ନୂଆଦିଲ୍ଲୀ,୧୬।୧୨: ଗତ ଚାରି ବର୍ଷ ମଧ୍ୟରେ ତୃତୀୟ ଥର ପାଇଁ ଆର୍ଜେଣ୍ଟିନା ସୁପରଷ୍ଟାର ଲିଓନେଲ ମେସି ଫିଫା ଶ୍ରେଷ୍ଠ ପୁରୁଷ ଖେଳାଳି ପୁରସ୍କାର ପାଇଛନ୍ତି। ଏକ କଡ଼ା ପ୍ରତିଯୋଗିତାରେ ସେ ନରୱେ ଷ୍ଟ୍ରାଇକର ଏରଲିଙ୍ଗ ହାଲାଣ୍ଡଙ୍କୁ ପଛରେ ପକାଇ ଏହି ପୁରସ୍କାର ଜିତିଛନ୍ତି। ମହିଳାମାନଙ୍କ ମଧ୍ୟରେ ଐତାନା ବୋନମାଟି ଏହି ପୁରସ୍କାର ଜିତିଥିଲେ।
ଏକ ଷ୍ଟାର ସମାରୋହରେ ସ୍ପେନ ଏବଂ ବାର୍ସିଲୋନା ଷ୍ଟ୍ରାଇକର ଐତାନା ବୋନମାଟି ଶ୍ରେଷ୍ଠ ଫିଫା ମହିଳା ଖେଳାଳି ପୁରସ୍କାର ପାଇଥିଲେ। ମଞ୍ଚେଷ୍ଟର ସିଟି କୋଚ ପେପ ଗାର୍ଡିଓଲା ୨୦୨୩ର ଶ୍ରେଷ୍ଠ ପୁରୁଷ ପ୍ରବନ୍ଧକ ପୁରସ୍କାର ପାଇଥିବାବେଳେ ଇଂଲଣ୍ଡ କୋଚ ସରିନା ୱିଗମ୍ୟାନ ଚତୁର୍ଥ ଥର ପାଇଁ ଶ୍ରେଷ୍ଠ ମହିଳା କୋଚ ଅଫ ଦି ଇୟର ପୁରସ୍କାର ପାଇଛନ୍ତି।
ଲଣ୍ଡନରେ ଅନୁଷ୍ଠିତ ସମାରୋହରେ ମଞ୍ଚେଷ୍ଟର ସିଟିର ଷ୍ଟପର ଏଡରସନ ଶ୍ରେଷ୍ଠ ପୁରୁଷ ଗୋଲକିପର ପୁରସ୍କାର ପାଇଥିବାବେଳେ ମଞ୍ଚେଷ୍ଟର ୟୁନାଇଟେଡ ଏବଂ ଇଂଲଣ୍ଡର ମେରି ଇର୍ପ୍ସ ଶ୍ରେଷ୍ଠ ମହିଳା ଗୋଲକିପର ପୁରସ୍କାର ପାଇଥିଲେ।
