ଡିସପୁର,୨୧।୭: ଆସାମର ଜଣେ ମହିଳା ଡାକ୍ତର ଏକାସାଙ୍ଗରେ ୨ଟି ଭିନ୍ନ କରୋନା ଭାରିଆଣ୍ଟରେ ସଂକ୍ରମିତ ହୋଇଥିବା ଜଣାପଡ଼ିଛି। ଯାହା ଦେଶର ପ୍ରଥମ ମାମଲା। ଏନେଇ ଡିବ୍ରୁଗଡ଼ ସ୍ଥିତ ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ ରିସର୍ଚ୍ଚ(ଆସିଏମ୍ଆର)ର ରିଜିଓନାଲ ମେଡିକାଲ ରିସର୍ଚ୍ଚ ସେଣ୍ଟର(ଆରଏମ୍ଆରସି)ର ବରିଷ୍ଠ ବୈଜ୍ଞାନିକ ଡକ୍ଟର ବି.ଜେ ବୋର୍କାକୋଟି ସୂଚନା ଦେଇଛନ୍ତି। କୋଭିଡ ଟିକାର ୨ଟି ଡୋଜ୍ ନେବା ସତ୍ତ୍ୱେ ଉକ୍ତ ମହିଳା ଡାକ୍ତର କରୋନାର ୨ଟି ଭାରିଆଣ୍ଟ ଆଲ୍ଫା ଓ ଡେଲ୍ଟା ଦ୍ୱାରା ସଂକ୍ରମିତ ହୋଇଛନ୍ତି। ଏବେ କିନ୍ତୁ ତାଙ୍କର ସ୍ବାସ୍ଥ୍ୟାବସ୍ଥା ଭଲ ରହିଛି। ଗତ ୧ମାସରୁ ଉର୍ଦ୍ଧ୍ୱ ହେବ ପ୍ରତିଦିନ ଏହି ଆକ୍ରାନ୍ତଙ୍କ ସ୍ବାସ୍ଥ୍ୟାବସ୍ଥାକୁ ଅନୁସରଣ କରାଯାଉଛି। ଉକ୍ତ ମହିଳାଙ୍କ ଗଳା ଓ ଶରୀରରେ ସାମାନ୍ୟ ଯନ୍ତ୍ରଣା ହେବା ସହ ଅନିଦ୍ରା ସମସ୍ୟା ଦେଖାଦେଇଥିଲା। ତେଣୁ ଚିନ୍ତାର କୌଣସି କାରଣ ନ ଥିବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇନାହିଁ। ଘରେ ରହି ଏବେ ସେ ସୁସ୍ଥ ହୋଇଛନ୍ତି ବୋଲି ଡା.ବୋର୍କାକୋଟି କହିଛନ୍ତି। ଗତ ମେ’ରେ ଆରଏମ୍ଆରସି ଲାବ୍ରୋଟାରୀରେ ମହିଳା ଡାକ୍ତରଙ୍କ ଜିନୋମ ସିକ୍ୟୁଏନ୍ସର ପରୀକ୍ଷା କରିବା ପରେ ଏହି ତଥ୍ୟ ସାମ୍ନାକୁ ଆସିଥିଲା। ଏହି ଦ୍ୱିଗୁଣ ସଂକ୍ରମଣର କେତେକ ମାମଲା ବ୍ରିଟେନ, ବ୍ରାଜିଲ ଓ ପର୍ତ୍ତୁଗାଲରେ ମଧ୍ୟ ଦେଖିବାକୁ ମିଳିଛି। କିନ୍ତୁ ଏହା ଭାରତର ପ୍ରଥମ ମାମଲା।
