨ଲକ୍ଷ ଟଙ୍କା ବ୍ୟୟରେ କାନାଡ଼ା ବୈଷୟିକ ଜ୍ଞାନକୌଶଳକୁ ଅବଲମ୍ବନ କରି ଆଇଟିଏମ୍ଏସ୍କୁ କାର୍ଯ୍ୟକାରୀ କରାଯାଇଥିଲା। ଏହାଦ୍ୱାରା ବିପର୍ଯ୍ୟସ୍ତ ଟ୍ରାଫିକରେ ସୁଧାର ଆଣିବା ସହ ସିସି କ୍ୟାମେରା ଜରିଆରେ ଅସାମାଜିକ କାର୍ଯ୍ୟକଳାପ ଉପରେ ନଜର ରଖାଯାଉଛି। ପ୍ରଥମ ପର୍ଯ୍ୟାୟରେ ଟାଟାବେଞ୍ଜ ଛକ, କମାପଲ୍ଲୀ, କୋର୍ଟପେଟା ଛକ, ପିଭିଏନ୍ ରାଓ ପେଟ୍ରୋଲ ପମ୍ପ ଛକ ଓ ଗେଟବଜାର ଛକରେ ଏହା କାର୍ଯ୍ୟକାରୀ କରାଯାଇଛି। ଏହା ସହିତ ସହରର ବିଭିନ୍ନ ସ୍ଥାନରେ ଅତିରିକ୍ତ ୧୦୦ଟି ସିସି କ୍ୟାମେରା ଖଞ୍ଜାଯାଇଛି ବୋଲି ଟ୍ରାଫିକ୍ ଥାନା ଅଧିକାରୀ କହିଛନ୍ତି।
