ଲୌସାନ୍ନେ, ୨୭।୧୧: ଦକ୍ଷିଣ ଆଫ୍ରିକାରେ ହେବାକୁ ଥିବା ଆଗାମୀ ଏଫ୍ଆଇଏଚ୍ ଜୁନିୟର ମହିଳା ହକି ବିଶ୍ୱକପ୍କୁ ଶନିବାର ସ୍ଥଗିତ ରଖି ଦିଆଯାଇଛି। କାରଣ ଦକ୍ଷିଣ ଆଫ୍ରିକାରେ ଚିହ୍ନଟ ହୋଇଥିବା କରୋନା ଭୂତାଣୁର ନୂଆ ଭାରିଆଣ୍ଟା ପୂରା ବିଶ୍ୱକୁ ଡରାଇ ଦେଲାଣି। ଏହି ସମ୍ମାନଜନକ ଟୁର୍ନାମେଣ୍ଟ ଆସନ୍ତା ୫ରୁ ୧୬ ତାରିଖ ପର୍ଯ୍ୟନ୍ତ ଆଫ୍ରିକୀୟ ଦେଶରେ ଆୟୋଜନ ହେବାର ଥିଲା।
ଦେଶରେ ୧୦୦ରୁ ଊର୍ଦ୍ଧ୍ୱ ନୂଆ ଭାରିଆଣ୍ଟ ଆକ୍ରାନ୍ତ ଚିହ୍ନଟ ହେବା ପରେ ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍), ଦକ୍ଷିଣ ଆଫ୍ରିକାନ ହକି ଆସୋସିଏଶନ ଏବଂ ପୋତ୍ଚେଷ୍ଟ୍ରୁମସ୍ଥିତ ନର୍ଥ-ଓ୍ବେଷ୍ଟ ୟୁନିଭରସିଟି ମିଳିତ ଭାବେ ବିଶ୍ୱକପ୍କୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି। ”ଏଫ୍ଆଇଏଚ୍ ଇଭେଣ୍ଟରେ ସର୍ବଦା ସଭିଙ୍କ ସୁରକ୍ଷାକୁ ଗୁରୁତ୍ୱ ଦିଆଯାଏ। ଇଭେଣ୍ଟରେ ଅଂଶଗ୍ରହଣ କରୁଥିବା କିଛି ଦେଶ ଦକ୍ଷିଣ ଆଫ୍ରିକା ଉପରେ ଉଡ଼ାଣ କଟକଣା ଲଗାଇଛନ୍ତି। ଏଣୁ ଇଭେଣ୍ଟ ଆୟୋଜନ ଏବେ ସମ୍ଭବ ନୁହେଁ“ ବୋଲି ମିଳିତ ବିବୃତିରେ କୁହାଯାଇଛି।
